2 Corinthians 7

Nahau nayamopafi'mo nahau'niya vaya'nimogitapae, hu'na, Goti'a ani kava'mo huguve, huno hu male'niya gemo ago afi'nona'mofe'mo muki hosu kavatimo lagufale'e laipa lagesafi'e'mo o'ani'ya fai'niya yakana huno hane'niya kava'mo aeta kalo paeta atalegetao. Gotife'mo koli nehutae'mo laote kava'mo alita afole aiteta hume hume alagi haita hapaigetao.

Polo'a amogaga ai'niya kavafe'mo hu'niya gemae

Lapakaemo lapaipa lapakesamo aino halo aisigeta maino. Mago vaya'aitegamo hosu kava'mo osu'none. Mago vaya'mo alita hosu huta o'apate'none. Aigofe gemo huteta mago vaya'ai kagemi ya'apimo kumaya o'ali'none. Lapakaepi'mo ali'na fai'na lapatesuvafe'mo mani gemo nehufiye. Ha'ao, hogote'na hu'nae'mo, lapakaemo falisayana lapakae'e'mo magokepi'mo faligune. Afa'a maisayana ani kava huta lapakae'e'mo magokepi'mo afa'a maigune, hu'na hu'nove. Lapakaemo alagepa kava'mo hugae, hu'na lokiya nagesamo afite'nae'mo hu'na ha le'na lapa nepauve. Lusi kava hu'na namogaga ai'na nelapate'nae'mo lapava gemo hu'na hapa nepauve. Naipamo'mo falu hu'niya kava'nimo'mo havai te'niye. Alopa hanageke ya'mo ali'netae'mo nagaemo lusi kava hu'na namogaga ne'auve.

Lagaemo Masetoniya kotegamo eta mai'netae'mo maita falu osu'none. Hanageke ya'mo'a faino ku aino late'nige'apae'mo amega lagufale'mo kame hu'a nelatagetae'mo yu'ilaga laipafi'mo koli hu'none. Hu'nona'monanafa Goti'a apaipamo'mo kana nehiya vaya'ai apaipamo alino falu huno ne'apateya vekamo'a Taitasi'a alino ategeno halate lagaetegamo e'niya kavateti'mo laipamo alino falu huno late'niye. E'niya kavafeke'mo laipamo'mo falu osu'niya'monanafa Taitasi'a lapakaefe'mo aipamo'mo falu hu'niya kava huno laipamo'mo falu hu'niye. Agaemo huno'ae'mo, apakaemo lagesayafe'mo lusi kava huno hapau'nige'a yulagefa ne'aiye. Kagaetefe'mo apayamukiki nehae, huno laha pai'nige'nae'mo mago'e hu'na namogaga ai'nove. Avo'mo kae'na atale'nogetapa alita lekana paita afitetapae'mo lapaipamo'mo kana hu'niya'monanafa ani kavafe'mo nahau osu'nove. Hemenimo nahau osu'nova'monanafa hogote'na ago nahau hu'nove. Afi'novana ani avo'mo alita lekana paita afitetapae'mo lapaipamo'mo kana hu'niya'monanafa afa aise afina'mo lapaipamo'mo kana hu'niye. Lapaipamo'mo kana hu'niya'mofe'mo namogaga o'ai'nofa lapaipamo'mo kana hu'nigetapa lapaipamo alitapa afe le'naya kavafeke'mo hemenimo namogaga ne'auve. Lapakaemo getileti'mo alagepa hutapa o'maisayafe'mo Goti'a hau'niya kavatefe'mo lapaipamo'mo kana hu'niye. 10 Goti'a hau'niya agufa apaipa kana hu'niya kava'mo'a vaya'ai apaipafi'mo hapau osisaya kava'mo'a ali'ya'mo ne'aligeno'ae'mo Goti'a apakufamo alino katino ne'apate. Ma mopafi vaya'mogi apaipamo'mo kana nehiya agufa kava'apimo'a nefaliya kava'mo alino afole aino ne'ate. 11 Afiyo, Goti'a hau'niya agufa lapaipa kana hu'niya kava'mo'a lapaipafi'mo malage huno ali'ya'mo ali'nigetapae'mo lapakaemo hu'naya kavafe'mo he titapa ava ge hutetapa lapakaitapie'mo ge lapautetapa koli lapaipamo kali'nigetapae'mo lapayamukiki hutapa kayo'mo amisayafe'mo hu'nae. Alu alagepa kava alu alagepa kava'mo nehutapae'mo alagi alagepa hutapa alita api aita ate'nae. 12 Avo'mo kae'nova'monanafa hosu kava'mo hu'niya vekae'mo nagesa ala'amo o'afige apakaetegamo hosu kava'mo hu'niya vekalegae'mo nagesa ala'amo o'afige nehu'na avo'mo kae'nove. Goti aulagale'mo lapakaefe'mo lagesamo afi'netae'mo yagaita nelapatona kava'mo ali'na lapave lisugetapa agesayafe'mo mani avo'mo kae'nove.

13 Ani kavatefe'mo laipamo'mo falu hutapa late'nageta Taitasi'a amogaga ai'niya kavafe'mo lusi kava huta lamogaga ai'none. Lapakaemo aipamo alita falu hutapa ate'naya'mofe'mo amogaga ai'niye. 14 Nagaemo Taitasife'mo lapakitapile'mo ali'na asaga hu'na lapate'nova gelefe'mo navagage nosiye. Lapa pai'nona gemo lama gemo hane'niya kava huno Taitasife'mo lapakitapile'mo alita asaga huta lapate'nona gemo afole yategamo afole ai'nigeno lama gemo hane'niye. 15 Taitasi'a koli hutapa atete nehutapae'mo lapaya'mo amitetapa ge'amo afi'naya kavafe'mo agesamo afino ho huteno'ae'mo lapakaefe'mo mago'e huno hau ayamopafi'mo hau'niye. 16 Nagaemo lapakaefe'mo, muki alagepa kava'amo hugae, hu'na nagesamo ne'afuva'mofe'mo namogaga ne'auve.

Copyright information for `KYG