2 Corinthians 11

Polo'a agai'a'e aigofe apa vaya'efe'mo apava gemo hu'niya gemae

Nagaemo mago aise'amo negi nagi gemo lapa paisugetapae'mo afa'a nageta natale'netapa afisayafe'mo nahau'niye. Ani gemo huva'monanafa nageta natale'netapa ge'nimo afa'a ne'afiye. Goti'a lapakaefe'mo, nagai'ni vayane, huno huteno hau ayamopafi'mo hau'niya kava huno lapakaefe'mo nahau nayamopafi'mo nahau'niya'mofe'mo magoke vekamo Kalaisi a'amo maisayafe'mo, apavale'na kamiguve, hu'na Kalaisife'mo ha pai'nove. Lapakaemo ve'e'mo lokaeno ohavae'niya a'mafa'nemo'a yaveyave kava'mo nehiya a'mafa'negana hutapa mai'nisage'na lapavaleli'na hai'na amisuvafe'mo nehuve. Nehuva'monanafa nagalo'yavemo'a Ivife'mo aigofe geleti'mo agesamo fai'niya kava hu'a mago vaya'mogimo lapaipa lapakesamo ali'a hosu hu'a lapatesagetapa Kalaisife'mo lapaipafi'mo lapakesamo o'afitapa atalesaya kavafe'mo koli nehuve. Mago vaya'mo ago e'naya vayanagi henaga'a esaya vayanagi lapakaetegamo e'a alu Yesufe'mo lagaemo aeta hakalo huta lapa opai'nona Yesufe'mo ae'a hakalo hu'a lapa pai'nisagetapa afa'a afigae. Alu aune'amo lagaeteti'mo o'ali'naya aune'amo lapakaemo ali'nisafi alu alagepa faigoko gemo lagaetegati'mo o'afi'naya agufa alagepa faigoko gemo afi'nisafi hutetapa afa'a apaketapa apatale'netapa ge'apimo afa'a afigae.

Vae, hu'na, hogote'apa vayatapimogi ae'a apakase'naya apa vayatapimogi mago aise'amo ae'a o'nagase'nae, hu'na nagesamo ne'afuve. Gemo ae'na hakalo hisuvafe'mo ali'a naya o'male'naya vekamo mai'nisuvana Goti ge'amo afi'na aeto hu'nove. Lagaemo muki afina'mo muki agufa kava'amo ago alita lapave li'none. Nagaemo Goti alagepa faigoko ge'amo ae'na hakalo hu'na lapa nepai'nae'mo lapakaetegati'mo mago miya'nimo o'ali'na alagepa hutapa maisayafe'mo ali'na afepi nate'nova'mofe'mo nagaefe'mo, hosu kava'mo hu'niye, hutapa lapakesamo ne'afifiye. Lapakaetegamo u'na ali'ya'mo ne'aluge'apae'mo alu siosile alu siosile'mo mai'naya vaya'mogimo miya'nimo nami'nae. Lapa maesuvafe'mo apakae ya'mo kumaya aligekana hu'na ali'nove. Lapakae'e'mo mai'ne'nae'mo mago yafe'mo kafu hu'nae'mo naha maetapa namisayafe'mo kanamo ali'na olapami'nove. Masetoniya kotega konaga'nimogi ohane'niya ya'mo alini e'a nami'nae. Muki ya'ale'mo naha maetapa yagaita natesayafe'mo kanamo ali'na olapami'novanage'na kanamo ali'na olapamiguve. 10 Kalaisi lama ge'amo naipafi'mo hane'nige'na alagi lama gemo hu'nae'mo, lapakaetegati'mo mago ya'mo o'ali'nova kavatefe'mo namogaga ne'auva gemo navayaleti'mo hisuvafe'mo muki Akaiya kotega mai'naya vayapati'mo mago vekamo'a navayale'mo huno natafauno o'nategaiye. 11 Na kava hige'naene. Lapakaefe'mo nahau nayamopafi'mo o'nahau'niya'mofe'mo nehufiye. Ha'ao. Goti'a ago nage'niye. 12 Mago vaya'mogimo apakai'apie'mo apamogaga aisaya ka'mo agesayafe'mo, magoke agufa ali'ya'mo ne'alune, hu'a hute'a apamogaga o'aisayafe'mo lapakae ya'mo o'ali'novanage'na alagi o'aliguve. 13 Ani agufa vaya'mo aigofe apa vaya'mo mai'ne'a humi ne'apate'a apakesamo nefaiya vaya'mo mai'nae. Apakaemo apakai'apimo ali'a ai'a afe le'a Kalaisi apa vaya'amo ali'a hamale'a ne'apatae. 14 Satani'a agai'amo alino aino afe leno ha le enisole vekagana huno alino hamaleno ate'niya'mofe'mo aigofe apa vaya'mogi hisaya kava'apie'mo lahau o'aigune. Henaga'amo nehaya kava'apimo anona'apilefe'mo alino hano huno apategaiye.

Kolitiyani vaya'aife'mo ge avoya gemo hapa pai'niya gemae

16 Halate lapa pai'nae'mo, mago'amogitapa nagaefe'mo, negi vekae, hutapa lapakesamo o'afiyo. Negi vekae, hutapa lapakesamo ne'afisayana nagai'nie'mo aise'amo namogaga aisuvafe'mo negi vaya'mo apaketapa ne'apatalaya kava hutapa nagetapa nataleyo. 17 Nagai'nie'mo namogaga ne'ai'nae'mo Ala kava ne'mo'a hu'niya agufa gemo osu'na negi vekagana hu'na nehuve. 18 Asole vaya'mogimo amega apakufale kavafe'mo apamogaga ne'aiya'mofe'mo nagai'nie'mo afa'a namogaga aiguve. 19 Nahau'nimogitapae, hu'na, afitetapa age'naya vaya'mo mai'naya'mofe'mo negi vaya'mo afa'a apaketapa ne'apatalae. 20 Mago vaya'mogimo ali'ya'apile'mo ali'a kalavusi hu'a nelapatafi mago yatapimo ali'a ne'nafi ane'aitefe'mo ali'a nelapatafi ali'a apaiyafi'mo nelapatafi apayamo ali'a ataleline'a lapaugosafi'mo lapamagige nehisayana afa'a apaketapa ne'apatalae. 21 Ani agufa kava'mo hisunafe'mo layamufa vaya'mo o'mai'nona'mofe'mo lavagage hiye.

Polo'a ali'ya'mo ali'niya kavafe'mo ava gemo hu'niya gemae

Mago vaya'mogi apakai'apie'mo apamogaga ne'aisayana negi vekagana hu'na koli osu'ne'na nagai'nie'mo namogaga aiguve.
22 Apakaemo Himulu nofi vaya'mo mai'nafiye. He, nagae'e'mo Himulu nofi vekamo mai'nove. Isaleli vaya'mo mai'nafiye. He, nagae'e'mo Isaleli vekamo mai'nove. Apakaemo Emalehamu aginagomo mai'nafiye. He, nagae'e'mo Emalehamu aginagomo mai'nove. 23 Kalaisi ali'ya'ale'mo mai'nafiye. Negi vekagana agufa gemo nehu'nae'mo, ae'na apakase'nove. Mago'e hu'na lokiya ali'ya'mo ali'nove. Lekana opaisuna agufa afina'mo namagi'naya kavateti'mo ae'na apakase'nove. Mago'e hu'a kalavusi hu'a nate'nae. Mago'e hu'na muki afina'mo falisuva agufa kavategamo mai'nove. 24 Naya magokayaga'a afina'mo Yu vaya'mogi nofi kayoteti'mo teti naeni'a afina'mo namagi'nae. 25 Alu nofi vaya'mogi lole'e mago'e afina'mo kayoteti'mo namagi'nae. Magoke afina'mo yafa kayoteti'mo namagi'nae. Lole'e mago'e afina'mo sipimo anipi'mo aeno lapane'nige'na ani'mo nesuva agufa kava hu'nove. Magoke afina'mo hani'ilaga'e feluga'e'mo solovala ani agotofule'mo mai'nove. 26 Asole afina'mo nata ne'na umenitata hu'nove. Ani'mo he'niya yapati'mo lakae'na uge apatafau'a apamagite'a kumaya ne'aliya vaya'ai folagapi'mo u'na maige Yu konaga'nimogi namagigefe'mo hu'naya folagapi'mo u'na maige alu nofi vaya'mogi namagigefe'mo hu'naya folagapi'mo u'na maige hu'na falisuva kavategamo u'ne'na hu'na mai'nove. Alopa taonifi'mo u'na maige ka'me kotegamo u'na maige solovala ani'mo agotofule'mo u'na maige aigofe konaga vayatimogi folagapi'mo u'na maige hu'na falisuva kavategamo u'ne'na hu'na mai'nove. 27 Lusi ali'ya'mo alige alaga nahaege asole afina'mo nau okalege naga tege anife'mo nahauge asole afina'mo ne'ya'mo o'nege yasimo nahauge kukena'nimo ohanege hu'na mai'nove. 28 Mago'e hu'na kana ya'mo ali'ne'nae'mo muki afina'ae afina'ae'mo siosi vaya'aife'mo lusi kava hu'na nahausoli hu'ne'na nagesa ala'amo afite'na mago'e hu'na kanamo ne'aluve. 29 Ina lagimo lokiya'apimo nohanefi ani kava huno nagae'e'mo lokiya'nimo nohane. Ina lagimo ali'a apago'ya faitalage'a asagau'a ne'aifi naipamo nele. 30 Alopa ka'mo ohane'nisige'na nagai'nie'mo namogaga aisuva ka'age'mo hane'nisiya'mo'mo lokiya no'vauva kavafe'mo namogaga ai'na ge huguve. 31 Ala kava netimo Yesu Kalaisi Goti'amo Afo'amofeke'mo muki afina'mo agi'ale'mo alita asaga huta ne'atona vekamo'a, aigofe gemo nosiye, huno nage'niye. 32 Nagaemo Namasakasi taonifi'mo mai'nogeno'ae'mo kini vekamo agi'amo Aletasi aiyafi'mo mai'niya vekamo taonifi'mo mai'naya vaya'aite'mo yagaino ne'apateya vekamo'a kalavusi hu'a natesayafe'mo ati vaya'amo alino apate'nige'a u'a yafa kegi'ya kipate'mo yagai'a mai'nae. 33 Yagai'a mai'naya'monanafa nagaemo hona yuvapagana yapi'mo hai'na mai'noge'a yasi kateti'mo ali'a natage'na lami'na malaga asagau'na ai male'na naune hetale'na u'nove.

Copyright information for `KYG