Acts 2

Goti Auneme'amo alino ate'nigeno emine'niya gemae

Yu vaya'ai hopa afina'mo agi'amo Petikosi afina'mo afole ai'nige'apae'mo muki apakesa afi'a fatago nehaya vaya'mo magoke apaipa apakesa alite'a mago nopi'mo ali'a anupa hu'a mai'nae. Mai'nageno'ae'mo malage huno koku'napati'mo lusi yasimo aliteno age aigekana huteno mai'naya nopi'mo faleno haino havai te'niye. Agayana ata vaikana ya'mo'a aino atagu faeno aote aote huno muki vaya'ai apakufale'mo le'nige'a age'nae. Goti Auneme'amo aote Auneme'amo'mo muki vaya'ai apaipafi'mo faleno haino havai teteno apavenafu'namo alino afe le'nige'apae'mo alu apake alu apakemo aepa fai'a ai'nae. Ani afina'mo Yu vaya'mo mono nehaya afina'moge'a muki kotegati'mo ete ete hu'a Yulusalemu taonifi'mo mai'nae. Alu apake alu apakemo ai'nage'a asole vaya'mogi afite'apae'mo e'a ali'a anupa hu'a mai'nage'apae'mo ke'apifati ke'apifati'mo hu'nage'a afite'apae'mo, na kava afole ai'nifi, hu'a hute'a alu apakesa alu apakesa afi'nae. Afi'a hapau aite'apae'mo ani apakee'mo apakesa afifi hu'nige'a, Ani apake ne'aiya vaya'mo Galeliya kotega vaya'mo mai'nayana haiya kava hu'nige'apae'mo itati afotimogi gefati'mo nehageta muki vaya'amogita lagaiti getifati getifati'mo ne'afune. Lagaemo Patiya vaya'mo eta maige Mitiya vaya'mo eta maige Elami vaya'mo eta maige Mesopotemiya vaya'mo eta maige Yutiya vaya'mo eta maige Kapanosiya vaya'mo eta maige Ponitasi vaya'mo eta maige Esiya vaya'mo eta maige 10 Filisiya vaya'mo eta maige Pamifiliya vaya'mo eta maige Isipi vaya'mo eta maige Sailini taoni haopalega Lipiya kotega vaya'mo eta maige Lomu vaya'mo eta maige huta eta mai'nona vaya'mo mai'none. 11 Lagaemo Yu vaya'e alu nofi vaya'mogita Yu mono kava'mo akame nehuna vaya'e'mo eta mai'none. Lagaepati'mo Kaliti vaya'mo eta maige Alapi vaya'mo eta maige huta eta mai'nona'monanafa lagae gefati'mo Goti'a lokiya kava'mo himamu'aleti'mo hu'niya kavafe'mo ava gemo nehageta ne'afune, hu'a hu'nae. 12 Muki vaya'mogi afi'a hapau ne'ai'a apakesa ala'amo afite'apae'mo apakai'api apakai'apimo hu'apae'mo, Ani kava'mo aepa'amo na agufa kavane, hu'a apafi ge apafi ge hu'a mai'nae. 13 Hu'a mai'naya'monanafa mago vaya'amogi hu'apae'mo, Lusi ani'mo nete'apae'mo negi ne'malae, hu'a hu'a faipa hu'a apate'nae.

Pita'a aeno hakalo huno hapa pai'niya gemae

14 Ani gemo hu'nageno'ae'mo Pita'a leveni'a apa vaya'e'mo lokaeno mai'neno he tino muki vaya'aife'mo aepa faino alopa gefati'mo hapa paino'ae'mo, Yu vaya'nimogitapa'e Yulusalemu taonifi'mo mai'naya vaya'mogitapa'e'mo ge'nimo afiyo. Ani kava'mo aepa'ae'mo lapa paiguvanagi afiyo. 15 Lapakaemo, Ani vaya'mogi ani'mo nete'a negi ne'malae, hutapa lapakesa ne'afiya'monanafa hemenimo netepi'mo yegemo ago leno hakale hu'niya afina'moge'a negimo no'malae. 16 Negimo no'malafa mago vekamo agi'amo Yoveli'a Gotitegati gemo alinineno aeno hakalo huno hapa nepaiya vekamo'a avo'mo kae male'niya gemo hemenimo ago afole ai'niye. Yoveli'a hapa paino'ae'mo,

17 Goti'a huno'ae'mo, Hano hisiya afina'mo Naune'name'mo ali'na muki ve a'ne'aina ani'mo lakigekana hu'na apamiguve. Mafa'netapi'e a'mafa'netapimogi'e'mo nagaetegati gemo ali'a ae'a hakalo hugae. Neya vetapimogimo alagamuna agegegana hu'a agegae. Kosunatapimogimo alagamuna afa'a agegae. 18 He, ali'ya'nile'mo mai'naya ve a'ne'aitegamo Naune'name'mo ali'na ani'mo lakigekana hu'na apamisuge'a ali'ne'a nagaetegati gemo alini u'a ae'a hakalo hu'a hapa paigae. 19 No'agaya agufa kava'mo koku'napati hute'na ali'na apave liguve. Ma mopafi'mo alu kava'mo hu'na ali'na apave liguve. Atamo leteno halina aisigeno yegemo olegaiye. Kaimo'a haesa'age huteno kolakana nehisigeno Ala kava ne'mo afina'mo hogote afina'amo afole aigiye. 21 Afole aisige'apae'mo muki vaya'mogi Ala kava ne'mo agi'amo aesaya vaya'ai apakufamo alino katino apategaiye,
huno hu'niye.
22 Isaleli vaya'mogitapamo ge'nimo afiyo. Yesu'a Nasalasa kotega vekae'mo ava gemo hu'na lapa paisuvafe'mo huve. Goti'a Yesuteti'mo lokiya kava'mo huge no'agaya agufa aune kava'mo huge alu kava'mo huge huno hu'niya kavateti'mo huno'ae'mo, nagaetegati'mo emine'niya vekae huno alino lapave li'niye. Yesu'a lapakae folagapi'mo ani kava'mo ago hu'nigetapa age'nae. 23 Hogoteno Goti'a agesa afi'neno'ae'mo, ani kava'mo afa'a afole aigiye, huno ge hu male'neno'ae'mo ago alino lapayapi'mo ate'niye. Ate'nigetapa avalelitutapa hosu vaya'mo ke'aepa gemo akame nosaya vaya'ai apayapi'mo ate'nae. Lapakaemo ani vaya'ai apayateti'mo Yesu'mo malipu yosale'mo nili aitetapa alita he titapa atetetapa kamiti amagi'nae. 24 Fali'nigeno'ae'mo Goti'a fali'niya nofipati'mo hatu maeno ateteno kanolufati'mo ago alino he tino ate'niye. Fali'niya kava'mo'a alagi afa'a atafauno o'ategaiye. 25 Laginago vekamo Nevini'a Yesufe'mo ava gemo huno'ae'mo,

Nagaemo muki afina'mo Ala kava ne'mo naulagale'mo mai'nige'na age'nove. Lamaga nayate'mo mai'niya'mofe'mo atete osuguve.
26 Mai'niya'mofe'mo naipafi'mo namogaga ne'auve. Navayafati'mo namogaga ne'auve. Navayagunagu hu'na agava ne'mauvanageno nagufa'ni'e'mo alagepa huno hanesige'na mai'na falu huguve. 27 Kagaemo ani kavatefe'mo nagupi mafa'nemo kanolufi'mo afa'a o'natalegane. Kagaemo hukae'mo aote ne'nimo agufamo atalesugeno okasaligiye, huka hu'nane. 28 Kagaemo maige maige hu'na maisuva ka'mo ago alika nave li'nane. Kaulagale'mo naipafi'mo namogaga ne'aiya kava'nimo alika maleka havaiteka nategane,
huno avo'mo kae male'niye.
29 Vaya'nimogitapae, huno, Nevini'a ani gemo hu'niya'monanafa laginago vekamo Nevini'a fali'nige'apae'mo ki'a ate'naya kanolu'amo hemenimo lagaetegamo afa'a hane'niye. 30 Nevini'a aune vekamo mai'nigeno'ae'mo Goti'a ha paino'ae'mo, kaginago vayapati'mo Kalaisi ne'mo ali'na he ti'na atesugeno kini vekamo mai'neka ne'yagaina kava huno kini vekamo mai'neno yagaino apategaiye. Lama gemo nehuve, huno hu male'niye. 31 Nevini'a afole aisiya kava'mo age'neno'ae'mo Kalaisi ne'mo fali'niyateti'mo he tisiya kavafe'mo huno'ae'mo, naune'name'nimo kanolufi'mo o'natalegane, huno hu'niya'mofe'mo Kalaisi agufa'amo okasali'niye. 32 Goti'a mani vekamo Yesu'mo ago alino he tino ate'nigeta ageteta aeta hakalo huta hapa nepauna vaya'mo mai'none. 33 Goti'a ago alino he tino ateteno koku'napi'mo avalelino haino lamaga haopale'mo ate'nigeno mai'niye. Muki ya'mo Afo'amo'mo hogoteno, ali'na kamiguve, huno ha pai'niya Auneme'amo ago alino ami'nigeno Yesu'a Goti Auneme'amo alino ani'mo lakigekana huno ate'nigeno emine'nigetapae'mo hemenimo lapakaemo ago agetetapa afi'nae. 34 Nevini'a koku'napi'mo ohai'niya'monanafa ani gemo huno'ae'mo,

Ala kava ne'mo'a ala kava ne'nie'mo ha paino'ae'mo, Lamaga nahaopale'mo fai mai'nege'nao kame vayakamo apamagite'na ali'na kaiya afe'alumelaga apateno,
huno avo'mo kae male'niye.
36 Lagaemo muki Isaleli vaya'mogitamo ani kavafe'mo laipafi'mo lagesa afita fatago higetao. Goti'a ani vekamo Yesu'mo ago nili aitetapa alita he titapa ate'naya vekae'mo, Ala kava nene, hu'na atete'na Kalaisi nene, hu'na lekana pai'na ate'nogeno emine'niya vekae, huno hu'niye, huno hapa pai'niye.

37 Ani gemo afi'nageno'ae'mo apaipafi'mo ae'nige'a Pita'e muki apa vaya'efe'mo, Vayatimogitapae, hu'a, haiya kava hisune, hu'a apafi ge'nae. 38 Pita'a, Lapaipamo alitapa afe letetapa Yesu agi'aleti'mo ani'mo falegeno'ao Goti'a hosu kavatapimo alino ataleteno Auneme'amo fiku lapamaeno lapamino. 39 Goti'a, Naune'name'mo ali'na lapamiguve, huno hu'niya polomasi ge'amo lapakae'enagi mafa'ne anagatapi'enagi afagi'ale'mo mai'naya vaya'efenagi huno hapa pai'niye. Ala kava netimo Goti'a eyo, huno muki keya aeno ge hisiya vaya'aife'mo ani gemo hapa pai'niye. 40 Huno hapa paiteno'ae'mo Pita'a mago'e mago'e gemo huno apakesa alino aeno hakalo huno hapa paiteno'ae'mo, Ehetapiye, huno, Goti'a hosu kava'mo nehaya vaya'mo kayo'mo apamisiyategati'mo ataletapa lapaune hetaletapa vigeno'ao lapakufamo alino katino lapateno, huno hapa pai'niye. 41 Hapa pai'niya ge'ae'mo apakesa afi'a fatago hute'a apamogaga ai'nage'apae'mo ani'mo fale'a apate'nae. Ani afina'mo asole vaya'mo tali tauseni'a vaya'mo Goti mafa'nemo hamale'nageno Goti'a apakae'e'mo magokepi alino anupa huno apate'niye. 42 Apa vaya'mogimo Goti ge'amo alagepa hu'a ali'a apaya male'nage'a afige apakae'e'mo afalu afalu hu'a alagepa hu'a magokepi lokae'a maige Ala kava ne'mo kave'mo nege nunumu'mo huge nehu'apae'mo atafau'a alagi hu'a mai'nae.

Apakesa afi'a fatago nehaya vaya'ai kavafe'mo hu'niya gemae

43 Ani kava'mo hu'a mai'nage'apae'mo muki vaya'mogimo hapau ne'ai'a koli hu'nage'apae'mo apa vaya'mogimo muki no'agaya agufa lokiya kava'mo hu'nae. 44 Muki apakesa afi'a fatago nehaya vaya'mo magokepi lokae'a mai'ne'a kagemi ya'apimo ali'a fako hu'a apakai'apimo apamite'apae'mo nagai'ni ya'mo hane'niye, hu'a osu'a mai'nae. 45 Kagemi ya'api'e mopa'api'e'mo ali'a maketi hu'a moni alite'a apakae vayapati'mo mago ya'apimo ohane'niya vaya'mo ani monimo ali'a apami'nae. 46 Muki afina'ae afina'ae'mo magoke apaipa apakesa ali'a mai'ne'a Yu vaya'ai alopa mono nopi'mo hai'a ali'a anupa hu'a maige apaote apaote hu'a no'apifi'mo Yesu kave'mo nege magokepi'mo lokae'a mai'ne'a nege hu'a mai'nae. Ne'ya'mo ne'ne'apae'mo apamogaga aite'a yagu yaga apaipamo kali'a mai'ne'a 47 Goti agi'ale'mo ali'a asaga hu'a mai'nae. Muki vaya'mogimo Goti mafa'ne'aife'mo hapao ke he'nage'apae'mo alagepa hu'a mai'nae. Ala kava ne'mo'a muki afina'ae afina'ae'mo mago vaya'ai apakufamo alino katino apateteno siosi vaya'a'e'mo magokepi alino anupa huno apate'niye.

Copyright information for `KYG