Psalms 118

Yanda Pyuo Anamasi Minyapala Ange Lao Loma Singi Doko

Kamongo baa elyapeko doko karapyamopa banya mona retenge doko kulisa ingyuo silyamo dokona
baa kando ange lao karamana.
Isaraele wambu dupwa nakamame
banya mona retenge doko kulisa sulu sera ingyuo silyamo lena.
Banya purisi akali dupwame
dopako lena.
Wambu baa kingi wapambupi lakao lakandelyaminyi dupwa opetaeme
banya mona retenge doko kulisa sulu sera ingyuo silyamo lena.

Namba randa nyuo karo Kamongo kyakale leyo yuu gii dokopa
baame isingi yano pyakao namba kiiramo nyiya.
Kamongo doko namba role pyao karamo dokona
wambumi namba mende pirami dokona pakame kumuo kara naro.
Nambana yanda pimwai dupwa anamasi minyuoisa palirami dokopa
nambana Kamongome namba nyisapyasa pilyamo lao kandaro.
Kamongo keta mona pyamalyaro kararamo doko suu pyao
wambu keta mona pyamalyaro kararamo doko kapa ingya nara.
Lita akali dupwa keta pyamalyaro kararenepape
Anatu keta dopa piri doko wakasa ingilyamo.

10 Yanda pimwai soo kaeyo dupwame nambamoo pipya karo awali laminyipape
Kamongona porai dokome mee ote pinyi nembeyo.
11 Nakamame kata paro dupwa peparaena roko iminyipape
Kamongona porai renge dokome pyao anamasi minyiyu.
12 Nakamame namba nyuo sukusa pyambwapala amburalimi pili laminyipa
Anatunya porai renge dokome nambame nakamba nepereke palunya isare pele letosa otenge.
13 Namba kuinya palyimisa yasu nalyano lao mona rumbingi karapunupape
Kamongo baame namba nyisingi.
14 Kamongo baa namba ama porai kana lopalopa inginyi pyambungi.
Doko baame namba pyuo nyilyasa pingi.

15 Anatunya wambunya komau anda dupwana yanda pyuo rakae sepala
wii aupilao kenane pyao karaminyiŋi selapa.
Kamongona porainya rengedokome doko pipyasa pilyamo.
16 Namba banya porai renge dokome pyao anamasi minyakalyamo.
Banya porai renge dokome yanda angi pyao penge.

17 Namba kuma naro. Kumungi kandale doko suu pyao lete karapala
Kamongome apa pyakalyamo dupwa polo lamairu.
18 Baame namba poraiyuo yasuko nalasi lao randa jipyamopape
kumunginya palyuo jii nange.

19 Nakamame tembole andana kame kambu doko nambana laolumbwa-kalapape.
Dokopa Kamongo baapa ange lala parole.

20 Kamongona kame kambu doko dakena silyamoŋo
dokona rolae pingi dupwa iki kolando eparami.

21 Nambame Kamongo embenakingi doko lakandelyo.
Renge doko embame yanda dupwana pyuo rakae salaselao jingi.

22 Doko akali anda pyuo kareyami dupwame kana mende nyuo nembeyami.
Kana doko enakana anda donge dokona mupwa ingyuo epo siya.
23 Yulu doko mee akalimi pii nayami. Kamongo dokome piya.
Piyamo doko namwa mona nembo kandelyamano.
24 Yuu gii dake elyape Kamongome yandana pyao rakae selapa lao jipyasa pilyamo dokona
raekomaiyuo yuu andape kalya pyuo karamanale.
25 Kamongo embame pyuo nyii.
Embame namwa pyuo nyepala mondo lao pyuokondanyi nembo karalapa lao jere.

26 Kamongona kingi lao epelyamo doko Anatumi elyape keta penale.
Kamongona tembole anda dokona piso emba elyape keta pisale letamano.
27 Kamongo doko Anatu ingyuo karamo baame namwa pipya yulu elyape pipya.
Nakamana kingi raka isa yoko lakao minyarami dokome kanda soo yuu andape kalya pyuo
kana pyare dokona kenane pyao awali lao pyuo kararami.

28 Emba nambana Anatu karene dokona kando ange leto.
Nambame embena yulu wakasa ingyuo penge dupwana lao lamairu ingilyamo.

29 Kamongo baa keyange ingyuo karo banya mona retenge doko kulisa ingyuo pelyamo dokona
ange lao karalapape.
Copyright information for `KYC