Psalms 40

Lakando Pingi Kenane

Kamongo dokome namba nyisara lao suu pyao mee isaro kareyo.
Dokopa enakana nambana ee leyo doko baame siya.
Yuwale koo andake ipwanju singi mendena paleyonopa
baame kyawa lete nyepala kana dokona pisiya.
Baame namba namwana Anatu lakandenge kenane enenge mende pyao mana langiya.
Wambu malu dupwame dake kando pako karo repe repe laramo doko soo
Kamongo baa kapa pira lao suu pyarami.

Wambu isa kanape anatu lao kingi lenge dupwape
anatu kyambo lenge dupwape angi lao suu pyao kara napala
Kamongo doko kapa ingingi lao suu pyao karaminyi dupwa rae maiyuo kararami.
Kamongo Anatu embame namwana renge malu pyakao karenge.
Emba yale mende kara nalyamo.
Embame rengya keyange nyera dupwa peparae rapa rapa pyakalene.
Namba embena yulu peparaena lao lapuli doko
yulu malu mee sipyamosa saka naro ingilyamo.

Emba menana rendamu nyelana rae mai napala
namba yanenge wai pyapala kumuo jelase lao rapa rapa pyaane leya.
Nakamana koo dupwa kame sakalase lao mena pyao kiso jilyaminyi doko rae maiyuo nyii nalene kandelyo.
Kandapala nambame buku kao pele pele lasi dokona leyamuli pyuo dae karo.
Emba suu pyarenyili pyuo piri.
Embena mawa pii doko nambana monarena manjo karenge, leya.

Embena wambu dupwa wato leyami dokona
nambame waili pii embame nyisiinyi doko polo lamaiyu.
Nambame wambu dupwa kaeya nao lamaiyuoko kararo doko emba silini.
10 Lete wai pyao nyiyamo doko namba yeelyo iki sepala kaeya napu.
Nambame yuu peparae embena yulu keyange pyuo nyisilini dupwa lamaiyuoko karenge.
Embena wambu dupwa wato letaminyi yaka lao namba roma napyuo pisa nange.
Emba alowa pii nao mona reto puu pelene dokona lao lamaiyuoko karenge.

11 Kamongo, embame namba yuu peparae sakame kumuo karalu karare doko namba silyu.
Embena alowa pii nao mona reto karalu karenge suu pingi dokome namba yuu peparae kyawa minyuo reto karara.

Kamongome Nyisinya Lao Ateŋa Lenge

12 Randa malu mee namba keta soo kako pipyasa
kapa pyuo yaka lalana saka nalyo.
Nambana koo dupwame namba kalya nasi minyapyasa
kapa kandaro ingya nalyamo.
Nambana ayembana kyawasi malu mee karamo dopale ingyuo sipyasa
nambana suu pingi doko isa pupyamo karo.
13 Kamongo, embame namba pyuo nyepala dakepa nyiso karape.
14 Wambu nambapyao kumakalana lao suu pilyaminyi dupwa nyuo anamasi minyuo kyawa sisingi bolombalo laramo penale.
Lapo namba randa nyipu dokopa rae maimi dupwa kapu kyepala elyo penale.
15 Namba kando giyalya giyana pimi dupwa
nakama isa palaminyi dokona elyame kumuo karenale.

16 Embaketa epelyaminyi dupwa
mona pyakalyuo pyaramopa rae maiyuo kararami.
Embame pyuo nyiinyi dokona lao sangyu lao karaminyi dupwame
yuu peparae lao, Kamongo doko baa aki Kamongo lao karenale.

17 Namba mendali range palya nao mee isale karenge.
Dopa pyuo karalonopape Kamongoembame namba kame see nange.
Emba nambana Anatu nambana pyuo nyingi ingyuo karene dokome
waiyako lao namba nyiso karape.
Copyright information for `KYC