1 Corinthians 6

Goti mafa'nemogimo konaga'apimogi agoti hu'a ne'apataya kavafe'mo hu'niya gemae

Lapakaepati'mo mago'amogi ge vaite'apae'mo konaga'apimogi agoti hu'a ne'apatae. Haiya kava hutapa lapavagage osigetapa Goti apaote vaya'alegamo apavalelita o'utapa malaga vaya'mo fatago hu'a no'maiya vaya'ai agotile'mo apavalelitapa ne'vae. Goti apaote vaya'amogimo muki ma mopafi vaya'mo agoti hu'a apategae, hutapa o'afi'nafiye. Lapakaemo muki ma mopafi vaya'mo agoti hutapa apategaya'mofe'mo aise kava'mo afa'a alita fako osugafiye. Lagaemo enisole vaya'mo agoti huta apategaune, hutapa o'afi'nafiye. Ani kava huguna'mofe'mo ma mopafi kava'mo mago'e huta afa'a alita fako hugune. Huguna'mofe'mo ma mopafi kavatefe'mo agoti hutapa apatesayafe'mo hutapae'mo na kava higetapa malaga vaya'mo siosifi'mo apaki ohane'niya vaya'mogi agoti gemo ne'afiyategamo apavalelitapa ne'vae. Lapakaepati'mo magoke vekamo ageteno afi'niya vekamo'mo konagatapimo kava'amo afa'a alino fako huno atesiya vekamo o'mai'nifiye. Lapavagage hino. Vaehae, lapakaemo afa'a alita api aita no'apataya'monanafa apakesa afi'a fatago nosaya vaya'aitegamo apavalelitapa ne'vae.

Lapakaitapimo agoti hutapa nelapataya'mofe'mo agotimo aeta ne'agasesafi no'agasesafigeno Satani'mo ago aeno lapakase'niye. Lapakaetegamo hosu kava nehisagetapae'mo afa'a maisayana kanale hugiye. Lapakae ya'mo kumaya'mo ne'alisagetapa afa'a maisayana kanale hugiye. Kanale hugiya'monanafa agoti hutapa ne'apataya'mofe'mo konagatapimogitegamo hosu kava'mo nehae. Lapakaemo lapakaitapi konagatapimogi ya'mo kumaya'mo ne'aliye. Hosu kava'mo nehaya vaya'mogimo Goti'a yagaino ne'apateya kote'mo fale'a hai'a o'maigae, hutapa o'afi'nafiye. Lapakaitapie'mo humi olapateyo. Kumai kava'mo nehaya vaya'mofi aigofe goti'apimogi apakame nehaya vaya'mofi alu vaya'ai a'nemo apayate ne'aliya vaya'mofi vemogi a'negana hu'a kumai kava'mo nehaya vaya'mofi negafo negafo hu'a magokepi lokae'a ne'maiya kava'mo'a kumai kava'mo hugekana agufa kava'mo nehaya vaya'mofi 10 kumaya'mo ne'aliya vaya'mofi hapa'ye nehiya vaya'mofi ani'mo ne'ne'a negi nagi gemo nehaya vaya'mofi hu'a faipa hu'a ne'apataya vaya'mofi koli ya'mo ali'a ne'apami'a kumaya'mo ne'aliya vaya'mogimofi hu'a Goti'a yagaino ne'apateya kote'mo fale'a hai'a o'maigae. 11 Hogotetapa mago'amogitapamo ani agufa vaya'mo mai'nae. Mai'naya'monanafa Kalaisi'a aeno kalo paeno lapate'nigeno Goti Auneme'amo'mo lapavaleno alino lapaote lapate'nigeno Goti'a Ala kava netimo Yesu Kalaisi agi'aleti'e Auneme'aleti'e'mo, naulagale'mo fatago vaya'mo mai'nae, huno lapa pai'niye.

Kumai kavafe'mo ava gemo hu'niya gemae

12 Lapakaemo, Muki kava'ae'mo afa'a hisuna kava'age'mo hane'niye, hutapa nehaya'monanafa he, lapakaemo afa'a hugaya'monanafa muki ani hisaya kava'amo'mo alagi lapa o'maesiya agufa kava'mo hane'niye. Muki kava'amo afa'a huguva'monanafa fiku yanageno hosu kava'mo'a yagaino nategaiye, hu'na nehuve. 13 Lapakaemo, Ne'ya'mo lagupamo ya'mo hane'nigeno lagupamo'mo ne'ya'mo ne'ne, hutapa nehaya'monanafa Goti'a ne'ya'e vaya'ai apakupa'e'mo alagi alino hano huno atalegaiye. Goti'a kumai kava'mo hisunafe'mo lagufamo alo huno olate'nifa Ala kava netefeke'mo alo huno lateteno Ala kava ne'mo'a lagufale'mo yagaino latesiyafe'mo alo huno late'niye. 14 Goti'a Ala kava ne'mo alino he tino ate'niya kava huno himamu'aleti'mo lagae'e'mo alino he tino lategaiye.

15 Lapakufamo Kalaisi agufafi alu ya alu ya'amo hane'niye, hutapa o'afi'nafiye. Hane'niya'mofe'mo Kalaisi agufafi hane'niya ya'amo ali'na kumai a kanomo agufa'e'mo magokepi lokae'na atesufiye. Ha'ao, alagi atalegeno hano hino. 16 Mago vekamo'a kumai a kano'e'mo magokepi lokaeno havaesiya'mo'mo magoke anakufage'mo alino hamalegaiye, hutapa o'afi'nafiye. Ani kavatefe'mo Goti mukufi gemo'mo huno'ae'mo,lole kanola'moganimo magoke anakufage'mo alino hamalegaiye, huno hu'niye. 17 Hu'niya'monanafa vaya'mogimo e'a Ala kava ne'e'mo magokepi lokae'a maisaya'mo'mo agae'e'mo magoke anaune'aname'mo alino hamalegaiye.

18 Kumai kava'mo hisayategati'mo ataletapa lapaune heyo. Mago alu hosu kava'amo amega apakufaleti'mo nehaya'monanafa kumai kava'mo nehaya vaya'mogimo apakai'api apakufamo alagi ali'a hosu hu'a ne'atae. 19 Lapakufamo aote Auneme'amo mono no'amo hane'niye, hutapa o'afi'nafiye. Goti'a Auneme'amo ago alino lapami'nigeno lapaipafi'mo ne'maiye. Lapakufamo lapakaitapi ya'mo ohane'nifa Goti'a ago miya faino lapate'nigeno agai'a ya'mo hane'niya'mofe'mo lapakufaleti'mo Goti agi'aleke'mo alita asaga hutapa ateyo.

Copyright information for `KYG