1 Timothy 2

Nunumu'mo hisaya kavafe'mo hu'niya gemae

Nagaemo, Goti vaya'amogimo hogote'a muki vaya'aife'mo Gotifeke'mo aukaya hu'a ge huge nunumu'mo huge nunumu'mo hu'a apatege hao ke hege hu'a maiyo, hu'na lokiya gefatike'mo nehuve. Gamani vaya'e muki yagai'a ne'apataya vaya'efe'mo nunumu'mo huta apategetao alagepa huta magokepi lokaeta mai'neta Gotife'mo mono nehuta muki vaya'aitegamo fatago kava'mo hugunanagi. Lagufamo alino katino nelateya Goti'a ani agufa kavafe'mo hau'nigeno'ae'mo kanale kava'mo hane'niye, huno nehiye. Agaemo muki vaya'ai apakufamo alino katino apatesige'a lama ge'amo afi'a aeto hisayafe'mo hau'niye. Goti'a magoke vekamo mai'nigeta lagaemo mai'nonanageno agae'e'mo magokepi lokaeta maisunafe'mo magoke vekamo folagate vekamo'a ma mopafi vaya'ai agufamo ali'niya vekamo Kalaisi Yesu'a mai'niye. Agaemo muki vaya'aina miya faino apatesiyafe'mo agai'a agufa'amo Goti'mo ami'nige'apae'mo Goti'a lekana pai male'niya afina'mo ge'amo ae'a hakalo hu'a hapa pai'nae. Ani kavatefe'mo lekana paino nate'nige'na ge'amo ae'na hakalo hu'na hapa nepauva vekamo mai'ne'na apa veka'amo'na alu nofi vaya'mogimo apakesa afi'a fatago hisayafe'mo lama ge'amo ali'na apaya ne'malova vekamo mai'nove. Aigofe gemo nosufa alagi lama gemo nehuve.

Nahau'niyanage'a muki vemogimo lole apakesamo o'afi'ne'a apaote kava'mo hu'a apaipamo neleya kava'mo atale'a alagepa hu'a mai'ne'a muki haopalegae'mo nunumu'mo hugae.

A'ne anaga'aife'mo hu'niya gemae

Ina kava huno nahau'niyanage'a a'nemogimo vaya'mogi apakesayafe'mo kukena'apimo ali'a o'vai'a alagepa hu'a apakesamo afi'ne'a kukenamo ali'a vaigae. Apayokapi'mo konali alige apakufale'mo konali alige lusi monileti'mo miya nefaiya kukenamo ali'a vaige osugaya'monanafa Goti mafa'nemo mai'none, hu'a nehaya'mofe'mo alagepa kava'apimo kukenagana hu'a ali'a vaigae. 11 A'nemogi Goti gemo ne'afi'apae'mo ge osu'a mono vaya'ai apaiyafike'mo maigae. 12 Nagaemo a'nemogi ali'a apaya malege ve anaga'aite'mo yagai'a apatege hisayafe'mo ali'na o'apate'novanage'a ge osu'a afa'a maigae. 13 Goti'a hogoteno Atamu'mo alo huteno Ivi'mo alo huno ate'niya'mofe'mae. 14 Satani'mo Atamu'a humi o'ate'nifa Ivike'mo humi ate'nigeno Goti ke'aepa ge'amo ago amagino atale'niye. 15 Amagino atale'niya'mofe'mo a'nemogi apakesa afi'a fatago huge hapau apayamopafi'mo hapauge apaote kava'mo huge vaya'mogi apakesayafe'mo apamo'ya aige hu'a maime maime ne'visageno'ae'mo Goti'a mafa'ne'amo alino ate'nigeno emine'niya kavateti'mo apakufamo alino katino apateteno hapau vaigiye.

Copyright information for `KYG