1 Corinthians 5

Siosi vekamo'a kumai kava'mo hu'niya kavafe'mo hu'niya gemae

Mago vaya'mogimo lapakaepati'mo kumai kavafe'mo faigoko gemo nagaetegamo huli'a e'nae. Mago vekamo'a afo'amo a'mo ali'niye, hu'a hu'nae. Ani agufa kumai kavafe'mo ma mopafi vaya'mogi, nosuna kavane, hu'a nehae. Haiya kava higetapa lapakitapile'mo alitapa asaga hutapa nelapatae. Himu'namu kava'mo osutapa lusi kava hutapa yulagefa ne'aitapa ani vekamo alita hafaita malaga atalesaya kava'mo hane'niye. Lapakae'e'mo lokae'na o'mai'nova'monanafa naune'name'amo'mo lapakae'e'mo magokepi lokaeno mai'nige'na lapakae'e'mo magokepi lokae'na mai'negekana hu'na Ala kava ne'mo Yesu Kalaisi agi'aleti'mo hosu kava'alefe'mo ali'na fako hu'na ne'atove. Alita anupa hutapa mai'nisage'nae'mo naune'name'amo lapakae'e'mo magokepi lokaeno mai'nisigetapa Ala kava ne'mo Yesu Kalaisi himamu'aleti'mo ani vekamo alitapa Satani ayapi'mo ateyo. Satani'a kayo'mo amisigeno'ae'mo agufamo'mo hau'niya kava'amo hano hisigeno Ala kava ne'mo Yesu afina'mo Goti'a ani vekamo auneme'amo alino katino atesiyafe'mo alitapa Satani ayapi'mo ateyo.

Lapakitapile'mo alita asaga hutapa nelapataya kava'mo alagi alagepa kava'mo nosae. Peleti maya falaovafi'mo aise ya'atomo ali'a atageno uneno huno muki falaovamo alino ko sino ne'ate, hutapa o'afi'nafiye. Hosu kava'mo'a alino ko sino ne'ateya agufa yakana huno hane'niyanagi alita ataletetapa saufa peleti mayamo ko nosiya peleti mayagana hutapa mai'netapa lapaote maiyo. Lapaote vaya'mo mai'naya'mofe'mae. Kalaisi'a hopa afina'mo Pasova sipisipitigana huno mai'neno'ae'mo ofalini kavatefe'mo agai'a agufa'amo lagaetefe'mo Goti'mo ami'niya'mofe'mo hosu kavatapimo alitapa ataleyo. Hopa afina kava'mo hisunafe'mo hosu kava'mo osuge hanageke ya'mo alita o'apamige huteta ani kava huta atafa peleti mayamo alino ko sino ne'ateya peleti mayamo alita atalegetao. Yaveyave laipamo ali'neta lama gemo huteta ani kava huta ko nosiya peleti mayamo alita hopa afina kava'mo higetao. Hogote'na avo kae'na lapami'nae'mo, kumai kava'mo nehisaya vaya'e'mo magokepi lokaetapa o'maiyo, hu'na avo'mo ago kae'na lapami'nove. 10 Nagaemo ma mopafi vaya'aife'mo nagesamo o'afi'nofa siosi vaya'aifeke'mo nagesamo afite'na ani avo'mo kae'nove. Ma mopafi vayapati'mo kumai kava'mo nehaya vayanagi mago'e ya'mo alisayafe'mo hapa'ye nehiya vayanagi kumaya ne'aliya vayanagi aigofe goti'apimogife'mo mono nehaya vayanagi hu'a mai'naya'mofe'mo apakae'e'mo magokepi lokaeta o'maita laote maisuna ka'mo ohane'niye. 11 Hemenimo avo'mo kae'nae'mo, Kalisitini konagamo mai'none, hu'a nehaya vaya'mogi kumai kava'mo nehafi hapa'ye nehifi aigofe goti'apimogife'mo mono nehafi hu'a faipa hu'a ne'apatafi ani'mo nete'a negi nagi kava'mo nehafi koli ya'mo ali'a ne'apami'a kumaya ne'alifi hu'a ne'maiya vaya'e'mo magokepi lokaetapa o'maiyo. Ani agufa vaya'e'mo magokepi lokaeta mai'netapa ne'ya'mo o'neyo.

12 Malaga vaya'mo ali'na fako hu'na apatesuva agufa ali'ya'nimo ohane'niye. Goti'a alino fako huno apategaiya'monanafa lapakaemo lapakaitapimo siosifi'mo ne'maiya vaya'mo alita fako hutapa apatesaya kava'mo hane'niya'mofe'moLapakaemo ani hosu vekamo alita malaga hafaitapa ataleyo.

Copyright information for `KYG