1 Peter 4

Kalaisi'a lagaetefe'mo kanamo aliteno agufafi'mo lusi kava huno agafu ki'niye. Lapakaemo ani agufa kava hutapa kanamo alisayafe'mo lapakesamo afiyo. Apakufafi'mo kanamo ali'naya vaya'mogi hosu kava'apimo atale'naya kavafe'mo lapakesamo afi'netapa ani geleti'mo alita lokiya vaitapa lapateyo. Apakaemo hosu kava'apimo ago atale'naya'mofe'mo ma mopafi'mo maime maime ne'e'apae'mo hapa'ye hu kava'mo atale'a Goti'a hau'niya kavake'mo akame hisaya kava'mo hane'niye. Lagaemo hogoteta malaga vaya'mogi hapau'niya kavake'mo alagi huta mai'nona'monanafa hemenimo mago'e huta osugune. Hogoteta kumai kava'mo hisunafe'mo apayate alige amega lagufamo'mo hau'niya kava'mo huge ani'mo neteta negi nagi kava'mo huge ogefagemo huge ani'mo neteta hosu kigi yokalo gemo huge nehutae'mo aigofe gotitefe'mo hosu mono huta mai'none. Hemenimo lapakaemo Satani vaya'e'mo ani agufa hosu kava'mo afela vaya'ai kava'mo nosaya'mofe'mo Satani vaya'mogi hapau aite'a hu'a faipa hu'a nelapatae. Apakaemo Goti'a alo huno mai'niyanageno alino fako huno apatesiya vekamo aulagale'mo fali'naya vaya'e afa'a ne'maiya vaya'e'mo he tisageno hosu kava'apie'mo apafi gesige'apae'mo ani kava hu'nove, ma kava hu'nove, hu'a ae'a hakalo hu'a ha paigae. Ani kavatefe'mo fali'naya vaya'aife'mo alagepa faigoko ge'amo ago ae'a hakalo hu'a hapa pai'nae. Apakaemo ma mopafi'mo mai'nage'apae'mo, hosu kava'mo hu'nae, hu'a ali'a fako hu'a apate'naya'monanafa apaune'apamepati'mo Goti ge'amo akame hisayafeke'mo alagepa faigoko ge'amo afi'nae.

Goti ali'ya'amo aliyo, huno hu'niya gemae

Muki ya'amo alagi hano hisiya afina'mo ago hogo nehiya'mofe'mo nunumu nehutapae'mo lapakufale'mo alagepa hutapa yagaita ate'netapa lapaipamo alo hiyo. Hogote kava'mo hutapa konagatapie'mo lusi kava huno lapau lapayamopafi'mo lapaino. Konagatapie'mo lapau lapayamopafi'mo nelapaiya kava'mo'a hosu kava'apimo aeno ati kaeno atalegaiye. Nata vaya'mo notapile'mo ne'esagetapae'mo ge ohapauge lapaipa kafa ohapaege hutetapa alagepa hutapa ne'yake'mo apamiteta yagaitapa apateyo. 10 Kava ne'apimogi aepa vekatapimo yate'mo ne'yagaiya kava hutapa asole ya'mo fiku lapa maeno lapami'niya ya'mo alita fako hutapa apamige'apa anonale'mo lapamiyo. 11 Goti ge'amo ae'a hakalo hu'a hapa nepaiya vaya'mogi Goti avayamo ali'naya'mofe'mo lokiya vai'a ae'a hakalo hu'a hapa paigae. Hapa ne'maeya vaya'mogi Goti'a alino ne'apamiya lokiya'aleti'mo hapa maege'apao vaya'mogimo Yesu Kalaisiteti'mo Goti agi'ale'mo ali'a asaga hu'a ategae. Goti'a ala agi'amo hanege yagaino ne'apateya lokiya'amo hanege huno muki afina'mo alagi hanege hanege huno haneno. He, lama ge.

Kalaisi agi'alefe'mo kanamo alisaya kavafe'mo ava gemo hu'niya gemae

12 Nahau'niya vaya'nimogitapae, hu'na, Hosu kava'mo atagana huno lapamalageka nehisigetapae'mo, aeto agufa kava'mo lagaetegamo afole ne'aiye, huta osutapa lapau o'aiyo. 13 Kanamo ali'niya kava huno kanamo ne'alitapa agae'e'mo magoke agufa kanamo ali'naya'mofe'mo lapamogaga aiyo. Kalaisi ha le konali ya'amo afole aisiya afina'mo lusi kava hutapa lapamogaga aigaya'mofe'mo mago'e hutapa lapamogaga aiyo. 14 Lapakaemo Kalaisi'mo akame nehaya'mofe'mo ge nelapausayana Goti aulagale'mo alagepa hutapa mai'naya'mofe'mo afa'a lapamogaga aigae. Goti Auneme'amo ha le konali Auneme'amo'mo lapakaete'mo alagi mai'niya'mofe'mae. Apakaemo Gotife'mo hu'a faipa hu'a ne'atagetapae'mo lapakaemo ala agi'amo ne'amiye. 15 Fiku yanagetapa vaya'mo nehapaya vaya'e'mofi kumaya'mo ne'aliya vaya'e'mofi gamani vaya'ai ge'apimo amagi'a ne'atalaya vaya'e'mofi ali'ya'apimo ohane'nige'a himu'namu gemo nehaya vaya'e'mofi hutapa mai'naya'mofe'mo kanamo aligae. 16 Aligaya'monanafa Kalisitini vaya'mo mai'naya'mofe'mo kanamo alisayana lapavagage osutapa ani kavatefe'mo Goti agi'ale'mo alita asaga hiyo. 17 Goti'a agoti huno apateteno kayo'mo apamisiya afina'mo ago afole ai'niya'mofe'mo afamo anaga'ale'mo aepa faigiye. Goti'a lagaetegamo ago aepa faino agoti huno nelatesiyana alagepa faigoko ge'amo no'afiya vaya'aina agoti huno apatesiya afina'mo haiya kava hu'a maigae. Vaehae, hu'na, 18 Ani kavatefe'mo Goti mukufi gemo'mo huno'ae'mo,

Goti'a fatago vaya'ai apakufamo alino katino apatesige'a alagi alagepa hu'a maisayafe'mo hai'a hogo'a metale'nayana mono nosaya vaya'e hosu kava'mo nehaya vaya'e'mo vaehae, hu'na, haiya kava hu'a maigae.
19 Inagi Goti'a hau'ninageno, kanamo aligae, huno nehisaya vaya'mo alagepa kava'mo hute'a Goti'a lapakupi mafa'nele'mo yagaino apatesiyafe'mo alita ayapi'mo maleyo. Agaemo muki ya'amo alo hu male'niya vekamo huguve, huno hu male'niya ge'amo alagi akame nehiya vekamo mai'niya'mofe'mo lapakupi mafa'nemo alita ayapi'mo maleyo.

Copyright information for `KYG