2 Corinthians 1

Nagaemo Polo'nae'mo Goti'a, apa ali'ya'nile'mo avale'na ali'na ategauve, huno huteno navaleno nate'nige'na Kalaisi Yesu apa veka'amo mai'nove. Nagae'e konagatimo Timoti'e'mo Kolitiyani taonifi'mo mai'naya siosi vaya'mogitapa'e muki Goti vaya'amo lapaote vaya'mo Akaiya kotegamo mai'naya vaya'mogitapa'efe'mo mani avo'mo nekao'ae. Afotimo Goti'e Ala kava netimo Yesu Kalaisi'e'mo fiku lapa mae'ana lapami'anageno lapaipamo'mo falu hino.

Polo'a Gotife'mo hao ke he'niya gemae

Goti agi'ale'mo Ala kava netimo Yesu Kalaisi Afo'amo Goti agi'ale'mo alita asaga higetao. Agaemo hau huno nelateya kava'mo Afo'amo'a mai'neno muki afina'mo laha maeno laipamo alino lokiya vaino nelateya vekamo mai'niye. Lagaemo muki agufa hanageke ya'mo ne'alisaya vaya'mo hapa maeta alita lokiya vaita apatesunafe'mo Goti'a laha maeno alino lokiya vaino nelate. Lagaemo muki hanageke ya'mo ne'alunageno'ae'mo laha maeno alino lokiya vaino nelateya kavateti'mo hapa maeta alita lokiya vaita apatesunafe'mo laha maeno alino lokiya vaino nelate. Kalaisi'a lusi kana ya'mo ali'niya kava huta lusi kana ya'mo hetamatimo ne'alune. Lusi kava huta kanamo ne'aluna kava'mo huno Goti'a Kalaisiteti'mo mago'e huno laha maeno alino lokiya vaino nelate. Goti'a lapa maeno alino lokiya vaino lapateteno lapakufamo alino katino lapatesiyafe'mo kanamo ne'alune. Lapaipafi'mo ali'ya'mo ne'aligetapa ne'aluna agufa kana ya'mo ali'netapae'mo o'ataletapa atafauta alagi nehae. Ani kava huno lapa maeno alino lokiya vaino lapateteno lapakufamo alino katino lapatesiyafe'mo Goti'a laha maeno alino lokiya vaino nelate. Kanamo ne'aluna kava hutapa kanamo ne'aliye. Ani kava huno alino lokiya vaino nelateya kava huno alino lokiya vaino lapategaiye, huta ago afi'nona'mofe'mo, o'atale'a atafau'a alagi hugae, huta lagesamo ne'afune.

Konagatimogitapae, Lagaemo Esiya kotegamo mai'nonageno'ae'mo hanageke ya'mo lagaete'mo afole ai'niya hanageke yafe'mo ava gemo afisayafe'mo lahau'niye. Lusi kava huta kanamo ali'nonageno'ae'mo aeno lagase'nigetae'mo, faita kasalo paesuna ka'mo alagi ohane'niyanageta faligune, huta hu'none. He, yasi vekamo'a, faligae, huno hu'niya agufa gemo laipafi'mo ago afole ai'niye. Lagaitimo laha maegaune, huta osuta Goti'a fali'nayateti'mo alino he tino ne'apateya vekaeke'mo laha maegaiye, huta lagesamo afisunafe'mo mani hanageke ya'mo afole ai'niye. 10 Agaemo lusi hanageke ya'mo falisuna agufa hanageke ya'mo ali'nona'monanafa lagufamo alino katino late'niyanageno alino katino nelateyanageno alu afina'a'e alu afina'a'e'mo mago'e huno alino katino lategaiye, huta agaefeke'mo lagesamo ne'afune. 11 Lapakaemo asole vaya'mogitapa nunumu hutapa latesageno Goti'a lahau vaisige'apae'mo ani kava hu'a asole vaya'mogimo Gotife'mo hao ke he'a lategae.

Polo'a alu agesamo afi'niya gemae

12 Lagaemo ma mopafi vaya'mogi afite'a age'naya agufa kavateti'mo mago kava'mo osu'nonageno'ae'mo Goti'a fiku laha maeno lami'nigeta mago kava'mo aeta ati okaeta laipafati'mo laote kava'mo hu'none. Lagaemo ma mopafi vaya'ai apaulagale'mo mani kava'mo nehuta lapakae lapaulagale'mo mago'e huta mani alagepa kava'mo hu'none. Yu'ilaga vekatimo'a mani alagepa kavatie'mo faigoko gemo laha nepaigeta ani alagepa kavatie'mo lamogaga ne'aune. 13 Lagaemo lole agufa gemo osuta mago gemo aeta ati okae'nonanagetapa afa'a lekana paitapa afigae. Muki'amogitapamo muki getimo alagepa hutapa afisayafe'mo avo'mo kae'none. 14 Mago'amogitapamo lageta lagaefe'mo lapamogaga ne'aitapa lahapage lahapage nehiye. Mago'amogitapamo lagaefe'mo lahapage lahapage nehiya'monanafa nahau'niyanagetapa muki'amogitapa lageta alagepa hutetapae'mo lahapage lahapage hugiye. Ani kava huta Ala kava netimo Yesu'a eminesiya afina'mo lapakaefe'mo lamogaga ne'aitae'mo lahage lahage hugiye.

15 Nagaemo lole nagesamo o'afi'na magoke nagesamo afi'nae'mo, lole afina'mo lapakaetegamo u'na lapa maegauve. 16 Lapakaetegamo u'na maige'na lapatale'na Masetoniya kotegamo ute'na halate ai'na atagi ne'na lapakaetegamo e'na mai'nisugetapae'mo Yutiya kotegamo visuvafe'mo naha maegae, hu'na nagesamo ne'afuve. 17 Nagaemo, ani kava huguve, hu'na hu'nova gemo navaya'aletike'mo afa gemo hu'nofiye. Ha'ao. Ma mopafi vaya'mogi nehaya agufa ge hu'na hisuva kavafe'mo lole gemo hu'nae'mo magoke afina'mo he, hu'na hute'na, ha'ao, hu'na osu'nove. 18 Goti'a huguve, huno hu male'niya gemo ataleno alu gemo nosiya kava huta lapakaefe'mo magoke afina'mo he, huta huteta, ha'ao, huta nosune. 19 Sailasi'agi Timoti'agi nagai'nimogi huta Goti Mafa'ne'amo Yesu Kalaisife'mo ava gemo aeta hakalo huta lapa pai'nona vekamo'mo lole agufa gemo aepa vekamo o'mai'niye. Agaetefe'mo he, huta nehutae'mo aita afeleta hutae'mo, ha'ao, huta nosune. Agaemo he gemo aepa vekamo mai'neno lama gemo aepa vekamo mai'niye. 20 Goti'a muki asole ge'amo alagi lama ge huno ani kava'mo huguve, huno hu male'niya polomasi ge'amo Kalaisiteti'mo, he, huno huteno alino afole aino ne'ate. Alino afole aino ne'ateya'mofe'mo lagaemo Kalaisiteti'mo, he, lama gemo hane'niye, huta huteta Goti agi'ale'mo alita asaga nehune.

21 Goti'a agai'a ali'ya'ale'mo lavaleno latesiyafe'mo uvelimo lakino faleno lategekana huno Auneme'aleti'mo faleno late'niye. Alagena ya'amo laipafi'mo hu male'neno'ae'mo, vaya'nimo mai'nae, huno hu'niye. Lamisiya ya'afati'mo Auneme'amo hogoteno ago alino laipafi'mo lami'niya'mofe'mo ago afi'nonana muki alagepa ya'amo alino lamigiye. Goti'a alino lamiteno lokiya vaino nelategetae'mo lagae'e lapakae'e'mo Kalaisipi'mo lokiya vaita ne'maune. 23 Goti'a nage'niyanageno lama gemo nehiye, huno ageteno naha maeno faigoko gemo lapa paigiye. Lama gemo hu'nae'mo, kayo'mo lapamagisuvafe'mo o'nahau'nige'nae'mo, Kolitiyani taonifi'mo halate o'uguve, hu'na hute'na lapatale'na ae'na lapakase'nove. 24 Lagaemo lapakesa afita fatago hisaya kavateti'mo ala lagi vayatapimo maisunafe'mo osu'nona'monanafa lapamogaga aisayafe'mo lapa ne'maone. Lapakesa afita fatago nehutapae'mo atafautapa alagi hu'netapa he titapa mai'nae.

Copyright information for `KYG