2 Timothy 1

Goti'a, Kalaisi Yesupi'mo maige maige hu'a maisaya ya'mo ali'na apamiguve, huno hu'niye. Mani gelefe'mo, Yesu Kalaisi apa veka'amo maigane, huno naha pai'nige'nae'mo nagaemo Polo'namo ali'ya'amo alisuvafe'mo hau'nigeno navaleno nate'niye. Nahau'niya mafa'ne'nimo Timotigae'mo avo'mo nekaove. Afotimo Goti'e Ala kava netimo Kalaisi Yesu'e'mo fiku kaha mae'ana hanau hu'ana kate'anageno kaipamo'mo falu hino.

Timoti'mo lokiya vaino atesiya agufa gemo ha pai'niya gemae

Naginagomogi Gotife'mo mono ali'ya'amo ali'naya kava hu'na nagupi mafa'nemo'a hosu kava'mo hane, huno nosige'nae'mo mono ali'ya'amo ne'aluve. Ani kava hu'na kagaefe'mo nagesamo ne'afi'nae'mo Gotife'mo muki afina'ae afina'ae'mo okatale'na feluga'e hani'ilaga'e'mo hao ke he'na nunumu'mo nehuve. Kaunumo nelamiya kavafe'mo nagesamo afite'nae'mo kagesugeno'ae'mo naipafi'mo namogaga aisiya ya'mo havai tesiyafe'mo nahau'niye. Kagaefe'mo nagesamo afi'na ho hu'nae'mo, lama ge huno agesa afino fatago hu'niye, hu'na nehuve. Mani agufa lama ge kava'mo hogoteno alemokamo'mo Lovisi aipafi'mo hane'nigeno itakamo'mo Yunisi aipafi'e'mo hane'niya kava huno kagae kaipafi'mo hane'niye, hu'na ago age'nova'mofe'mo lole nagesamo o'afi'nofa magoke nagesamo ne'afuve. Ani kava huka mai'nana'mofe'mo kagesamo afika ho hisanafe'mo kaha nepauve. Nagaemo kagaete'mo naya'mo male'na kate'nogeno'ae'mo Goti'a lokiya'amo ago alino kami'niye. Kami'niya lokiya'amo'mo ata legekana huno yu oseno mago'e huno lesiyafe'mo fu huka kaegeno'ao leno. Na kava nehiya'mofe'mae. Goti'a alino lami'niya Auneme'amo'mo laipafi'mo ali'ya'mo ne'aligetae'mo lamo'ya o'aita himamu'amo ali'neta lahau layamopafi'mo lahau'nigeta lagesamo ne'afuna kavate'mo ne'yagaune. Alino lami'niya'mofe'mo Ala kava netimo faigoko ge'amo aeka hakalo huka hapa paisanafe'mo kavagage osinageka Kalaisi agi'alefe'mo kalavusifi'mo mai'nova vekae'mo kavagage osino. Kavagagemo osinageka faigoko gelefe'mo hanageke ya'mo alisayafe'mo Goti himamu'aleti'mo kanamo aliyo. Nagaemo kana ali'nova kava huka kanamo aligeta'ao. Goti'a lagufamo alino katino latesigeta laote vaya'amo maisunafe'mo keya aeno ge hu'niye. Alagepa ali'ya'mo ali'nona kavateti'mo keya aeno ge osu'nifa nagai'nige'mo hapa maegauve, huno hu'niyanageno'ae'mo fiku laha maeno lamisiya kava'alefe'mo keya aeno ge hu'niye. Ema akeya'vilaga ma mopamo alo osu'niya afina'mo hogoteno Goti'a Kalaisi Yesupi'mo mai'nonageno'ae'mo fiku laha maeno lami'niye. 10 Akeya'vilaga lami'niya'monanafa Yesu Kalaisi'a lagufamo alino katino lateno lahau ne'vaiya vekamo afole ai'nigeno'ae'mo hemenimo ani kava'mo laulagale'mo ago afole ai'nigeta age'none. Agaemo nefaluna kava'mo lokiya'amo alino hano huno ataleteno agai'ae'mo alagepa faigoko ge'aleti'mo maige maige hu'a maisaya ya'mo alino afole aino ate'niye. 11 Goti'a ani faigoko ge'amo ae'na hakalo hu'na hapa nepauva vekamo maige apa veka'amo maige alu nofi vaya'aina ali'na apaya ne'malova veka'amo maige hu'na maisuvafe'mo ago lekana paino nate'niye. 12 Ani ali'ya ne'aluva'mofe'mo mani kanamo ali'na mai'nova'monanafa navagage alagi nosiye. Nagaemo naha maesiyafe'mo ina lafe'mo nagesa afi'na fatago hu'nofi hu'na ago age'na aeto hu'nove. Nagaemo agete'nae'mo ami'nova yate'mo afa'a yagaino nateme nateme ne'viyanageno agai'a afinake'mo afole aigiye, hu'na nagesamo afisuvafe'mo alino nave li'nige'na ago age'nove.

13 Kagaemo ali'na kaya male'nogeka afi'nana gele'mo atafauka alagi huvo. Ani gemo'a kaita haugekana huno ohane'neno vaya'mo alino hapageno ne'apateya gemo akame hisana kava'mo aune'amo ali'na kave li'nove. Kalaisi Yesupi'mo mai'nekae'mo kagesamo afika fatago nehukae'mo kahau kayamopafi'mo kahau'nisigeka ani gemo atafauka alagi huvo. 14 Goti'a faigoko ge'ale'mo yagaika atesanafe'mo alino kami'niye. Ani faigoko ge'ale'mo laipafi'mo mai'niya aote Auneme'amo himamu'aleti'mo yagaika ato.

15 Ago afi'nanana muki Esiya kotega vayanagi Esiya vekala'mo Fiselasi'agi Hemosenisi'agi hu'a ago natale'nae. 16 Ala kava ne'mo'a Onesifolasi'e afamo anaga'a'e'mo hau huno apateno. Onesifolasi'a kalavusifi'mo mai'nova kavafe'mo avagage osu'nigeno Lomu taonifi'mo eno ava'yi huteno lusi kava huno kahauya huno nageno nava teteno'ae'mo muki afina'mo naha maege naha maege huno naha mae'nigeno'ae'mo naipamo'mo falu hu'niye. 18 Efasasi taonifi'mo mai'nogeno'ae'mo muki afina'ae'mo naha mae'niya kava'mo ago age'nane. Nagaemo Ala kava nefe'mo, kagae afina'mo afole aisigekae'mo kahau huka ato, hu'na nunumu'mo hu'na ne'atove.

Copyright information for `KYG