1 Corinthians 16

Ofalini monimo malesaya kavafe'mo hu'niya gemae

Hemenimo Yuta kotega apaote vaya'mo hapa maesiya ofalini monie'mo ge hugesuve. Galesiya kotega siosi'ale siosi'ale'mo mai'naya vaya'aife'mo, hiyo, hu'na hapa pai'nova agufa gemo hu'na hiyo, hu'na lapa nepauve. Alisaya monifati'mo hogote afina'mo sate'ae sate'ae'mo lapamete lapamete hutapa alita fako hutapa Goti'a na magi lapami'nisifi ani kava hutapa alita fako hutapa maleme maleme ne'viyo. Esugetapae'mo ofalini monie'mo kahauya hutapa alita anupa hutapa o'malesayafe'mo hemenige'mo maleme maleme utapa maiyo. Nagaemo lapakaetegamo u'na ava'yi hute'nae'mo lekana paitapa apate'nisaya vaya'mo avo kae'na apamite'na ali'na apatesuge'a ofalini monimo alini'a Yulusalemu taonifi'mo ugae. Inagi nagaegi'e'mo visuna ka'mo hanesiyana nagaegi'e'mo ugune.

Polo'a hisiya kavafe'mo ava gemo hu'niya gemae

Nagaemo Masetoniya kotegamo u'na ae'na agase'na lapakaetegamo uguve. He, hogote'na Masetoniya kotegamo u'na ae'na agase'na uguve, hu'na nagesamo ne'afuve. U'na lapakae'e'mo mago'e afina'mo maite'na visufi yasimo alino hano hutesige'nae'mo visufi hu'na afa'a o'afi'nove. Lapakaemo lapatale'na alu kotega visuva afina'mo afa'a naha maegae. Hemenimo lapakaetegamo u'na aise afina'mo maisuvafe'mo o'nahau'niye. Goti'a henaga'amo he, huno hisige'nae'mo u'na lapakae'e'mo yatala afina'mo maiguve. Mani Efasasi taonifi'mo maimale maimale huli'na ne'visugeno Petikosi afina'mo afole aitesige'nae'mo atale'na uguve. Manileti'mo asole vaya'mogi nagaefe'mo kame hu'a ne'nataya vaya'mo mai'naya'monanafa Goti'a ka'mo valino nate'niyanage'na mago'e hu'na lusi ali'ya'mo alisuva kava'mo hane'niye.

10 Ala kava ne'mo ali'ya'amo ne'aluva kava huno Timoti'a ali'ya'mo ne'aliya'mofe'mo lapakaetegamo uno ava'yi hisigetapae'mo koli hisiya agufa kava'mo osiyo. 11 Fiku yanageno mago vekamo'mo, ina agufa vekamo mai'niye, huno huteno akame'ya amigiyanagi ha maegeno'ao nagaetegamo alagepa huno eno. Agae'e mago konagatimogi'e'mo ai'a atagi ne'a esaya'ae'mo apakava ne'mauve.

12 Konagatimo'mo Apolosife'mo ava gemo hane'niye. Nagaemo agaefe'mo, konaga vayati'e'mo Kolitiyani taonifilagamo uvo, hu'na ha pai'nogeno'ae'mo hemenimo ohau'niya'monanafa ka'mo hanesiya afina'mo afa'a ugiye.

13 Kava yagaitapa maiyo. Goti vaya'amogimo apakesa afi'a fatago nehaya gelefe'mo he titapa lokiya vaitapa maiyo. Alopa vayatama vayakana hutapa lokiya vaitapa maiyo. 14 Muki kava'mo nehutapae'mo lapau lapayamopafi'mo lapaino.

15 Lapakaemo Setefanasi afamo anaga'amo ago apake'nae. Galiki kotegamo hogote'a Goti mafa'nemo hamalete'apae'mo apakai'apieke'mo apakesamo o'afi'a apaote vaya'mo hapa maesayafe'mo lusi ali'ya'mo ne'aliye. 16 Konaga'nimogitapae, lapao ke hovanagi, ani agufa vaya'ai apaiyafi'e apakae'e'mo magokepi lokae'a ali'ya'mo ne'aliya vaya'ai apaiyafi'e'mo mai'netapa apakame hiyo. 17 Lapakaemo nagaetegamo afa'a o'me'naya'mofe'mo nahau nehuge'apae'mo Setefanasi'agi Fotiyunetasi'agi Akaikasi'agi hu'a nagaetegamo e'nage'nae'mo namogaga ai'nove. 18 Naipamo ali'a falu hu'a nate'naya kava hu'a lapaipamo ali'a falu hu'a lapate'nae. Ani agufa vaya'aife'mo, alagepa vaya'mo mai'nae, hutapa hutetapa ge'apimo afiyo.

Ge apamamaeno ge hu'niya gemae

19 Mani Esiya kote siosi'ale siosi'ale'mo mai'naya vaya'mogimo ge lapamamae'nae. Akuvila'e Pilisila'e'mo no'anifi'mo ali'a anupa hu'a mono nehaya siosi vaya'mogi'e'mo mago'e hu'a ge lapamamae'nae. 20 Muki manile'mo mai'naya konagamogi'e'mo ge lapamamae'nae. Lapakaemo magoke magoke hutapa konagatapimo ge apamamaeteta hapaetapa neyo.

21 Hemenimo nagaemo Polo'namo avo'mo nekaya kayo'mo ali'ne'na, ge lapamamae'na ge hu'na avo'mo nekaove. 22 Ala kava nefe'mo hapau apayamopafi'mo nohapaiya vaya'mo Goti'a alagi apatalesige'a lageso hiyo. Ala kava netimo emikeno. 23 Ala kava ne'mo Yesu'a fiku lapa maeno lapamino. 24 Muki'amogitapae'mo Kalaisi Yesupi'mo nahau nayamopafi'mo nahau'niye.

Copyright information for `KYG