1 Corinthians 15

Kalaisi'a fali'niyateti'mo ago he ti'niya kavafe'mo ava gemo hu'niya gemae

Konaga'nimogitapae, hu'na, Nagaemo Kalaisife'mo alagepa faigoko ge'amo ae'na hakalo hu'na lapa pai'nogetapa alita lapaipafi'mo male'nayanagetapae'mo ani gele'mo he titapa ne'maiye. Ani gelefe'mo mago'e hutapa lapakesamo afitapa ho hisayafe'mo lapa paigesuve. Lapa pai'nova gemo o'ataletapa atafauta alagi hutapa ne'maisayana Goti'a Kalaisife'mo alagepa faigoko ge'aleti'mo lapakufamo alino katino lapate'niye. Atale'nisayana fiku'age'mo lapakesa afita fatago hu'nae.

Goti'a mani gemo alino nami'nige'na ali'na lapami'nova gemo hogote gemo hane'niyana Kalaisi'a hosu kavatilefe'mo fali'niye. Akeya'vilagamo Goti Mukufi'mo hu male'niya gemo'mo huno'ae'mo, faligiye, huno hu male'niya gelefe'mo fali'niye. Kanolufi'mo ki'a ate'nageno lole'e mago'e afina'mo utegeno'ae'mo ago alino he tino ate'niye. Goti mukufi gemo'mo ani kavafe'mo hu'niye. He tino'ae'mo Pita aulagale'mo afole aiteno tuolofu'a apa vaya'ai apaulagale'e'mo afole ai'niye. Afole aiteno'ae'mo faefu hataleti konaga'amogi ago aeno agaseno mago'e konaga vaya'e'mo magokepi lokae'a mai'naya konaga vaya'ai apaulagale'e'mo afole ai'niye. Ani vayapati'mo asole vaya'mo hemenimo afa'a mai'naya'monanafa mago vaya'amo ago fali'nae. Afole aiteno'ae'mo Yemisi aulagale'e'mo afole aiteno muki apa vaya'ai apaulagale'e'mo afole ai'niye.

Henaga'amo nagae naulagale'e'mo afole aino alagi hano hu'niye. Aise afina'mo aipagu'e'mo maiteno malage huno alino ne'ateya mafa'negana hu'na mai'nogeno'ae'mo naulagale'mo afole ai'niye. Muki apa vaya'amogimo ae'a nagase'nage'na nagaemo henaga apa vekamo mai'nove. Nagaemo Goti siosi vaya'ae'mo naini hu'na apate'nova'mofe'mo Goti apa veka'amo mai'niye, hu'a nagi aesaya kavafe'mo, ina agufa vekamo mai'nove, hu'na nagesamo ne'afuve. 10 Ne'afuva'monanafa Goti'a fiku naha maeno nami'nige'nae'mo Goti apa veka'amo hamale'nove. Ani fiku naha maeno nami'niya himamu'amo'mo afa'a ohane'niya'monanafa naipafi'mo lokiya ali'ya'mo ali'nige'na ali'ya'mo alite'nae'mo muki apa vaya'mo ago ae'na apakase'nove. Nagai'nimo o'ali'nova'monanafa Goti'a fiku naha maeno nami'niya himamu'amo'mo nagae'e'mo magokepi lokaeno ali'ya'mo ali'nige'na ali'ya'amo ali'nove. 11 Nagae'e apakae'e'mo magoke agufa gemo aeta hakalo huta hapa nepaune. Mani magoke agufa gemo afitetapaeke'mo lapakesa afita fatago hu'nae.

Fali'naya vaya'mo he tigae, huno hu'niya gemae

12 Lagaemo, Kalaisi'a fali'niyateti'mo ago alino he tino ate'niye, huta aeta hakalo huta lapa nepauna'mofe'mo na kava higetapa mago vaya'amogitapa, fali'naya vaya'mo he otigae, hutapa nehae. 13 Fali'naya vaya'mo he otigaesinana Kalaisi'a alino he tino o'ate'niyesine. 14 Kalaisi'a alino he tino o'ate'niyesinana aeta hakalo huta lapa nepauna ge'e lapakesa afita fatago nehaya kava'e'mo ina agufa kava'mo hane'niyesine. 15 Mago'e gemo hane'niye. Alino he tino o'ate'niyesinana lagaemo Gotife'mo, Kalaisi'a alino he tino ate'niye, huta nehuna faigoko gemo Gotife'mo aigofe faigoko gemo nehuna vaya'mo mai'nonesine. Fali'naya vaya'mo henaga'amo alino he tino o'apategaiyesinana Kalaisi'a alino he tino o'ate'nisigeta lagaemo aigofe vaya'mo mai'nonesine. 16 Fali'naya vaya'mo henaga'amo alino he tino o'apategaiyesinana Kalaisi'a alino he tino o'ate'niyesine. 17 Kalaisi'a alino he tino o'ate'niyesinana lapakesa afita fatago nehaya kava'mo ina agufa kava'mo hane'nisigeno ali'ya'mo o'alisigetapa hosu kavatapifike'mo ne'maiyesine. 18 Ani kava hu'a Kalaisipi'mo mai'ne'a fali'naya vaya'mo lageso hu'naesine. 19 Lagaemo, he tigune, huta agava mai'netae'mo lavayagunagu huta ne'maune. Falisuna afinafe'mo lavayagunagu nehuna kavatimo hano hiyesinana vaya'mogimo mago alagepa hu'a no'maiya vaya'aife'mo hapau hu'a ne'apataya'monanafa lagaefe'mo mago'e hu'a hapau hu'a lataesine.

20 Ani gemo nehuva'monanafa lama gemo hane'niyana Kalaisi'a ago alino he tino ate'niye. Agaemo hoyafati'mo hogoteno le'niya ne'yakana huno he ti'niya'mofe'mo agae akamelegati'mo asole vaya'mo he tigae. 21 Magoke vekamo'a hu'niya kavateti'mo vaya'mo nefaliya kava huno magoke vekamo'a hu'niya kavateti'mo vaya'mo he tigae. 22 Muki Atamu nofi vaya'amo nefaliya kava hu'a muki Kalaisi nofi vaya'amo he tigae. 23 Kana'alefe'mo he ti'niyanage'a kana'apilefe'mo he tigae. Kalaisi'a hoyafati'mo hogoteno le'niya ne'yakana huno he ti'niyanage'a eminesiya afina'mo vaya'amo he tigae. 24 Ani afina'mo hano hisiya afina'mo afole aigiye. Kalaisi'a kame huno muki yagai'a ne'apataya vayanagi himamu vayanagi lokiya vaya'mogi huno aeno apakaseteno alino hano huno apataleteno'ae'mo muki ya'mo afo'amo Goti'a muki vaya'aite'mo yagaino apatesiyafe'mo apavaleno amigiye. 25 Kalaisi'a hemenimo yagaino apateme apateme ne'viyanageno muki kame vaya'amo alino aiyafi'mo apategaiye. 26 Kame vaya'amo alino hano huno apataleteno henaga kame kava'mo nefaluna kava'mo alino hano huno atalegaiye. 27 Goti mukufi gemo'mo huno'ae'mo,Agaemo muki yate'e vaya'aite'e'mo yagaino apatesiyafe'mo alino aiyafi'mo apate'niye, huno hu'niye. Goti'a muki ya'e vaya'e'mo alino aiyafi'mo apate'niye, huno hu'niya'monanafa Goti'a Kalaisi aiyafi'mo alino apate'niya vekamo'a agai'amo Kalaisi aiyafi'mo no'maiye, huta afi'none. 28 Muki ya'e vaya'e'mo Kalaisi aiyafi'mo hanege maige hu'a maisageno Kalaisi'a Goti aiyafi'mo maigiye. Goti'a Kalaisi aiyafi'mo muki ya'e vaya'e'mo maisayafe'mo himamu'amo alino ami'niya vekamo aiyafi'mo Kalaisi'a maigiye. Afa'a mai'nisigeno Goti'a muki vaya'aite'mo alagi hogote vekamo mai'neno yagaino apatege apatege huno maigiye.

29 Mago vaya'mo fali'naya vaya'ai apaimu'yale'mo e'a ani'mo nefalae. Fali'naya vaya'mo he otigaesinana na agufa kavatefe'mo apamagi'naya vaya'ai apaimu'yale'mo e'a ani'mo nefalae. 30 Lagae'e'mo mani agufa kava'mo nehune. Na kava higetae'mo muki afina'ae afina'ae'mo ali'ya'mo ne'aluna afina'mo lamagisaya kavatefeke'mo ali'ya'mo ne'alune. 31 Ala kava netimo Kalaisi Yesupi'mo mai'ne'nae'mo amuse hu'na nelapatove, hu'na nehuva gemo alagi lama gemo hane'niye. Konaga'nimogitapae, ani kava hu'na muki afina'ae afina'ae'mo namagisaya agufa kavategamo mai'nove, hu'na alagi lama gemo nehuve. 32 Nagaemo Efasasi taonifi'mo mai'ne'nae'mo ma mopafi vayakana hu'na afela afu'aitegamo kame hu'nova'monanafa fali'naya vaya'mo he otigaesinana naha o'mae'niyesine. Fali'naya vaya'mo he otigaesinana lagaemo,egamo afa'a faliguna'mofe'mo ne'ya'mo nege ani'mo nege nehuta fiku lamogaga aigetao, huta afa'a nehunesine.

33 Fiku yanage'a humi lapategae. Hosu vaya'e'mo magokepi lokaeta maisayana lapaipa lapakesamo ali'a atagae'a atalegae. 34 Negi nagi kava'mo osutapa alagepa hutapa lapakesamo ne'afitapa hosu kavatapimo ataleyo. Lapavagage hisiyafe'mo nagaemo, mago'amogitapamo Goti'a o'age'nae, hu'na lapa nepauve.

Saufa apakufamo alisaya kavafe'mo ava gemo hu'niya gemae

35 Mago vekamo'a, Haiya kava huno fali'naya vaya'mo alino he tino apategaiye. Haiya agufa apakufamo aligae, huno nafi gegaiye. 36 Negi vekae, hu'na, Nehakalaya avina ya'mo okasalisiya'mo'mo ohagegaiye. 37 Avina ya'mo hagesiyafe'mo yosa'a'e haita'a'e'mo nohakalaya'monanafa kile avina'mofi alu avina ya'mofi hu'a avina ya'age'mo nehakalae. 38 Goti'a alino hageno ateteno'ae'mo apamiguve, huno hu'niya ya'mo yosa'a'e haita'a'e'mo ne'apamiye. Muki alu avina ya alu avina ya'mo agai'age'mo yosa'a'e haita'a'e'mo alino ne'apamiye. 39 Muki ma mopafi mai'naya ya'mogimo magoke agufa apakufamo ohane'niyana ma mopafi mai'naya vaya'ai apakufamo magoke agufa apakufamo hanegeno afumogi apakufamo aeto agufa apakufamo hanegeno namamogi apakufamo aeto agufa apakufamo hanegeno noyamemogi apakufamo aeto agufa apakufamo hane'niye. 40 Koku'napi'mo aeto ya'mo hane'nigeno ma mopafi'mo aeto ya'mo hane'niye. Hane'niya'monanafa koku'napi'mo hane'niya konali ya'mo aeto agufa konali ya'mo hane'nigeno ma mopafi konali ya'mo aeto agufa konali ya'mo hane'niye. 41 Yegemo konali ya'amo mago aeto agufa konali ya'mo hane'nigeno kaimo konali ya'amo aeto agufa konali ya'mo hane'nigeno muki kanefi'mo konali ya'amo aeto agufa konali ya'mo hane'nigeno alu kanefi alu kanefi'mo'a aeto aeto agufa konali ya'amo hane'niye.

42 Ani kava huta he tita alisuna lagufamo aeto agufa lagufamo hanegaiye. Avina ya'mo hakalegekana hu'a nehakalaya apakufamo nekasaliye. Alino he tino apatesiya apakufamo okasaligiye. 43 Mopafi'mo nehakalaya apakufamo amuse hu'a no'apataya apakufamo hane'niye. Alino he tino apatesiya apakufamo ha le konali apakufamo hanegaiye. Nehakalaya apakufamo lokiya no'vaiya apakufamo hane'niye. Alino he tino apatesiya apakufamo lokiya apakufamo hanegaiye. 44 Nehakalaya apakufamo ma mopafi apakufamo hane'niye. Alino he tino apatesiya apakufamo koku'napi apakufamo hanegaiye. Ma mopafi apakufamo hanete koku'napi apakufamo hanete huno hane'niye. 45 Ani kavafe'mo Goti mukufi gemo'mo huno'ae'mo,Goti'a hogote vekamo Atamu'mo auneme'e vekamo alo huno ate'niye, huno hu'niye. Henaga Atamu'mo afa'a ne'maiya ya'mo alino ne'apamiya vekamo mai'niye. 46 Launelamete ya'mo hogoteno afole o'ai'niya'monanafa lagufale yake'mo hogoteno afole aitegeno'aeke'mo henaga'amo launelamete ya'mo afole ne'aiye. 47 Napa vani vekamo mopaleti'mo alo huno ate'niye. Napa tu vekamo koku'napati'mo emine'niye. 48 Ma mopafi vaya'mo mopaleti'mo alo huno ate'niya vekagana hu'a mai'nae. Koku'napi vaya'mo koku'napati'mo emine'niya vekagana hu'a mai'nae. 49 Lagaemo mopaleti'mo alo huno ate'niya vekagana huta mai'nona kava huta koku'napati'mo emine'niya vekagana huta maigune.

50 Konaga'nimogitapae, hu'na, mani ge'e'mo lapa pai'nae'mo, Ma mopafi ne'maiya apakufa'e vaya'mogimo Goti'a yagaino ne'apateya kopi'mo afa'a fale'a ohaigae. Kasalisiya apakufa'e vaya'mogimo okasalino afa'a hanege hanege huno hanesiya ya'mo alagi o'aligae. 51 Inagi afiyo, nagaemo mago fala ki'niya gemo lapa paigesuve. Muki'amogitamo ofaliguna'monanafa Goti'a muki'amo saufa lagufamo alino hamaleno latesigetae'mo saufa lagufamo aligune. 52 Henaga atupa pikulimo nehisigetae'mo malage huta magoke afina'mo lauluma nehuna agufa kava huta anonale'mo saufa lagufamo aligune. Pikulimo nehisigeno'ae'mo fali'naya vaya'mo alino he tino apatesige'a okasalisiya apakufamo alisageta afa'a ne'mauna vaya'mo saufa lagufamo alino hamaleno lategaiye. 53 Lagaemo kasalisiya lagufamo ataleta okasalisiya lagufamo aligune. Falisuna lagufamo ataleta afa'a hanege hanege huno hanesiya lagufamo aligune. 54 Kasalisiya lagufamo ataleta okasalisiya lagufamo alisuna afina'mo Goti mukufi'mo hu male'niya gemo afole aigiye. Ani gemo'mo huno'ae'mo,Ala kava ne'mo'a kame huno aeno agaseteno'ae'mo vaya'mo nefaliya kava'mo ago alino hano huno atale'niye.

55 Vaya'mo nefaliya kava'mo lokiya'amo hano hu'niye. Nefaliya kava'mo'a mago'e huno aeno apaka osegaiye,
huno hu male'niye.
56 Vaya'mo nefaliya kava'mo hosu kava'apilefe'mo vaya'mo ne'apamagiye. Goti ke'aepa ge'amo'mo ma kava hiyo ina kava osiyo, huno hu'niya gemo'a hosu kava'apimo alino lokiya vaino ne'ate. 57 Ne'ateya'monanafa Goti'a Ala kava netimo Yesu Kalaisiteti'mo laha ne'maegeta aeta ne'agasone. Gotife'mo hao ke hegetao.

58 Nahau nayamopafi'mo nahau'niya konaga'nimogitapae, ani kavatefe'mo he titapa lokiya vaita mai'netapa maita halove osiyo. Ala kava netefe'mo ali'yatapimo fiku no'aliya'monanafa alagepa kava'mo afole aigiye, hutapa ago afi'naya'mofe'mo Ala kava ne'mo ali'ya'amo o'ataleta mago'e hutapa alige alige hutapa maiyo.

Copyright information for `KYG