Revelation of John 19

Yuu Bapilone Kwao Peyamo Dokona Wambu Peparae Rae Maiyami

Enakana yake dokona piso pii ketae lao wambu ama malumi pii larami dopale leyaminyi siyu doko, Lete wai pyao nyingi yulupi yanga paupau lenge dokope porainya rengepe namwana Anatu baa keta palenge. Dokona banya kingi lakandalapape leya. Pasendiya enda baa yuu muu dupwana papyuo kwuanyi nembeyamo dokona baa kote ama rolae lenge dokome randa andake kapa mailyamo. Enda baa randa mailyamo doko Anatunya kendemande akali dupwa pyao kumakaya dokona yano nyilyamo. Dee kamba pii porakai lapala, Anatunya kingi doko lakandamana. Yuu taone ama andake doko rapyamo dokona sukwa doko pyuo pao karalu karara leya. Dokopa alemo akalisa lama ipisu kisimape dee lee renge bange kisimape Anatu banya kiŋinya petenge isa dokona peteyamo dokona mona kando banya kingi ketae pyambuo lao, Kinyi banya kingi lakandamana leyami.

Sipisipi Ikyaneme Enda Yapo Nyiyamo Nenge Andake Neyami Doko

Kiŋinya petenge isa dokona piso pii mende lao epeya. Banya kendemande akali koo epengepe Anatu angi lao suu pyao karaminyi dupwame banya kingi lakandalapape leya. Enakana pii mende wambu malu wakasame ipwa jerae pyao malyili laope dee yuu gala lao rali pili lao lao epeyamo siyunu dokona lao, Namwana Kamongo Anatu Porai Wakasa doko baa kiŋi ingyuo karamo dokona lakando karamana leya. Namwa mona seramopa raeme kumuo karamanale. Baa ama andake ingyuo karamo dokona lakandamana. Sipisipi Ikyanena enda nyuo pakaramo gii doko pyaka sepelyamo. (Sipisipi Ikyanena enda doko Elyambu Pingi dokonasa letamo.) Enda baa komau karo pisi nange kyewao lasi Anatu maiyamopa wapwaro petamo. (Komau doko Anatunya wambu yulu rolae pingi dupwana makande pyuo pupyasa pilyamo leya.)

Dokopa aŋala dokome namba langyuo, Pii dake pepa pyao retape leya. Sipisipi Ikyane enda nyeramo dokopa nenge andake narami dokona epena lara dupwa rae maiyuo parami leya. Lapala aŋala dokome pii konda pyuo lao, Pii dusipa Anatunya kambunya potemo epelyamo leya. 10 Leyamopa namba banya kimbu siyamo dokona pao palipala baa lakandalana piyunu dokopa, Dopa pii napipi kae leya. Namba embape dee embena yangonge dupwapeme Yesunya lao karaminyi kendemande dopaleko karoŋo. Emba Anatu iki lakandape leya.

Yesumi pii renge kinyi rolae lenge doko poropeta dupwame lenge apo dokonako lao epeya.

Mena Ose Kakepamendena Akalinde Peteya

11 Enakana yake kata lumbuyamo kandeyono dokopa mena ose kakepamende kareya. Mena dokona mendeme banya kingi doko Kaeya Nao Rolae Pyuo Karalu Karenge lengende peteya. Baame kote lalanape dee yanda pinyape dokopa rolae dokona palyuo pyuo karenge leyami. 12 Banya lenge doko isare uliyapu nyili lao rengende banya kyawa dokona kiŋinya kyawa rarange malu dupwa piya. Banya kingi pyasi paleyamopape mendeme yaka lao kandarami ingya nayamopa baa iki siya. 13 Komau londe baa piso kareyamo doko ranjama yuu siyapya. Banya kingi doko Anatunya Piiŋi lenge. 14 Yake pandana ami dupwa komau kyewao lenge dupwa pipala ose kakepame dupwana piso baa peyamuli pyuo peyami. 15 Wua gela nao mama nyingi londende akali banya kambu dokona epeya dokome rara peparae pyao nyuo isa palyara ingiya. Baame kapa ane pangali porai mende nyepala dokome rara dupwa iso karara ingiya. Baa Anatu Ama Porai dokona imbu singi doko makande minyuo waene kalyuo pyarakwuaramo dokopa waene ipwange poro lao neta epara. 16 Banya komau londepe dee kimbupi dolapona pepa pyasi paleyamo doko, Baa kiŋinyako Kiŋi mupwa dee kamongonako Kamongo mupwa doko lao paleya.

17 Enakana kandeyono dokopa aŋalande neta reyamo dokona roya kareya. Dokome yaka peparae ketae bii lao kareyami dupwa lamaiyuo kyakale poraiyuo lao, Nakama Anatunya nenge andake rapa rapa pilyamo dokona epo kapalapape leya. 18 Wambu pyasi seramopa kiŋipi yanda singi mupwa mee yanda singipi mena ose dee akali piso paenge dupwape koo epengepe puu maisi dee mee karengepe wambu dupwana yanenge dupwa nala ipupwape leya.

19 Enakana kandeyono dokopa mena koo dokope isa wambunya kiŋi dupwape nakamana yanda singi dupwa nyuo mendakyapala akalinde osena peteyamo doko banya ami pipa kando yanda pimwaiyami. 20 Dopa pipala mena koo doko banya poropeta angi daandepa pipu lao kemali pyuo role pyao papingi dolapo nyuo puu maiyami. (Poropeta dokomeyoko wamba yulu andake pyuo wambu malu minyoko piyamo kata dokona ingyuo mena koona make nakamana enamba dokona paleyamopa bange mena koo baa dopale kingimi wasapala kingi lao kareyami.) Nakamba kando yanda pimwaiyuo pipala mena koo doko banya kyambo lenge poropeta akali dokope isare rao lulya kaso karenge andake dokona kupinyi pyambuyami. 21 Akali osena peteya dokona banya nenge katana wua gela epeya dokome nakambana ami pyao pyalingi nyiya. Dokopa yaka peparaeme epo nakamana minju dupwa napala sikya piyamopa peyami.

Copyright information for `KYC