1 John 5

Lagaemo ma mopafi kava'mo ago aeta agase'none, huno hu'niya gemae

Ina lagimo, Yesu'a Kalaisi ne'mo mai'niye, hu'a hute'a apakesa afi'a fatago nehafi Goti'a alino apate'nige'a mafa'ne'amo mai'nae. Muki vaya'amogimo alino apate'niya vekae'mo hapau apayamopafi'mo nehapaisiyana ani kava huno alino apate'niya mafa'ne'amogi'efe'mo hapau apayamopafi'mo nehapaiye. Lagaemo Gotife'mo lahau layamopafi'mo nelahaisigeta Goti ke'aepa ge'amo akame nehisunana ani kavateti'mo alagi age'nonana Goti mafa'ne'amogife'mo lahau layamopafi'mo nelahaiye. Gotife'mo hapau apayamopafi'mo nehapaiya kava'mo'a Goti ke'aepa ge'amo ma kava hiyo, ina kava osiyo, huno hu'niya ge'amo akame nehaya kava'mo hane'niye. Goti ke'aepa ge'amo akame hisuna kava'mo'a kana osu'niyanageta afa'a akame hisuna kava'mo hane'niye. Goti'a alino apate'niya mafa'ne'amogimo ma mopafi kava'mo ae'a ne'agasae. Lagaemo Goti Mafa'ne'ae'mo lagesa afita fatago hu'nona kavateti'mo ma mopafi kava'mo ago aeta agase'none. Ina lagimo ma mopafi kava'mo ae'a agasegae. Yesu'a Goti Mafa'ne'amo mai'niye, hu'a apakesa afi'a fatago nehaya vaya'amogige'mo afa'a ae'a agasegae.

Yesu Kalaisife'mo faigoko ge'ae'mo ava gemo hu'niya gemae

Yesu Kalaisi'a aniteti'e kola'aleti'e'mo emine'niye. Agaemo ani'alefeke'mo emi'no'me'nifa kola'ale'efe'mo emine'niye. Goti Auneme'amo'mo lama ge'age'mo nehiya vekamo mai'niya'mofe'mo ageteno ha maeno Kalaisife'mo faigoko ge'amo nehiye. Lole'e mago'e vaya'mo koku'napi'mo mai'ne'apae'mo agete'a ha mae'a faigoko ge'apimo nehae. Apakaemo Afotimo'agi Goti Ge'amae hu'a agi ne'aya vekagi Aote Auneme'agi hu'a mai'naya'monanafa magoke Goti'a mai'niye. Lole'e mago'e ya'mogimo ma mopafi'mo hane'ne'a agete'a ha mae'a faigoko ge'amo nehae. Auneme'amo'mogi ani'mo'agi kola'amo'agi hu'a magoke agufa ge'age'mo hu'a agete'a ha mae'a faigoko ge'amo nehae. Ma mopafi vaya'mogimo agete'a ha mae'a faigoko gemo ae'a hakalo nehageta afitetae'mo, alagi lama gemo nehae, huta nehuna'monanafa Goti'a ageteno ha maeno faigoko gemo aeno hakalo nehiya gemo'a ma mopafi vaya'ai ge'apimo alagi ago aeno ne'agase. Goti'a Mafa'ne'amo ageteno ha maeno faigoko gemo aeno hakalo hu'niye. 10 Mani ageteno ha maeno faigoko ge'amo Goti Mafa'ne'ae'mo apakesa afi'a fatago nehaya vaya'ai apaipafi'mo hane'niya'monanafa Goti'a lama gemo nehiye, hu'a nosaya vaya'mogimo Goti'a aigofe gemo nehiya vekamo mai'niye, hu'a nehae. Apakaemo Goti'a Mafa'ne'amo ageteno ha maeno faigoko gemo aeno hakalo hu'niya ge'ae'mo apakesa afi'a fatago osu'naya'mofe'mae. 11 Goti'a ageteno ha maeno faigoko gemo aeno hakalo huno'ae'mo, nagaemo maige maige hutapa ne'maiya ya'mo ali'na lapami'nove, huno laha pai'niye. Ani maige maige hu'a ne'maiya ya'mo mafa'ne'afi'mo mai'niye. 12 Goti Mafa'ne'amo avale'a apaipafi'mo ate'naya vaya'mo maige maige hu'a ne'maiya ya'mo ago ali'nae. Goti Mafa'ne'amo avale'a apaipafi'mo o'ate'nisaya vaya'mo maige maige hu'a ne'maiya ya'mo o'ali'nae. 13 Nagaemo mani gemo Goti Mafa'ne'amo agi'alefe'mo lapakesa afita fatago nehaya vaya'mogita hutapae'mo, maige maige huta maisuna ya'mo ali'none, hutapa afitetapa agesayafe'mo mani avo'mo kae'nove. Lapakaemo afitetapa lapakesa afita fatago hume hume visayafe'mo avo'mo kae'nove.

Afa'a maisuna ya'mo ago ali'nonanageta maige maige huta maigune, huno hu'niya gemae

14 Lagaemo Goti'a, ani kava'mo huguve, huno hu male'niya kavatefe'mo nunumu huta afi gesunageno'ae'mo getimo afa'a afiteno hugiye, huta agaefe'mo lagesa afita fatago nehune. 15 Getimo ne'afiye, huta afi'nisunana ago age'nonana na agufa yafe'mo aukaya huta ge nehisupi ago alino lami'nigeta ali'none, huta lagesamo ne'afune. 16 Mago vekamo'a konaga'amo'mo age'nigeno hosu kava'mo ofalisiya agufa hosu kava'mo hu'nisigeno ageteno'ae'mo Gotife'mo afi gesigeno'ae'mo ani konaga'amo'mo falisiya agufa hosu kava'mo osu'niya konaga'amo'mo maige maige huno maisiya ya'mo alino amigiye. Mago vekamo'a alagi falisiya agufa hosu kava'mo nehisiyana nunumu hutapa ateyo, hu'na nosuve. 17 Muki agufa alagepa osu kava'mo nehaya kava'mo'a hosu kava'mo hane'niya'monanafa mago hosu kava'mo'a alagi falisaya kavategamo alino no'apateya hosu kava'mo hane'niye.

18 Goti'a alino apate'niya mafa'ne'amogimo hosu kava'mo akame nosae. Goti'a alino apate'niya vaya'mogi apakai'apile'mo yagai'a ne'apatageno'ae'mo hosu vekamo'a alino hosu huno no'apate. 19 Lagaemo ago age'nonana Goti mafa'ne'amo mai'nona'monanafa muki ma mopafi'mo mai'naya vaya'mogimo hosu vekamo aiyafi'mo mai'nageno yagaino ne'apate. 20 Lagaemo ago age'nonana Goti Mafa'ne'amo emineno lama ge Goti'a ageta aeto hisunafe'mo lagesamo afisuna ya'mo alino lami'niye. Lagaemo lama ge vekafi'mo mai'netae'mo Mafa'ne'amo Yesu Kalaisipi'mo mai'none. Ani vekamo lama ge Goti'a mai'neno'ae'mo alagepa huta maige maige huta maisuna ya'mo aepa vekamo mai'niye. 21 Aise mafa'ne'nimogitapae, aigofe goti'apimogimo apakame osutapa maita halove huta maiyo. He, lama ge.

Copyright information for `KYG