Psalms 32

Koo Dupwana Nyuo Kame Sakana Lao Polo Lamaingi Doko

Mendena koo dupwa nyuo yambe pyao kame sakao kaeyasi seramodokona raeme kumuo pena.
Akali mendena koo dupwana Kamongo Anatumi nyuo yaka lao reta nao kame sakamira doko raeme kumuo karara.
Akali panga soo laa nange dokome koo pirami dupwana
Kamongome koo lao laa nara dokona rae maiyuo para.

Koo dupwa polo laa nayono dokopa
ee lao karo kwuanyi serapala nenge sikya piya.
Kukwa korakamape kamongo embame namba randa jii.
Panyi pipala yuu rombe laa nangenyili pyuo
nambana porainya renge doko mee ingiya.

Nambana koo dupwa emba keta polo langiyu.
Kopetame pingi dupwa yalu pinya saka napala
emba polo langinya suu piyu.
Dokona embame nambana koo pingi dupwa peparae kwuanyi nembakaeye.

Embena pii mondo laominyingi wambu dupwame yuu gii randa epelyamo dokopa emba kando loma serami ingilyamo.
Randa dupwa apunda ingyuo kulimbwanyi peyo epenge dokopa randa epenge dokome nakama nyera ingya nangepya.
Emba nambana yalu pingipanda doko.
Randa nyero dokopa namba nyisare ingilyamo.
Emba nambana randa epara dupwana kyawa lete nyere ingilyamo dokona lao
wee kenanepe lao ranaisa pokao poraiyuo lao karo.

Kamongome lao dokopa, Nambame emba apa pyuo palyuo karo piri lao mana langiru, letamo.
Nambame dopa pyuo pipingi lao mana pii langiru.
Mena osepe panda dongepe kyakange ingilyamosa
pii rape rape lao simili lao nenge katana kapa bange poraipi puupi dolapome anjapala minyilyaminyi paenge
dopale ingyuo kara nalapape.

10 Koo yaki nyii nao pingi dupwa randa nao pisirami.
Dopa piraminyipape Kamongo baa keta mona pyamalyuo karaminyi dupwa
embena mona reto puu penge renge dokome kyawa minyarene karenale.
11 Rolae pyakamyuo karaminyi dupwa
Kamongome nyisapya dokona rae maiyuo parami ingilyamo.
Banya pii warombo singi dupwa rae maipala pii porakaiyuo lao para ingilyamo.
Copyright information for `KYC