2 Corinthians 13

Ehetapiye, huno hu'niya gemae

Hemenimo napa tali afina'mo u'na lapakegauve.Agoti hugefe'mo lole vekala'mofi lole'e mago'e vaya'mogimofi hu'a apavayafati'mo hisaya gemo lama gemo afole aigiye, huno hu'niye. Nagaemo napa tu afina'mo lapakaetegamo u'na lapakae'e'mo lokae'na mai'ne'nae'mo hogote'na hosu kava'mo hu'naya vaya'aife'mo, ehetapiye, hu'na lapa pai'nove. Lapa pai'novanage'na hemenimo lapakae'e'mo u'na lokae'na o'mai'ne'nae'mo halate hogote'na muki hosu kava'mo hu'naya vaya'aife'mo, u'na lapakege'nae'mo afa'a olapategauve, hu'na lapa nepauve. Mani gemo Kalaisi avayamo ali'na nehuve, hu'na ali'na lapave lisuvafe'mo lapau'niyanage'na afa'a ali'na lapave liguve. Kalaisi'a lapakaete'mo ayamufa nosiya vekamo o'mai'nifa lapakaepi'mo lokiya ali'ya'mo ne'aliya vekamo mai'niye. Malipu yosale'mo nili aite'a ali'a he ti'a ate'nageno'ae'mo lokiya'amo ohane'niya'monanafa hemenimo Goti himamu'aleti'mo afa'a ne'maiye. Ani kava huta agae'e'mo magokepi lokaeta mai'netae'mo lokiyatimo ohane'niya'monanafa lagaemo lapakaetegamo utae'mo Goti himamu'aleti'mo agae'e'mo afa'a mai'neta ali'ya'amo aligune.

Lapaipa lapakesafi'mo alita fako hutapa lapaketapae'mo, Kalisitini vaya'mo mai'neta lagesa afita fatago hu'nopi osu'nopi, hutapa lapamalageka hutapa lapakegeyo. Lapakaitapimo lapamete lapamete hutapa alita fako hutapa lapakeyo. Yesu Kalaisi'a laipafi'mo ne'maiye, hutapa o'age'nafiye. Lapaipafi'mo o'mai'nisiyana haitapa ohapaitapa haita metale'nae. Lapamalageka hutapa lapakegaya'monanafa lapakaemo lagetetapae'mo, hai'a me otale'nae, hutapa hisaya gee'mo lapakava mai'ne'na navayagunagu hu'na mai'nove. Lapakaemo hosu kava'mo osisayafe'mo Gotife'mo nunumu huta nelapatone. Lapakaemo lagetetapae'mo, Pologimo alagepa ali'ya ne'aliye, hutapa lagesayafe'mo nunumu osuta alagepa kava'mo hisayafeke'mo nunumu huta nelapatone. Lapakaemo alagepa kava'mo hisagetae'mo lapaulagale'mo hai'a metale'naya vayakana huta mai'nisunana kanalene. Lagaemo lama gemo akame nehaya vaya'aife'mo lama gele'mo alita afepi atesuna himamutimo ohane'nifa lama gele'mo alita asaga huta atesuna himamutike'mo hane'niye. Ani kavatefe'mo lapakaemo alagepa kava'mo nehutapae'mo lapayamufa hutapa mai'nagetae'mo lapakaetegamo layamufa nosuna'monanafa lamogaga ne'aune. Alagepa kava'mo hutapa aita hapaitapa maisayafe'mo lahau'niye. 10 Lapakaemo alagepa kava'mo nehisage'na lapakaetegamo u'nae'mo Ala kava ne'mo'a alino nami'niya himamu'aleti'mo lokiya gemo osisuvafe'mo lapakae'e'mo magokepi lokae'na o'mai'ne'nae'mo mani gemo avo'mo nekaove. Ali'na hosu hu'na lapatesuvafe'mo himamu'amo alino o'nami'nifa ali'na lokiya vai'na lapatesuvafeke'mo himamu'amo alino nami'niye.

Ge apamamae'niya gemae

11 Konaga'nimogitapae, hu'na, hemenimo ge'nimo alagi hu'na hano huvanagi lapamogaga aitapa mai'netapa kavatapimo alita api aitapa maiyo. Hiyo, hu'na avo'mo kae'nova gemo afitetapa akame hiyo. Magoke lapaipa lapakesamo alitetapa maiyo. Alagepa hutapa magokepi lokaetapa maigeno'ao Goti'a hapau apayamopafi'mo hapau'nige'a alagepa hu'a magokepi lokae'a ne'maiya kava'mo aepa vekamo'a lapakae'e'mo magokepi lokaeno maino. 12 Konaga kava'mo hutapa lapakaitapimo lapaetapa netetapa maiyo. 13 Muki apaote vaya'mogimo ge lapamamae'nae. 14 Ala kava ne'mo Yesu Kalaisi'a muki'amo fiku lapa maeno lapamino. Goti'a muki'amogitapae'mo hau ayamopafi'mo hau'niya kava'amo lapaipafi'mo haneno. Aote Auneme'amo'mo muki'amogitapa'e'mo afalu afalu huno magokepi lokaeno maino. He, lama ge.

Copyright information for `KYG