2 Corinthians 5

Ago afi'nonana ma mopafi seli notimo atalagausiya'mo'mo o'atalagauno afa'a hanege hanege huno hanesiya notimo koku'napi'mo hane'niya'mofe'mo laipamo'mo kana osu'niye. Vaya'mogimo notimo apayateti'mo oki'naya'monanafa Goti'a ki male'niye. Seli notifi'mo mai'neta avovo nehutae'mo koku'napati notimo alita akalo huta vaisunafe'mo lusi kava huno lahau'niye. Kukena'amo ago alita vai'nisuna'mo'mo falisunageno Goti'a lageteno'ae'mo, lapakufa'alaga'age'mo mai'nae, huno laha opaisigeta saufa kukenamo afa'a alita vaigune. Lagaemo seli notifi'mo mai'netae'mo lusi kava huta kana ya'mo ali'neta avovo nehune. Kukenatimo asagita atalesunafe'mo lagesamo o'afita saufa kukenamo alita anile akalo huta vaisunageno maige maige huta maisuna kavatimo'a falisuna kava'mo alino hano huno atalesiyafe'mo lahau'niye. Mani kava'mo huta maisunafe'mo alo huno late'niya vekamo Goti'a mai'niye. Agaemo alino lamisiya yapati'mo Auneme'amo ago alino lami'niya'mofe'mo muki ya'amo alagi alino lamigiye, huta ago afi'none.

Alino lami'niya'mofe'mo koli osuta lokiya vaita mai'none. Ago afi'nonana lagufafi'mo mai'netae'mo Ala kava ne'e'mo o'mai'none. Hemenimo o'age'nona'monanafa agaefe'mo lagesa afita fatago nehutae'mo ma mopafi'mo mai'none. Lagufa'amo ataleta uta haita Ala kava ne'e'mo maisunafe'mo koli osuta he, kanalene, huta nehune. Lagufafi'mo mai'nopi ataleta visupi nehutae'mo amuse huno latesiyafe'mo ali'ya'amo ne'alune. 10 Muki'amogita Kalaisi'a sia'ale'mo fai mai'neno'ae'mo kavatimo alino fako huno latesiyafe'mo haita aulagale'mo he tita maigune. Lagufafi'mo mai'netae'mo alagepa kava'mo hu'nisupi hosu kava'mo hu'nisupigeta lamete lamete huta muki'amogita miyatimo aligune.

Polo'a alino nanu aeno ne'apateya ali'yafe'mo ava gemo hu'niya gemae

11 Ala kava nefe'mo koli nehutae'mo lagaefe'mo alagi lama gemo nehae, hu'a apakesa afi'a fatago hisayafe'mo apakesamo alita hapa nepaune. Goti'a laipafi'mo ago ageteno'ae'mo, alagi lama gemo nehae, huno nehigetapae'mo lapaipafati'mo, alagi lama gemo nehae, hutapa nehafi huta lagesamo afi'netae'mo, nehae, huta nehune. 12 Halate, alagepa ali'ya'mo ne'alune, huta lagitile'mo alita asaga huta atesunafe'mo nosupa lapamogaga aita latesayafe'mo mani gemo nehune. Lapakaemo apaipafi'mo hane'niya kavafe'mo apamogaga o'ai'a amega apakufale'mo nehaneya kavafe'mo apamogaga ne'aiya vaya'ai ge'apile'mo afa'a aeta atagaina hutapa hapa paisayafe'mo mani gemo nehune. 13 Vaya'ai apaulagale'mo negi kava'mo nehisunana Gotitefe'mo nehugune. Api kava'mo nehisunana lapakaetefe'mo nehugune. 14 Kalaisi'a lagaefe'mo hau ayamopafi'mo hau'niya kava'amo'a heno lavayu hulinuno nelate. Mani kavatefe'mo alita fako huta lagesamo afi'nonana magoke vekamo'a muki vaya'aitefe'mo falino apate'niya'mofe'mo muki'amogi agae'e'mo fali'nae. 15 Fali'naya'monanafa afa'a mai'naya vaya'mo apakai'api hapau'niya kava'mo mago'e hu'a akame osu'a faliteno he tino apate'niya vekalefe'mo muki kava'mo hisayafe'mo ani muki vaya'aitefe'mo falino apate'niye.

16 Lagaemo mago'e huta ma mopafi vayakana huta vaya'ai kava'apimo alita fako huta no'apatone. Lagaemo hogoteta Kalaisi'a ma mopafi vayakana huta age'nona'monanafa hemenimo mago'e huta ma mopafi vayakana huta o'agegaune. 17 Goti'a ina lagimo Kalaisipi'mo mai'nisafi ago saufa vaya'mo alo huno apate'niye. Afiyo, hu'na, atafa kava'apimo ago hano hu'nigeno'ae'mo muki saufa kava'apimo afole ai'niye. 18 Muki ani kava'mo aepa vekamo Goti'a mai'niye. Agaemo Yesu Kalaisiteti'mo agai'a'e'mo alino nanu aeno lateteno'ae'mo agai'a'e'mo alino nanu aeno lapate'niye, huta hapa paisuna ali'ya'amo ago alino lami'niye. 19 Inagi Goti'a Kalaisipi'mo alino ao ya'mo hu male'niya'mofe'mo hosu kava'apilefe'mo vai'mo no'apamiye. Agaemo alino ao ya'mo male'niya gele'mo alagepa huta yagaita atesunafe'mo ali'ya'amo ago alino lami'niye. 20 Ani ali'ya'amo lami'niya'mofe'mo Kalaisi avayamo ali'nonageno'ae'mo Goti'a lavayafati'mo ge huno'ae'mo, lapao ke hove, huno nehiya agufa gemo muki vaya'aife'mo, lapao ke hone, Goti'a ago alino ao ya'mo hu male'niya'mofe'mo lapakaemo alita lapao ya'mo hu male'netapa agae'e'mo magokepi lokaetapa maiyo, huta nehune. 21 Na kava higetaene. Lagaemo Kalaisipi'mo mai'netae'mo Goti fatago kava'amo hamalesunafe'mo Goti'a hosu kava'mo alagi osu'niya vekae'mo hosu kava'mo mai'niye, huno alino hamaleno ate'niye.

Copyright information for `KYG