1 Peter 3

Muki ve yalavemogitapamo mani kava'mo hiyo, huno hu'niya gemae

A'ne'apimogitapae, lapakaemo ina kava'mo hutapa anautapimogi apaiyafi'mo mai'netapa ge'apimo afiyo. Lapakaemo ge osisage'a Goti ge'amo no'afiya anautapimogimo lapakete'apae'mo, apaune'apame'mo'a hosu kavafe'mo ohapau'nige'a Gotifeke'mo koli nehae, hu'a hisagetapae'mo alagepa kavatapileti'mo Gotitegamo apavalelitapa egae. Alagepa konali yatapimo amega lapakufale'mo ohaneno. Konali yatapimo lapayokate'mo alo nehaya kavatapimo ohanege lapakufale'mo ne'aliya konali yatapimo ohanege kukenamo alita ne'vaiya kava'mo ohanege huno ohanenageta lapaipafike'mo fala kino haneno. Lapakaetegamo hosu kava'mo afole ne'aisigetapae'mo yuna lapaipa falu lapaipamo kaligeno'ao, konali yakana huno hanege hanege huno haneno. Goti'a ani kavafe'mo, alagi hogote kanale kava'mo hane'niye, huno amuse nehiye. Akeya'vilaga apaote a'nemogimo Gotife'mo, laha maegaiye, hu'a hu'naya a'nemogi anau'apimogi apaiyafi'mo mai'ne'apae'mo ani agufa konali ya'apimo ali'a vai'nae. Sela'a ani kava huno Emalehamu aiyafi'mo mai'neno ge'amo afiteno'ae'mo, kava ne'nimae, huno hu'niye. Lapakaemo atete osutapa alagepa kava'mo hutapa mai'nisayana Sela a'mafa'ne'amo mai'nae.

Anau'apimogitapae, hu'na, a'netapie'mo, apakufamo lokiya o'vai'niye, hutapa lapakesamo ne'afitapa apakae'e'mo alagepa hutapa magokepi lokaeta maiyo. Goti'a maige maige hutapa maisaya ya'mo fiku lapa maeno lapamisiya kava huno a'netapi'e'mo apamigiya'mofe'mo apaki'apile'mo alita asaga hutapa apateyo. Fiku yanageno nunumu hisaya getapimo'mo alagepa huno afole o'aigiyanagi mani kava'mo hiyo.

Nagaemo atupa ge'nimo lapa pai'nae'mo, magoke lapaipa lapakesamo alitetapa magoke agufa lapaipamo kalitapa maiyo. Konagatapie'mo afalu afalugana agufa kava'mo hutapa lapau lapayamopafi'mo lapaino. Lapau hutapa apateyo. Vaya'aitegamo himu'namu kava'mo osutapa vase vase kava'mo hiyo. Inagi mago vaya'mogimo lapakaetegamo hosu kava'mo nehisagetapae'mo anona'apilefe'mo hosu kava'mo osiyo. Mago vaya'mogimo hu'a faipa hu'a lapatesagetapae'mo anona'apilefe'mo huta faipa huta o'apatetapa Goti'a lapa maeno, hutapa hapa paiyo. Goti'a ani kava'mo nehisageno'ae'mo lapa maesiyafeke'mo keya aeno ge hu'niye. 10 Ani kavatefe'mo Goti mukufi gemo'mo huno'ae'mo,

Alagepa huta mai'neta lamogaga aisunafe'mo lahau'niye, hu'a nehisaya vaya'mogimo ani agufa kava'mo hu'a maisayafe'mo hosu gemo osuge aigofe gemo osuge hu'a alagepa hu'a yagaiyo.
11 Hosu kava'amo mai'a halove hu'a atalete'a alagepa kavake'mo hiyo. Alagepa hu'a magokepi lokae'a maisaya kavafe'mo kahauya hu'a age'a vegala ae'a atafaiyo. 12 Na kava nehiya'mofe'mae. Ala kava ne'mo'a alagepa kava'mo nehaya vaya'mo aulu hapaeno apake'neno'ae'mo agesamo aino halo ai'nigeno nunumu nehaya ge'apimo ne'afiye. Ge'apimo ne'afiya'monanafa hosu kava'mo nehaya vaya'aife'mo hosu augosamo kalino ne'apate.
13 Lapakaemo alagepa kava'mo hisayafe'mo lapayamukiki nehisage'apae'mo ina lagimo lapakaetegamo hosu kava'mo hugae. 14 Osugaya'monanafa alagepa kava'mo nehisageno'ae'mo mago vekamo'a lapakaetegamo hosu kava'mo nehisiyana Goti aulagale'mo alagepa huta mai'nayanagetapa afa'a lapamogaga aigae. Mago geleti'mo hu'alapausoli hisaya gemo nehisagetapae'mo lapamo'ya o'aitapa koli osiyo. 15 Lapamo'ya o'aitapa Gotifeke'mo lapaipafi'mo koli nehutapae'mo, Ala kava netie, hutapa lapaipafi'mo hiyo. Vaya'mogimo lapakaefe'mo, na kava higetapae'mo Gotife'mo agava mai'netapa lapavayagunagu nehae, hu'a lapafi gesagetapae'mo ge'apile'mo aeta atagaina hutapa hapa paisayafe'mo muki afina'mo alo hutapa maiyo. Himu'namu gemo osutapa Gotifeke'mo koli nehutapa alagepa gemo hutapa hapa paiyo. 16 Yu'ilaga mafa'nemo'mo hosu kava'mo nehae, huno osisiyafe'mo alagepa kava'mo hiyo. Alagepa kava'mo nehisage'apae'mo Kalaisi'mo akame nehaya alagepa kavatapie'mo hu'a faipa hu'a nelapatesaya vaya'mogimo lapakete'apae'mo apavagage hugiye. 17 Goti'a hau'ninageno'ae'mo, kana ya'mo aligae, huno nehisigeno'ae'mo alagepa kava'mo hu'naya'mofe'mo kana ya'mo alisayana kanale hugiya'monanafa hosu kavatapilefe'mo alisayana hosugiye. 18 Ani kavatefe'mo Kalaisi'a fatago vekamo mai'neno hosu vaya'ai hosu kava'apimo aimu'yale'mo emineno muki afinafe'mo magoke afina'mo ago falino apate'niye. Agaemo Gotitegamo lavalelino haisiyafe'mo agufa'amo fali'niya'monanafa Goti Auneme'amo'mo ago alino he tino ate'niye. 19 Agaemo Goti Auneme'aleti'mo Noa'e'mo magokepi lokae'a mai'naya vaya'aife'mo Goti ge'amo aeno hakalo huno hapa pai'niya'monanafa o'afi'a falite'apae'mo hemenimo apaune'apame'amo Goti kalavusifi'mo ne'maiye. 20 Noa'a hogoteno alopa sipimo alo nehigeno'ae'mo Goti'a vase vase huno apakava maime maime e'niya'monanafa ge'amo o'afi'nae. Goti'a hapa o'maeno eiti'a vaya'atoge'mo anite'mo hane'niya sipifi'mo mai'naya vaya'ai apakufamo alino katino apate'niye. 21 Apakaemo sipifi'mo mai'nageno'ae'mo Goti'a anipati'mo apakufamo alino katino apate'niya kava'mo aune kava'mo huno Goti'a ani'mo fale'a nelataya kavateti'mo lagufamo alino katino nelate. Fiku ani'mo fale'a ne'apataya kava'mo'a amega apakufale o'ani'ya'age'mo aeno kalo paeno ne'ataleya'monanafa Goti'a Yesu Kalaisi'mo alino he tino ate'niya kavateti'mo yu'ilaga mafa'netimo alino alagepa huno late'niya mafa'netifati'mo Goti ge'ale'mo aeta atagaina huta nehune. 22 Kalaisi'a he tino koku'napi'mo haino Goti lamaga haopale'mo mai'neno muki vaya'aite'mo yagaino ne'apate. Goti'a enisole vayanagi yagai'a ne'apataya vayanagi lokiya apaune'apame'e vayanagi huno alino Kalaisi aiyafi'mo pate'nigeno yagaino ne'apate.

Copyright information for `KYG