Acts 12

Heloti'mo Yemisi'a kamiti amagiteno Pita'a kalavusi huno ate'niya gemae

Ani afina'mo ala'apimo yagaino ne'apateya kini vekamo Heloti'a siosi vaya'aitegamo lusi hanageke ya'mo apami'niye. Agaemo ati vekae'mo, Uka Yoni agana'amo Yemisi'mo lugo'amo heka hatagauvo, huno ha pai'nigeno uno naipeleti'mo lugo'amo heno hatagau'nigeno fali'niye. Yu vaya'mogimo ani kavafe'mo amuse hu'a ate'nageno Heloti'a afiteno'ae'mo Yu vaya'ai hopa afina'mo ko nosiya peleti mayamo ne'naya afina'mo Pita'mo atafauno kalavusi huno ate'niye. Kalavusi huno ate'nige'apae'mo lole'e lole'e ati vaya'mogi yagai'a ate'a maige'a utesage'apae'mo lole'e lole'e ati vaya'mogi yagai'a atete'a hisayafe'mo sigisitini'a ati vaya'mo avaleno apami'nige'a yagai'a ate'a mai'nae. Heloti'a agesa afino'ae'mo, Pasova hopa afina'mo hano hutesige'nae'mo muki vaya'ai apaulagale'mo Pita'a avaleli'ne'na ategauve, huno agesa afi'niye. Pita'a kalavusifi'mo mai'nige'a ati vaya'mogimo yagai'a ate'a mai'nage'apae'mo siosi vaya'mogimo Goti'a ha maesiyafe'mo lusi kava hu'a nunumu hu'a ate'nae.

Enisole vekamo'a Pita'mo kalavusi nopati'mo avalelino u'niya gemae

Heloti'a, Egamo Pita'mo avaleli'ne'na muki vaya'ai apaulagale'mo agoti hu'na ategauve, huno agesa afi'niya hani'ilagamo Pita'a ati vekala'mo maita'ageno folagapi'mo havae'niye. Lole seli nofitalateti'mo ayatalate'mo ki'a ate'nage'ana lole ati vekala'moganimo kipate'mo yagai'ana ate'ana mai'na'ae. Ala kava ne'mo enisole veka'amo afole ai'nigeno'ae'mo mai'niya kalavusi nopi'mo ha le ya'mo'a aeno ha le'niye. Enisole vekamo'a Pita haopale'mo amagino hauneno ateteno'ae'mo, Malage huka he tiyo, huno ha paiteno aupati'mo alino he tino ate'nigeno'ae'mo lole seli nofitala'mo ayapati'mo aino hatu maeno asagauno ai'niye. Enisole vekamo'a, Mapalukamo alika aeteka sukamo alika vaiyo, huno ha pai'nigeno ani kava'mo hu'nigeno'ae'mo, Alapa'age siotikamo alika vaiteka nakame huka emikeno, huno ha pai'nigeno Pita'a akame huno kalavusi nopati'mo lami'niye. Pita'a, Afa'a ne'ofi alagamuna ne'agofi, huno agesa afi'niye. 10 Anakaemo ati vaya'mo yagai'a mai'naya vaya'mo u'ana ae'ana apakase'ana u'ana mago'e ati vaya'mo yagai'a mai'naya vaya'mo ae'ana apakase'ana taonifilagamo ne'vaya kate aeni kegi'ya hi'yanale'mo u'ana ava'yi neha'ageno'ae'mo aeni kitamo agai'amo aino yaki'nige'ana malaga lami'na'ae. Anakaemo kate'mo ne'u'anae'mo enisole vekamo malage huno ago ataleno u'niye.

11 Ataleno u'nigeno'ae'mo Pita'a agesamo aino halo ai'nigeno'ae'mo, Alagi ago afole ai'niye. Ala kava ne'mo'a enisole veka'amo alino ate'nigeno emineno Heloti ayapati'e Yu vaya'mogimo ani kava hugune, hu'a hu'naya kavapati'e'mo nagufamo ago alino katino nate'niye, huno agesa afi'niye. 12 Ani kavafe'mo agesa afiteno'ae'mo Yoni Maki ita'amo'mo Maliya notegamo u'niye. Asole vaya'mo ani nopi'mo ali'a anupa hu'a mai'ne'apae'mo nunumu'mo hu'a mai'nae. 13 Pita'a uno lafi kitale'mo hakalu hakalu huno amagi'nigeno'ae'mo ali'ya'mo ne'aliya a'mafa'nemo agi'amo Lota'a afiteno emine'niye. 14 Emineno Pita'a agemo ai'nigeno afiteno'ae'mo, Pita'a ago eno mai'niye, huno huteno lusi kava huno amogaga ne'aino'ae'mo lafi kitamo o'yakino aino atagi neno nagu nagu huno haino, Pita'a kumatega ago eno mai'niye, huno hapa pai'niye. 15 Hapa pai'nige'apae'mo, Negi gemo nehane, hu'a hu'nageno'ae'mo, Ha'ao, alagi lama gemo nehuve, huno mago'e mago'e huno hu'nige'apae'mo Pita enisole'amo eno mai'negaiye, hu'a hu'nae.

16 Pita'a mago'e huno hakalu hakalu huno kitale'mo amagino mai'nige'a afite'a u'a lami'a kitamo yaki'a Pita'mo agete'apae'mo lusi kava hu'a hapau ai'nae. 17 Pita'a ayateti'mo huno'ae'mo, ge osiyo, huno hapa paiteno'ae'mo Ala kava ne'mo'a kalavusi nopati'mo avalelino e'niya kavafe'mo ava gemo huno hapa paiteno'ae'mo, Utapa ani gemo Yemisi'e muki konagatimogi'efe'mo hapa paiyo, huno hapa paiteno apataleno alu kotegamo u'niye.

18 Kotilamiyapi'mo ati vaya'mogimo agayana Pita'a o'mai'nige'a agete'apae'mo u'a lagauge e'a lagauge hu'a lusi kava hu'a kahauya hu'nae. 19 Heloti'a, kahauya hutapa ageyo, huno hapa pai'nige'apae'mo lusi kava hu'a kahauya hu'naya'monanafa o'age'nae. Agaemo Pitate'mo yagai'a mai'naya ati vaya'aife'mo apakenoka huno apafi geno'ae'mo, apamagige'a faliyo, huno hapa pai'niye. Agaemo apatalenuno Yutiya kotegati'mo lamino Sisaliya taonifi'mo mai'niye.

Heloti'a ago fali'niya gemae

20 Heloti'a mago afina'mo Taiya taonifi vaya'e Saitoni taonifi vaya'e'mo aipamo leno apate'niye. Apakaemo Heloti'a yagaino ne'apateya kotegati'mo u'a ne'ya'mo miya faili'a ne'aya'mofe'mo aipamo'mo falu hisiyafe'mo magoke apaipa apakesa alite'a Helotitegamo e'nae. E'apae'mo hogote'a Milasitasi'a Heloti no'ale'mo ne'yagaiya vekae'mo agesamo ali'a ha paite'a Helotitegamo e'nae.

21 Mago lekana pai male'niya afina'mo Heloti'a yagaino ne'apateya kukena'amo alino vaiteno yagaino ne'apateya siate'mo haino mai'neno'ae'mo asole gemo hapa pai'niye. 22 Hapa pai'nige'a afite'apae'mo, vaehae, hu'a, vayalafa'mo'a laha nopaifa mago gotitimoke'mo ani gemo laha nepaiye, hu'a alopa gefati'mo hu'nae. 23 Nehageno'ae'mo Ala kava ne'mo enisole veka'amo'mo emineno Heloti'mo amagi'nigeno hagifamo'a agufafi'mo ne'nigeno fali'niye. Agaemo Goti agi'ale'mo alino asaga huno o'ate'niya'mofe'mo ago amagi'nigeno fali'niye. 24 Inagi Goti ge'amo mago'e mago'e huno aino atagu faenuneno hu'nigeno mago'e huno afole ai'niye.

25 Manamasi'e Solo'e'mo ali'ya'animo ali'ana hano hute'anae'mo Yulusalemu taonimo atale'ana Yoni Maki'a avaleli'ana atagi ne'ana e'na'ae.

Copyright information for `KYG