1 John 2

Aise mafa'ne'nimogitapae, lapakaemo hosu kava'mo osisayafe'mo mani gemo lapakaefe'mo avo'mo nekaove. Mago vekamo'mo hosu kava'mo hisiyana laha maeno muki ya'mo Afo'amofe'mo ge huno nelateya vekamo mai'niye. Ani vekamo Yesu Kalaisi'a fatago vekamo mai'niye. Agai'amo Goti'a aipamo'mo falu huno latesiyafe'mo mai'niye. Goti'a lagaefeke'mo aipamo'mo falu huno latesiyafe'mo o'mai'nifa muki ma mopafi'mo mai'naya vaya'efe'mo Goti'a aipamo'mo falu huno apatesiyafe'mo mai'niye.

Goti'a, mani kava hiyo, ina kava osiyo, huno hu'niya ge'amo akame nehisunana ani kavateti'mo ago age'nonana Goti'a ageta aeto hu'none. Mago vekamo'a, age'na aeto hu'nove, nehuno'ae'mo Goti ke'aepa ge'amo akame nosisiyana agaemo aigofe vekamo mai'nigeno lama gemo aipafi'mo alagi nohane. Nohane'niya'monanafa muki vaya'mogi Goti ge'amo akame nehisaya vaya'mogimo Gotife'mo hapau apayamopafi'mo nehapaiya kava'apimo'mo haino hapai'niye. Ani kavateti'mo ago age'nonana agaepi'mo mai'none. Agaepi'mo alagi mai'none, hu'a nehisaya vaya'mogimo Yesu'a hu'niya agufa kava'mo akame hu'a hisaya kava'mo hane'niye.

Saufa ke'aepa gee'mo ava gemo hu'niya gemae

Nagana'nimogitapae, nagaemo saufa ke'aepa gemo lapakaefe'mo avo'mo nokaofa atafa ke'aepa gemo akeya'vilaga aepa faitapa afi'naya afinateti'mo ali'naya gemo lapakaefe'mo avo'mo nekaove. Lapakaemo mani atafa ke'aepa gemo'a aepa fai'naya afinateti'mo afime afime etapa afita mai'nae. Afitapa mai'naya'monanafa hemenimo saufa ke'aepa gemo lapakaefe'mo avo'mo nekaove. Mani ke'aepa gemo'a agaepi'mo hane'nigeno'ae'mo lapakaepi'e'mo hane'niye. Hani hu'niya kava'mo hano hugefe'mo nehigeno'ae'mo ha le ya'mo'a aeno ha neleya'mofe'mae. Mago vekamo'a, ha le yategamo ne'mauve, huno huteno konaga'ae'mo hau ayamopafi'mo ohau'nisigeno aini huno ne'atesiyana hanipi'mo maime maime ne'e. 10 Konaga'ae'mo hau ayamopafi'mo nehaiya vekamo'a ha le yategamo alagi mai'nigeno'ae'mo aipafi'mo alino ago'ya faino atalesiya agufa kava'mo alagi nohane. 11 Nohane'niya'monanafa konaga'ae'mo hau ayamopafi'mo ohau'nigeno aini huno ne'atesiya vekamo'a hanipi'mo mai'neno hanipi'mo umenitata nehuno'ae'mo, haiya kate'mo ne'ufi, huno no'age. Hani ya'mo'a aulagafi'mo aino ati kae'niya'mofe'mo ka'mo no'age.

Ma mopafi yafe'mo olapaino, huno hu'niya gemae

12 Aise mafa'ne'nimogitapae, Goti'a Kalaisi agi'aleti'mo hosu kavatapimo ago alino atale'niya'mofe'mo lapakaefe'mo mani avo'mo nekaove. 13 Vayatama vaya'mogitapae, lapakaemo aepa fai'niya afinateti'mo mai'niya vekamo ago age'naya'mofe'mo lapakaefe'mo mani avo'mo nekaove. Neya vaya'mogitapae, lapakaemo hosu vekamo aetapa agase'naya'mofe'mo lapakaefe'mo mani avo'mo nekaove. Saufa mafa'ne'nimogitapae, lapakaemo muki ya'mo Afo'amo'mo ago agetapa aeto hu'naya'mofe'mo lapakaefe'mo avo'mo nekaove. 14 Vayatama vaya'mogitapae, lapakaemo akeya'vilaga aepa fai'niya afinateti'mo mai'niya vekamo ago age'naya'mofe'mo lapakaefe'mo mani avo'mo kae'nove. Neya vaya'mogitapae, Lokiya vaitapa mai'nageno'ae'mo Goti ge'amo lapaipafi'mo alagi hane'nigetapae'mo hosu vekamo aetapa agase'naya'mofe'mo lapakaefe'mo mani avo'mo kae'nove. 15 Lapakaemo ma mopafi kavafe'mofi ma mopafi yafe'mofi huno olapaino. Ma mopafi kavafe'mo nehapaiya vaya'mogimo Afotimo Gotife'mo hapau apayamopafi'mo nohapaiye. 16 Muki ma mopafi kava'mo hane'niyana apakufamo'mo ha'ye nehiya kava'mo hanege ne'age'apae'mo hapa'ye nehiya kava'mo hanege alite'a ala apaki ne'aliya kava'mo hanege huno hane'niye. Ani kava'mo'a Goti kava'amo ohane'nifa ma mopafi kava'mo hane'niye. 17 Ma mopafi kava'e ma mopafi kavafe'mo hapa'ye nehiya kava'e'mo ago hano hugefe'mo nehiyanageno alagi hano hugiya'monanafa Goti ge'amo akame nehaya vaya'mo maige maige hu'a maigae. 18 Saufa mafa'ne'nimogitapae, ma mopamo hano husiya afina'mo ago hogo nehiye. Lagaemo, Kalaisi kame'amo afole aigiye, huta ago lapa pai'nonagetapa afi'nae. Inagi hemenimo asole kame vaya'amo afole ai'naya'mofe'mo hano husiya afina'mo ago hogo nehiye, huta afi'none.

Kalaisi kame vaya'amo afole ai'naya gemae

19 Apakaemo ago latale'a u'naya'monanafa vayatimo o'mai'nae. Apakaemo lagaepati'mo mai'naesinana olatale'a lagae'e'mo magokepi lokae'a mai'naesine. Ani vayapati'mo mago vekamo vayatimo o'mai'niye, huta apakesunafe'mo ago latale'a u'nae. 20 Apakaemo atale'a u'naya'monanafa lapakaete aote vekamo Kalaisi'a uvelimo lakino faleno lapategekana huno Goti Auneme'amo alino lapami'nigetapa muki ge'amo afi'nae. 21 Inagi lapakaemo lama gemo o'afi'naya'mofe'mo mani avo'mo okae'nofa lapakaemo lama gemo ago afitetapae'mo aigofe gemo'mo lama gefati'mo afole no'aiye, hutapa ago afi'naya'mofe'mo lapakaefe'mo mani avo'mo kae'nove. 22 Aigofe vaya'mo ina lagimae. Yesufe'mo Kalaisi ne'mo o'mai'niye, hu'a ae'a hakalo hu'a hapa nepaiya vaya'mo aigofe vaya'mo mai'nae. Apakaemo, Yesu'a Kalaisi ne'mo o'mai'niye, hu'a huge Goti'mo Yesu afo'amo'mo o'mai'niye, hu'a huge hu'a ae'a hakalo hu'a hapa nepaiya vaya'mo Kalaisi kame vaya'amo mai'nae. 23 Muki vaya'amogi, Yesu'a Kalaisi ne'mo o'mai'niye, hu'a ae'a hakalo hu'a hapa nepaiya vaya'ai apaipafi'mo muki ya'mo Afo'amo'mo avale'a o'ate'nae. Muki vaya'amogimo, Yesu'a Kalaisi ne'mo mai'niye, hu'a ae'a hakalo hu'a hapa nepaiya vaya'ai apaipafi'mo muki ya'mo Afo'amo'e Mafa'ne'a'e'mo anavale'a anate'nage'ana ne'mai'ae.

24 Ani gemo hane'niya'mofe'mo lapakaemo hogotetapa aepa faitapa afi'naya afinateti'mo afi'naya gemo lapaipafi'mo alagi hanesiyafe'mo atafauta alagi hiyo. Aepa faitapa afi'naya afinateti'mo afi'naya gemo'a lapaipafi'mo alagi hane'nisiyana Mafa'ne'afi'e Afo'amopi'e'mo alagi maigae. 25 Kalaisi'a lapa maegauve, huno hu male'niya polomasi gemo'a huno'ae'mo, maige maige hutapa maisaya ya'mo ali'na lapamiguve, huno laha pai'niye. 26 Nagaemo humi lapategefe'mo nehaya vaya'ai apava gemo hu'na lapakaefe'mo ago avo'mo kae'nove. 27 Humi lapategefe'mo nehaya'monanafa Kalaisi'a uvelimo lakino faleno lapategekana huno Goti Aote Auneme'amo alino lapami'nigeno alagi maisiyafe'mo lapaipafi'mo alagi mai'niya'mofe'mo mago vaya'mogi ali'a lapaya malesaya agufa gemo ohane'niye. Goti Auneme'amo'mo muki ge'amo ago alino lapaya male'niya'mofe'mae. Ani gemo mago aigofe gemo ohane'nifa alagi lama gemo hane'niye. Agaemo, Kalaisipi'mo alagi maiyo, huno huteno alino lapaya male'niyanagetapa Kalaisipi'mo alagi maigae.

28 Aise mafa'ne'nimogitapae, Eminesigetae'mo lokiya vaita mai'neta uta fala okita aulagale'mo lavagage osisiyafe'mo hemenimo agaepi'mo alagi maigetao. 29 Lapakaemo Goti'a alagepa kava'ageke'mo nehiya vekae, hutapa ago afi'naya'mofe'mo agaemo alagepa kava'mo nehaya vaya'mo hogoteno alino apate'nige'a mafa'ne'amo mai'nae, hutapa ago afi'nae.

Copyright information for `KYG