1 Corinthians 10

Isaleli vaya'aife'mo, ehetapiye, huno hapa pai'niya gemae

Konaga'nimogitapae, hu'na, Muki laginago vaya'mogimo Mosese'a akame hu'a u'naya kavafe'mo lapakesamo afisayafe'mo nahau'niye. Muki vaya'amogi hiya'mo uneno nehiya hiya'mo afe'alumelaga mai'ne'a akame hu'a u'nae. Akame hu'a u'nageno ani'mo'a folagapi'mo aino akaka vae'nigeno mopamo hau hu'nige'a u'nae. Goti'a hiyapi'e anipi'e'mo Mosesetefe'mo faleno apate'nige'apae'mo Mosese'a akame hu'a u'nae. Muki vaya'amogimo magoke agufa ne'ya'mo Goti Auneme'amo'mo alino apami'niya ne'ya'mo ali'a ne'nae. Ani kava hu'a magoke agufa ani'mo Goti Auneme'amo'mo alino apami'niya ani'mo magokepi ne'nae. Apakaemo Goti Auneme'amo'mo alino apami'niya ani'mo apakae'e'mo magokepi lokaeno u'niya yafapati'mo emine'niya ani'mo neme neme u'nae. Ani yafa'mo Kalaisi'a mai'niye. U'naya'monanafa Goti'a aise vaya'aife'mo amuse huno apateteno muki asole vaya'aife'mo amuse huno o'apateno ka'me kotegamo ago apamagi'nige'apae'mo apaote apaote hu'a apakufa'amo fali'a kasalime u'nae.

Ani kava'mo alino lave lisiya aune kava'mo hane'niye. Apakaemo hosu kavafe'mo hapa'ye hu'niya kava huta lagae'e'mo laha'ye osisiyafe'mo mani gemo hu'niye. Apakaemo aigofe goti'apimofe'mo mono hu'naya agufa kava'mo osiyo. Goti mukufi gemo'mo ani hosu kavafe'mo,Vaya'mogimo ne'ya'mo nege ani'mo nege hisayafe'mo mai'ne'apae'mo apaiyamo omo hagesayafe'mo he ti'nae, huno hu'niye. Apakaepati'mo mago'amogimo kumai kava'mo hu'nageno'ae'mo magoke afina'mo 23 tauseni'a vaya'mo ago apamagi'nige'a fali'nae. Ani agufa kava'mo lagae'e'mo afa'a osigetao. Apakaepati'mo mago'amogimo Ala kava nefe'mo apakesa afi'a fatago osu'naya'mofe'mo amalageka hu'nageno'ae'mo nagalo'yave anaga'mogimo hapae'nage'a fali'nae. Mani agufa kava'mo huta lagae'e'mo Ala kava ne'mo afa'a amalageka osigetao. 10 Apakaepati'mo mago'amogimo alagepa hu'a o'mai'naya'mofe'mo hagalu hagalu hu'a ge ne'nageno'ae'mo vaya'mo ne'apamagiya enisole vekamo'a emineno apamagi'niye. 11 Apakaetegamo afole ai'niya kava'mo'a alino lave lisiya aune kava'mo hane'niya'mofe'mo lagaefe'mo ehetapiye, huno nehiye. Hemenimo ma mopamo ago hano hugefe'mo nehiya afina'mo mai'none. 12 Mai'nona'mofe'mo lapakaemo lokiya vaita he tita mai'none, hutapa lapakesamo ne'afisayana asagauta aigayanagi ehetapiye. 13 Lapakaetegamo aeto aeto agufa lapamalageka hisaya kava'mo'a muki vaya'aitegamo apamalageka nehiya kavake'mo ago afole ai'niye. Goti'a huguve, huno nehiya kava'mo alagi nehiya vekamo mai'niya'mofe'mo lapamalageka hisiya kava'mo'a aeno lapakasesiya ka'mo afa'a valino o'ategaiye. Lapamalageka hisigetapae'mo asagauta o'aitapa he titapa maisayafe'mo faita kasalo paesaya ka'mo afa'a valino lapategaiye.

Ala kava ne'mo ne'ya'e hosu apaune vaya'ai ne'ya'e'mo o'nesuna kava'mo hane'niye, huno hu'niya gemae

14 Nahau nayamopafi'mo nahau'niya vaya'mogitapae, ani kavatefe'mo aigofe goti'apimogife'mo mono nehaya kavategati'mo ataletapa lapaune heyo. 15 Afi'naya vaya'aife'mo hapa nepauva agufa gemo hu'na lapa pai'nae'mo ge'nimo afitetapa lapakaitapige'mo alita fako hutapa lapakesamo afiyo. 16 Lagaemo Ala kava ne'mo ne'ya'mo nesunafe'mo aote kapumo ali'neta Gotife'mo hao ke heta nunumu nehune. Mani kapufi ani'mo Kalaisi kola'amo alita ne'netae'mo afalu afalugana huta ne'none. Ani kava huta peleti mayamo akaya heta ne'netae'mo Kalaisi agufa'amo ne'none. 17 Magoke peleti mayamo hane'niya kava huta muki'amogita magoke vaya'mo mai'none. Magoke peleti mayafati'mo ne'nona'mofe'mo magoke vaya'mo mai'none.

18 Isaleli nofi vaya'aife'mo lapakesamo afiyo. Sipisipi afumo he'a hi'yalamute'mo male'naya afumo ame'amo ali'a ne'naya vaya'mogimo hi'yalamute'mo hane'niya gotife'mo mono nehae. 19 Ge'nimo aepa'amo na agufa gemo hisuve. Malaga vaya'aife'mo nehuvana aigofe goti'apimogimo ne'apamiya ofalinimo lama ge ya'mo hane'niye hu'na nehufi aigofe goti'apimogimo lama ge ya'mo hane'niye, hu'na nehuve. 20 Ha'ao, afa'a nosuva'monanafa malaga vaya'mogi ofalinimo ali'a Goti'mo no'amifa hosu apaune vaya'mo ali'a ne'apamiye. Lapakaemo mani ofalinimo ame'amo alita netetapae'mo hosu apaune vaya'e'mo magokepi lokaetapa maisayafe'mo o'nahau'niye. 21 Lapakaemo Ala kava ne'mo kapufati ani'e hosu apaune vaya'ai kapufati ani'e'mo afa'a o'nesaya kava'mo hane'niye. Ala kava ne'mo hi'yalamuteti'e hosu apaune vaya'ai hi'yalamuteti'e'mo afa'a o'nesaya kava'mo hane'niye. 22 Lagaefe'mo Ala kava ne'mo'a aipamo leno latesiyafe'mo alita he tita atesunafe'mo nehupiye. Lagae lokiyatimo'a Ala kava ne'mo lokiya'amo aeno agasesifiye.

23 Lapakaemo, muki agufa kava'mo afa'a hisuna kava'age'mo hane'niye, hutapa nehaya'monanafa muki ani hisaya kava'amo'mo alagi laha o'maesiya kava'age'mo hane'niye, hu'na nehuve. Muki kava'amo afa'a hisuna kava'age'mo hane'niye, hutapa nehaya'monanafa ani kava'mo hisuna kava'mo'a lokiya vaino olategaiye. 24 Muki'amogitapamo lapakaitapige'mo alagepa hutapa maisayafeke'mo lapa'ye nehisigetapa kahauya osutapa muki vaya'amo alagepa hu'a maisayafe'mo lapa'ye nehinagetapa kahauya hiyo.

25 Situvapati'mo ame'amo fiku miya faitetapae'mo yu'ilaga vekatapilefe'mo maketi hu male'nisaya vaya'aife'mo, haiyategati'mo alinita e'nae, hutapa apafi oketapa fiku afa'a alitapa neyo. 26 Ma mopa'e muki ma mopafi'mo hane'niya ya'e'mo Ala kava ne'mo ya'age'mo hane'niye. 27 Mago apakesa afi'a fatago osu'nisaya vaya'mogimo ge hu'apae'mo, etapa ne'ya'mo alita neyo, hu'a ge hisagetapae'mo utapa nesayafe'mo lapau'nisiyana afa'a utapa lapamisaya ne'ya'mo alita neyo. Yu'ilaga vekatapie'mo lapakesamo afitapae'mo haiyategati'mo alini'a e'nae, hutapa lapakesamo o'afitapa fiku alita neyo. 28 Fiku alita negaya'monanafa mago vekamo'a, mani ame'amo ofalini ame'a hane'niye, huno lapa paisiya ame'amo alitapa o'neyo. Agaefe'mo lapakesamo afige agupi mafa'nelefe'mo lapakesamo afige hutetapae'mo o'neyo.Ma mopa'e muki ma mopafi'mo hane'niya ya'e'mo Ala kava ne'mo ya'age'mo hane'niye. 29 Yu'ilaga vekatapie'mo osu'nofa yu'ilaga veka'alefe'mo nehuve. Mani gemo huva'monanafa lapakaemo, na kava hige'apae'mo mani agufa apakesamo ne'afiya'mofe'mo mani ne'ya'mo afa'a o'negaune. 30 Ne'ya'mo ali'netae'mo Gotifeke'mo hao ke heteta nesunana na kava hige'apae'mo hosu kava'mo hu'nae, hu'a hugae, hutapa naha paigae.

31 Inagi lapakaemo muki kava'mo hisaya afina'mo ne'ya'mo nege ani'mo nege nehutapae'mo Goti agi'aleke'mo alita asaga hisayafeke'mo muki kava'mo hiyo. 32 Yu nofi vayanagi Yu nofi vayapati'mo o'mai'naya vayanagi siosi vaya'mogi huno vai lamino hapaesige'a hosu kavapi'mo asagau'a o'aisayafe'mo lapakesamo afitetapa apaulagale'mo alagepa kava'age'mo hiyo. 33 Nehuva kava'mo nage'netapae'mo ani kava'mo hiyo. Muki vaya'mo hapa maesuvafe'mo muki kava'amo nehuve. Alagepa hu'na maisuvafe'mo nagesamo no'afufa Goti'a apakufamo alino katino apatesige'a alagepa hu'a maisayafeke'mo nagesamo Ne'afuve.

Copyright information for `KYG