Psalms 96

Anatu Baa Kiŋi Mupwa Ingyuo Karenge

Kamongo kando kenane enenge pyalapape.
Yuu muu peparaena wambu dupwame Kamongona lao kenane pyalapape.
Kamongo kando kenane pyao banya kingi ketae pyambuo karalapape.
Baame namwa kyawa lete nyiyamo waili pii keyange doko yuu peparae polo lamaiyuo karalapape.
Banya neta renge wakasa ingyuo karamo dokona lao wambu rara peparae dupwa polo lamaiyuo karalapape.
Banya yulu porai wakasa wambu peparae keta piyamo dokona lao polo lamaiyuoko karalapape.

Kamongo andake wakasa doko kamame ketaele lakandapengele ingilyamo.
Isa bange kingimi wasisi dupwa isa palyuo baa kamame ulipili ingyuo kingi minyalyuo ketae pyambwapenge ingilyamo.
Wambu yuu liti wakale dupwa kingimi wasisi bange dupwa anatuŋu lao lakandenge.
Dee Kamongo dokome yake pandape bange peparae silyamo dupwa wasiya.
Banya neta renge yulupi kingi kamame nyilyingi dokope baa keta soo awali lenge.
Banya porainya rengepe keyange rengepe banya tembole anda dokona soo simbwualyamo.

Isa wambu peparaeme Kamongo lakandalapa.
Banya porainya rengepe neta renge yulupi dolapona lao suu pyao lakando karalapape.
Kamongona kingi keyange ketae palenge doko lakandalapa.
Bange Anatu mee maingi mende minyuo banya tembole anda dokona epo karalapape.
Nakama mona yapasi dokome Kamongona lenge kambusa wapambu pii pyaro piso lakandalapape.
Wambu peparaeme baa mupwa lao suu pyao walu lao pakao karalapape.

10 Kamongo doko kiŋiŋi lao wambu yuu muu ree lao peparae lamailapape.
Isa yuu dake reteyamuli pyuo porai wakasa ingyuo romo pii nao sulu soo silyamo.
Banya kote wambu pipa lara doko rolae ingyuo lara.
11 Yake yuupi dupwa rae maiyuo sinya.
Ipwa kotape ipwa kotana bange ama rara wakale wakale silyamo dupwape poro paro lena.
Imwa kuki dupwana isa karenge dupwame rae maiyuo karo pii poraiyuo larami. (96:12)

12 Ee yuupi dupwana bange silyamo dupwape rae maiyuo sinya.
Kamongo isa yuu dakena kiŋi ingyuo isala epara dokopa
13 imwa kuki dupwana isa karenge dupwame rae maiyuo karo pii poraiyuo larami.
Baame isa wambu dupwa iso karo rolae dokona palyuo yapalya yapana pira.
Copyright information for `KYC