Numbers 21

Isaraele Wambu Dupwame Kenane Wambu Dupwa Pyao Isa Palyiyami

Yuu Arate yuu Kenane donorena singi dokona kiŋi Kenane akali mende Isaraele wambu dupwa Atarimi kata dokona epelyaminyi leyaminyi siya. Sepala baame nakama pyao wambu dupwana lapo puu maiyuo nyuo piya. Piyamo dokopa Isaraele wambu dupwame Kamongo kando pii lalu lao leyami. Namwame wambu dupwa pyao isa palyalapa lao embame jere ramo doko namwame nakamape nakamana yuu taonepe emba keta julu joo jepala peparae pyao kokwa soo nembarama, leyami. Pii leyaminyi doko Kamongome sepala nyisiyamopa Kenane range dupwa pyao isa palyiyami. Dokona lao Isaraele wambu dupwame nakamape nakamana yuu taonepe pyao nembalu nembo nembapala yuu doko kingi Orima, leyami.
Wambu mendeme narami dokopa kau dake kandapala dokopa baa mee ingyara. (21:8)


Kone Kana Dopaleme Kau Wasiya

Isaraele wambu dupwa yuu kyau Ori yaki nyuo kata mende soo ipwa kota pete Kone lenge penge dokona pao yuu Itome awali lao panya peyami. Panya peyaminyipape nakama makapala Anatu Mosesepa kando kamba lao mumu leyami. Yuu muiyana nenge ipwape see nange dakena kumaramiŋi lao akipamo embame namwa yuu Isipi yaki nyuo dae lanyuo ipisi? Namwame nenge koo dapwa rae maiyuo kamba naa narama, leyami. Dokopa Kamongome wambu pingi kau lapo nakama keta peyamosa kau dupwame Isaraele wambu malu piyamisa kumuyami. Dokopa Mosese kareyamo dokona wambu dupwa epapala dopa lamaiyuo, Namwa embapa Kamongopa kando kamba lao karamwano doko koo pimwa. Dokona epapu Kamongome kau dapwa nyuo nembakana lao ateŋa lakape. Leyaminyi dokopa Moseseme wambu dupwana lao ateŋa lakamiya. Dokopa Kamongome Mosese lamaiyuo, Kone kana dokona lapo nyepala kau ingyuo pyuo wasapala isa lomasi dokona yukunyi palyape. Dokona kau menge dupwame wambu mende narami dokopa kau dake kandapala dokopa baa mee ingyara, leya. Leyamo dokona Moseseme kone kana dokome kau mende wasapala isa dokona yukunyi palyiya. Kau menge dupwame wambu mende neyaminyi dokopa kau wasisi yukunyi palyiyamo doko kandapala mee ingiya.
21:10-35Isaraele wambu dupwana lapo yuu neta potemenge dorena piso Kenane peyami. Dee lapo yuu donorena piso Kenane dokona peyami.


Copyright information for `KYC