1 Peter 2

Ala kava ne'mo afa'a ne'maiya yafakana huno mai'niya gemae

Hu'niya'mofe'mo lapakaemo vaya'aitegamo hosu kava'mo osuge aigofe gemo osuge ala lapakitapimo alisayafe'mo amega lapakufale alagepa kava'mo osuge lapaipa kafa ohapaege huta faipa huta o'apatege hutapa maiyo. Nute mafa'nemogimo nufeke'mo lusi kava huno nehapaiye. Goti ge'amo nukana huno hane'niya'mofe'mo mani alagepa nufe'mo lapau'ninagetapa alita neyo netapa kosigayanagi. Ala kava ne'mo'a fiku laha maeno nelamiya vekamo mai'niye, hutapa alita netapa afi ge'nisaya'mo'mo nufe'mo lapa'ye hino.

Agaemo afa'a ne'maiya yafakana huno mai'nige'apae'mo afa yafa'mo hane'niye, hu'a hu'naya'monanafa Goti'a lekana paino ateteno'ae'mo, hogote kanale yafane, huno hu'nigetapae'mo ani vekalegamo ne'ae. Lapakae'e'mo afa'a ne'maiya yafakana hutapa mai'nageno'ae'mo Goti'a lapakaeteti'mo Goti Auneme'amo maisiya no'mo kime kime ne'e. Lapaote vaya'mo mai'netapa lapaipafati'mo Goti'a amuse huno lapatesiya ofalinimo Yesu Kalaisiteti'mo Goti'a amisayafe'mo mono hutapa ne'apataya vaya'mo mai'nae. Goti mukufi gemo'mo ani kavatefe'mo huno'ae'mo,

Afiyo, Nagaemo hogote kanale yafa'mo lekana pai'na atete'na no'mo kisuva yafa'mo Saiyoni kotegamo male'nove. Muki vaya'mogimo agaefe'mo apakesa afi'a fatago nehisayana alagi hapai o'vaigae,
huno hu male'niye.
Lapakesa afita fatago nehaya vaya'mogitapamo, hogote aeto agufa kumani vekae, hutapa nehaya'monanafa apakesa afi'a fatago nosaya vaya'aife'mo Goti mukufi gemo'mo huno'ae'mo,

No'mo nekiya vaya'mogi, ina agufa yafa'mo hane'niye, hu'a hute'a ali'a yaga au'a atale'naya'monanafa hogote yafa'mo no'mo faino atesiya yafa'mo alino hamaleno ate'niye,
huno hu'niye.
Mago'e huno Goti mukufi gemo'mo huno'ae'mo,

Ani yafa'mo'a apaiyafi'mo hapaege vai lamino hapaege hisiyafe'mo hane'niye,
huno hu'niye. Apakaemo Goti ge'amo no'afiya'mofe'mo vai lamino nehapae. Goti'a ani kava'mo hugae, huno hu male'niye.

Huno hu male'niya'monanafa ago lekana paino lapate'niya vaya'mo mai'nae. Lapakaemo lapaote nofi vaya'amo mai'nae. Mono hutapa ne'apataya kini vaya'amo mai'nae. Lapakaemo Goti agai'a vaya'amo mai'nae. Goti'a keya aeno ge hu'nigetapae'mo hani hu'niya kavategati'mo eta agetetapa lapau ai'naya ha le kava'alegamo mai'nae. Agaemo lapakaefe'mo keya aeno ge hu'niya vekamo'a alagepa kava'mo hu'niya kava'ae'mo ava gemo aeta hakalo hutapa hapa paisageno ala agi'amo alisiyafe'mo lekana paino lapate'niye. 10 Hogotetapa afa vaya'mo mai'naya'monanafa hemenimo Goti vaya'amo mai'nae. Hogoteno Goti'a hau huno olapate'niya'monanafa hemenimo hau huno lapate'niye.

Goti ali'ya'amo ne'aliya vaya'amo maiyo, huno hu'niya gemae

11 Nahau'niya vaya'nimogitapae, amega lapakufamo'mo hau'niya kava'mo'a lapakupi mafa'nee'mo kame huno ne'ate. Kalaga vaya'mo maige nata netapa eta maige hutapa mai'naya'mofe'mo lapao ke hovanagi, ani kavafe'mo ha'ao, nehutapa osiyo. 12 Lapakaemo ma mopafi vaya'aitegamo alagepa kavake'mo hutapa maiyo. Apakaemo lapakaefe'mo, hosu kava'mo nehae, hu'a hu'a faipa hu'a nelapatesaya vaya'mogimo alagepa kavatapimo ne'agesageno'ae'mo Goti'a apakaete'mo eno yagaino apatesiya afina'mo agi'ale'mo ali'a asaga hu'a ategae.

13 Lapakaemo Ala kava nefe'mo lapakesamo ne'afitapae'mo muki ma mopafi vaya'aife'mo yagai'a ne'apataya vaya'ai ge'apimo afiyo. Yagaino ne'apateya hogote kini vekamo ge'amo afige ali'ya'ale'mo lekana paino apate'niya vaya'ai ge'apimo afige hutapa maiyo. Kini vekamo'a apakaemo hosu vaya'aina kayo'mo apamige alagepa vaya'ai apaki'apile'mo ali'a asaga hu'a apatege hisayafe'mo alino apate'nige'a u'a ali'ya'amo ne'aliye. 15 Lapakaemo alagepa kavatapileti'mo o'afi'nisaya vaya'ai apavayale'mo kitapa halututapa apatesage'a negi nagi gemo osisayafe'mo Goti'a hau'niye. 16 Lapakaemo ke'aepa gemo afe'alumelaga o'maitapa afa vaya'mo ai'naya'mofe'mo hosu kava'mo afa'a hisaya vaya'mo o'maitapa Goti ali'ya'amo ne'aliya vaya'age'mo maiyo. 17 Muki vaya'ai apaki'apile'mo alitapa asaga hiyo. Konagatapie'mo lapaino. Gotife'mo koli hiyo. Ala kini vekamo hogote vekatapimo ala agi'amo amiyo.

Hanageke ya'mo alisayafe'mo Kalaisi aiyakamo aliyo, huno hu'niya gemae

18 Ali'ya'mo ne'aliya vaya'mogitapae, hu'na, ali'ya aepa vekae'mo koli nehutapa aiyafi'mo maiyo. Alagepa kava'mo hute'a yuna apaipamo kali'ne'a yagai'a nelapataya vaya'ai apaiyafike'mo o'maitapa hosu kava'mo hu'a yagai'a nelapataya vaya'ai apaiyafi'e'mo afa'a maiyo. 19 Mago vekamo'a hosu kava'mo osu'nisigeno hanageke ya'mo alino amisigeno'ae'mo Gotifeke'mo agesamo ne'afino'ae'mo, Gotitefe'mo afa'a aliguve, huno nehisiyana Goti'a amuse huno ategaiye. 20 Inagi lapakaemo hosu kava'mo nehisage'apae'mo lapamagisagetapae'mo, kanalene, hutapa nehisayana ala lapakitapimo aligafiye. Ha'ao o'aligaya'monanafa alagepa kava'mo nehisage'apae'mo lapakaetegamo hosu kava'mo hisayana kanalene, hutapa nehisageno'ae'mo Goti'a amuse huno lapategaiye. 21 Goti'a ani kava'mo hisayafe'mo lapakaefe'mo ago keya aeno ge hu'niye. Kalaisi'a mani agufa kava'mo hu'niya'mofe'mae. Kalaisi'a lagaetefe'mo hanageke ya'mo ali'niyanageta akame hisuna agufa kava'mo ago hu male'niya'mofe'mo aiyakamo alisuna kava'mo hane'niye.

22 Agaemo magoke hosu kava'mo osu'nige'a o'agege avayafati'mo magoke aigofe gemo osu'nige'a o'afige hu'nae.
23 Hu'a faipa hu'a ate'nageno'ae'mo ge'apile'mo aeno atagaina huno huno faipa huno o'apate'niye. Kana ya'mo amige amagige hu'nageno lusi kava huno agafu ki'nigeno'ae'mo, lapamagiguve, huno osu'niya'monanafa alagepa huno alino fako huno ne'apateya vekamo ayapi'mo alino male'niye. 24 Agai'age'mo hosu kavatimo agufafi'mo aliteno malipu yosale'mo fali'niye. Hosu kavatilefe'mo falitetae'mo alagepa kava'alefe'mo afa'a maisunafe'mo fali'niye. Amagi'nageno fugina'amo'mo hu'niya kava'aleti'mo Goti'a alino alagepa huno lapate'niye. 25 Hogotetapa ataleta utetapa hu'naya sipisipigana hutapa mai'naya'monanafa hemenimo sipisipile'mo yagaino ne'apateya vekamo'a lapakupi mafa'nele'mo yagaino nelapateya vekatapilegamo aita ataginetapa e'nae.

Copyright information for `KYG