1 Peter 1

Nagaemo Pita'namo Yesu Kalaisi apa veka'amo mai'ne'nae'mo Goti vaya'amo kalaga'mo hageta atagu faetapa uteta hutapa Ponitasi kotega maige Galesiya kotega maige Kapanosiya kotega maige Esiya kotega maige Mitiniya kotega maige hutapa mai'naya vaya'mogitapae'mo mani avo'mo nekaove. Goti'a muki ya'mo afo'amo'mo lapaketeno'ae'mo, mafa'ne'nimo maigae, huno ago lekana paino lapate'niye. Auneme'amo'mo lapakaemo Yesu Kalaisife'mo ava gemo afitetapa akame hisageno Yesu Kalaisi kola'aleti'mo aino fuli fuli huno faleno lapatesiyafe'mo lapavaleno alino lapaote vaya'amo lapate'niye.

Lusi kava huno fiku lapa maeno lapaminageno lapaipamo'mo falu hino.

Agava mai'neta lavayagunagu nehuna kavafe'mo ava gemo hu'niya gemae

Lagaemo Goti agi'ale'mo Ala kava netimo Yesu Kalaisi afo'amo agi'ale'mo alita asaga higetao. Lusi kava huno hau huno late'niya'mofe'mo Yesu Kalaisi'a fali'niyateti'mo ago alino he tino ate'niya kavateti'mo saufa vaya'mo halate alino late'niye. Lagaemo afole aisiya kavatefe'mo agava mai'netae'mo lama ge'alefe'mo lavayagunagu huta maisunafe'mo ani kava'mo hu'niye. Afo'apimogi ya'mo mafa'ne'apimogi ne'aliya kava huta Goti'a agai'a ya'mo alisunafe'mo koku'napi yate'mo yagaino nelate. Ani ya'mo alagi okasalige alino hosu osuge atafa osege huno nehaneyanageno alagepa huno hanege hanege huno afa'a hanegaiye. Goti'a himamu'aleti'mo yagaino lapatege lapakesa afita fatago nehaya kavateti'mo yagaino lapatege huno yagaino nelapateyanageno lapakufamo alagi alino katino lapategaiye. Goti'a ago alo huno male'niyanageno henaga afina'mo afole aigiye. Ani kavafe'mo lapamogaga ne'aiya'monanafa lapa maesiya hanageke ya'mo hemenimo aise afina'mo ali'nageno lapaipamo'mo kana hu'niye. Goti'a lapakesa afita fatago nehaya kavafe'mo amalageka huno agegeno'ae'mo, kanale kava'mo hane'niye, huno hisiyafe'mo hanageke ya'mo alino lapami'niye. Vaya'mogimo hano hisiya goli yafa'mo ali'a atafi'mo kae'a age nekaya kava huno Goti'a lapakesa afita fatago nehaya kava'mo'a goli yafa'mo ago aeno agase'niya kava'mogeno amalageka huno age neke. Agegeno'ae'mo kanale hu'nisigeno'ae'mo Yesu Kalaisi'a afole aisiya afina'mo ala lapakitapimo alino lapamige ha le konali ya'amo alino lapamige lapakitapile'mo alino asaga huno lapatege hisiyafe'mo amalageka huno age neke. Yesu Kalaisi'mo lapaulagafati'mo o'age'naya'monanafa agaefe'mo lapau lapayamopafi'mo nelapaiye. Hemenimo o'age'naya'monanafa agaefe'mo lapakesa afita fatago nehutapa lusi kava hutapa lapamogaga ne'aiye. Lapaipafi'mo lapamogaga ne'aiya'monanafa lapavayafati'mo ge hisayafe'mo lapavayamo'mo kana nehiye. Lapamogaga ne'aiya kava'mo'a muki ma mopafi yafe'mo apamogaga ne'aiya kava'mo ago aeno ne'agase. Lapakesa afita fatago nehaya kava'mo'a alagamo ne'aegeno Goti'a lapakupi mafa'nemo alino katino ateme ateme ne'viya'mofe'mo lapamogaga ne'aiye.

10 Akeya'vilaga vaya'mogimo Gotitegati gemo alini e'a ae'a hakalo hu'a hapa pai'naya vaya'mogi ani lapakufamo alino katino lapatesiya kavatefe'mo payamukiki hu'a kahauya huge huge hu'a mai'nae. Apakaemo apaune gemo, Goti'a fiku lapa maeno lapamigiye, hu'a hu'nae. 11 Kalaisi Auneme'amo apaipafi'mo mai'niya Auneme'amo'mo hogoteno, Kalaisi'a kanamo aliteno'ae'mo ala agi'amo aliteno ha le konali ya'amo aligiye, huno hapa pai'nige'apae'mo, hainu afina'mo afole aisifi, hu'a huge haiya kateti'mo afole aisifi, hu'a huge nehu'apae'mo age'a ava tesayafe'mo kahauya hu'a mai'nae. 12 Goti'a, lapakaitapilefe'mo ani ali'yatapimo no'alifa henaga'amo afole aisaya vaya'aitefe'mo ani ali'ya'mo ne'aliye, huno hapa pai'niye. Hemenimo apa vaya'mogita Aote Auneme'amo koku'napati'mo alino ate'nigeno emine'niya Auneme'amo himamu'aleti'mo mani alagepa faigoko ge'amo lapa nepaune. Enisole vaya'mogi'e'mo ani kava'mo aepa'amo agesayafe'mo nehapaiye.

Lapaote kava'mo hiyo, huno hu'niya gemae

13 Ani alagepa faigoko gemo afole ai'niya'mofe'mo alagepa huta afisayafe'mo lapakesamo alo nehutapa lapakufale'mo yagaita lapateyo. Yesu Kalaisi'a emineno vaya'ai apaulagale'mo afole aiteno'ae'mo fiku laha maeno lamigiye, huta ani ge'aeke'mo lapakesamo ne'afitapa agava mai'netapa lapavayagunagu hutapa maiyo. 14 Lapakaemo gemo ne'afiya mafa'negana hutapage'mo maiyo. Hogotetapa Goti ge'amo o'afita amega lapakufamo'mo hau'niya kava'mo akame hutapa mai'naya'monanafa hemenimo lapakaefe'mo keya aeno ge hu'niya vekamo alagepa aote vekamo mai'niya kava hutapa muki kava'amo nehutapae'mo alagepa lapaote vaya'mo maiyo. 16 Na agufa gemo hu'niya'mofe'mae. Goti mukufi'mo avo'mo kae male'niya gemo'mo huno'ae'mo,Alagepa naote vekamo mai'nova'mofe'mo alagepa lapaote vaya'mo maiyo, huno hu'niye. 17 Nunumu nehutapae'mo, Afotimogae, hutapa agi ne'aya vekamo'a vaya'ai amega apakufalefe'mo agesamo no'afifa muki vaya'aitegamo magoke aiyaya kavake'mo huno alagepa huno alino fako huno ne'apateya'mofe'mo ma mopafi'mo kalaga vaya'mo mai'netapae'mo koli hutapa maime maime viyo. 18 Lapakinago vaya'ai kava'mo'a alagepa huno lapa o'maesiya agufa kavake'mo hogotetapa akame hutapa mai'nae. Ani agufa kavategati'mo ago miya faino hatu maeno lapate'niya kavafe'mo ava gemo ago afi'nae. Kalaisi'a kasalisiya ya'mo siluva yafateti'mofi goli yafateti'mofi huno miya faino olapate'nifa 19 alagi hogote kanale ya'mo kola'aleti'mo miya faino hatu maeno lapate'niye. Kalaisi'a alagepa sipisipimo mago hosu ya'amo alagi ohane'niya sipisipigana huno mai'neno fali'niye. 20 Goti'a ma mopa'e koku'na'e'mo alo osu'neno'ae'mo ema akeya'vilagamo ani ali'ya'mo alisiyafe'mo Kalaisi'a ago lekana paino ateteno henaga'amo apakaetefe'mo ago alino afole aino ate'niye. 21 Lapakaemo agaeteti'mo Gotife'mo lapakesa afita fatago nehae. Agaemo fali'niyateti'mo ago alino he tino ateteno ha le konali ya'amo alino mi'nigetapae'mo Gotife'mo lapakesa afita fatago nehutapa agava mai'netapae'mo lapavayagunagu nehae.

22 Lama gemo afitetapae'mo lapaipamo sese huta atetetapa konaga vayatapie'mo lama ge huno lapau lapayamopafi'mo lapau'niya'mofe'mo lokiya kava hutapa yaveyave lapaipafati'mo lapau lapayamopafi'mo lapaino. 23 Goti'a kasalisiya avina yateti'mo halate alino olapate'nifa okasalisiya avina ya'mo auneme'e gemo hanege hanege huno hanesiya ge'aleti'mo halate alino lapate'nigetapa mafa'ne'amo mai'nae. 24 Goti mukufi gemo'a ani kavatefe'mo huno'ae'mo,

Muki vaya'ai amega apakufa'amo kahaugana huno hane'niye. Konali ya'apimo kahaumo ausegana huno hane'niye. Kahaumo leno falu netegeno'ae'mo ause'amo asagauno ne'aiya'monanafa Ala kava ne'mo ge'amo alagi hanege hanege huno hanegaiye,
huno hu'niye. Mani alagepa faigoko ge'amo ago ae'a hakalo hu'a lapa pai'nae.

Copyright information for `KYG