Psalms 73

Anatu Baa Rolae Pingi

Anatumi Isaraele wambu keta yulu elyape pingi.
Kinyi, wambu monarena yapasi seramo dupwa keta elyape ingyuo penge.
Dopa piramopape namba oo repeta isa paro ingiya.
Nambana kimbu doko keta keta pipala Anatu kapa ingingi lao suu pingi doko oo yaki nyepala isa pwuano lao siyu.
Akali koo pingi dupwa kamongapala bange dupwa ando peyasa kandapala
kyaŋe singi dupwa pipya yango palyiyu dokome namba isa paro ingiya.

Nakamana randa pingi mende epa napyamopa
nakama poraiyuo yanenge keyange karo karaminyi.
Nakama wakale dupwa pilyaminyi doko suu pyaoranda nyii nalyaminyi.
Wakale dupwa randa wakale wakale nyiminyi dopale doko nakama keta epa nalyamoko.
Dopa pipyasa nakama mee yongona andanyi nembo kyaŋe silyaminyi.
Dopa pyuo karo akali menge dupwa pyapala kokwa sinyi nembo karaminyi.
Nakamana mona dupwana yulu koo wakale wakale dupwa neta epenge.
Dee nakamana suu pingi dupwana yulu koo dupwa imambu see nao rapa rapa pilyaminyi.
Nakamame wakale dupwa kando pii koo lao giyalya giyana pilyaminyi.
Nakama range mupwa lao suu pyapala enda akalipi wakale dupwa randa maiyuo kokwa seraminyi dokona lao suu pyao lao palaminyi.
Nakamame yake dorena karenge Anatu baakando pii kopetame letaminyi.
Nakama rangena kingi doko ketae pyambuo lao isa wambu dupwa dopa pinya dopa pinya lao karaminyi.
10 Dopa piminyisa Anatunya wambu angi dupwamepe kapu kyepala
nakamana pii laminyi doko soo kale yukupala angi lao suu pilyaminyi.
11 Namwa pilyamano dupwa Anatumi see nara, letaminyi.
Kamongo Ama Ketae karenge dokome koto kanda nara, letaminyi.
12 Wambu koo pingi dupwana yulu doko dopa pyuo pilyaminyi.
Nakama bange ama malu sipyamopape mee nyelanako suu pyao lao karaminyi.

13 Namba mondo lao waso karo mona yapasi silyamo dee nambana kingi dokome koo mende pii nalyo.
Doko mee ingyuo parase?
14 Anatu, embame kukwa korakamape yuu gii yaka lao namba randa jookarenge.
Dee yangama peparae namba moŋo jingi.

15 Namba pii kopetame leyaminyi doko lapuli
embena wambu pii lao nenge rambo lao pingi dopale pii napuli.
16 Dokona lao renge angi dokona randa nao serama ingyapyamopape sipuli lao
pyuo lisa pyuo karapu.
17 Dopa pipunupape namba embena tembole anda dokona papala
koo pingi dupwa keta renge dopa pyuonde paliralyamo lao soo pakana palyipu.

18 Kinyi, embame nakama kata keta keta pyuo puu pelyamo dokona nyuo karapala
pyao lukundo soo randa nyinya lao piri ingilyamo.
19 Nakama waiya lao koo keta palyuo randa nao otarami.
20 Kamongo nakama mee kukwama kombeya pipala yangama sipurenge dokopa
mee ingyalya ingyana pilyasa kame soo kaenge dopakale ingyuo karaminyi.

21 Dokopa nambana suu pingi koo manjo mona rando karo
22 namba kopyali ingyapala emba angi sepa nayo.
Namba rangeme embena lenge kambu dokona suwa menape ingyuo peyo.
23 Dopa pipunupape namba embapa role pyao karapunu dokona lao
embame nambana kingi minyaro karene.
24 Embame dopa pyuo dapa pyuo karape lao namba kata lasaka pipinyi karo pelyo.
Pao lumwa pyuo dusa nambana kingi ketae pyambuo lakando nyere ingilyamo.
25 Yake panda dokona api mende nambana lao karase?
Embakoiki ingilyamo. Isa yuu dakena namba karapunu dokopa embapako angingyuo karo.
26 Nambana suu pingipi dee yongope poraya nara ramo dokopa
Anatu doko nambana porainya renge ingilyamo.
Anatu nambapa kararamo dokopa namba sikya pirasa pira.
Mendeme yangyuo yano piramo kararonde daalamo.

27 Kinyi, enda akalipi emba yaki nyeraminyi dupwa kumuo parami ingyaramopa
lapome embapa mondo lao au pyuo kara naraminyi dupwa embamekokwa sinyi nembo karare.
28 Dopa pyuo karena lao namba range doko Anatu embapa lungwa lungwa pyuo kararo doko keyange lao soo nyuo karo.
Kamongo Mupwa Andake Wakasa namba kyawa minyaramopa
banya yulu pilyamo dupwa polo lao kararo.
Copyright information for `KYC