Acts 21

Polo'a Yulusalemu taonifi'mo u'niya gemae

Lagaemo apataleta sipifi'mo haita mai'neta ani'mo lakaeta Kosi ani ago'nanenafi'mo uta ava'yi huteta egamo ataleta Losi ani ago'nanenafi'mo uta ava'yi huteta ataleta Patala ani ago'nanenafi'mo uta ava'yi huteta sipifati'mo lamita mai'none. Alu sipimo Finisiya kotegamo ugefe'mo hu'nigetae'mo ani sipifi'mo haita mai'neta ani'mo lakaeta ne'utae'mo mago ani ago'nanenamo agi'amo Saipalasi ko'mo hoga aupilaga hane'nigeta ageteta aeta agaseta Siliya kotegamo Taiya taonifi'mo sipifi hane'niya kagemi ya'mo ali'a malegefe hu'naya taonifi'mo uta ava'yi huteta lami'none. Lamiteta Ala kava ne'mo ge'amo ne'afiya vaya'aife'mo kahauya huta apaketetae'mo apakae'e'mo magoke salemo lokaeta mai'none. Goti Auneme'amo'mo hapa pai'nige'a Polofe'mo, Yulusalemu taonifi'mo ohaiyo, hu'a ha pai'nae. Apakae'e'mo lokaeta mai'nona afina'mo ago hano hu'nigeta apataleta u'none. Apakaemo muki ve a'ne'e mafa'ne'api'e lagae'e'mo taonifati'mo ataleta magokepi lokaelita uta ani agi'nale'mo lale'ya fai'neta nunumu'mo hutetae'mo maitaleyo, huta hu'nonage'apae'mo, He, utaleyo, hu'a hu'nageta apataleta sipifi'mo haita mai'nonage'apae'mo no'apilegamo ai'a atagi ne'a u'nae.

Taiya taonifati'mo ataleta ani'mo lakaeta Tolemesi taonifi'mo uta ava'yi huteta lamita konagatimogife'mo ge apamamaeteta apakae'e'mo magoke afina'mo lokaeta mai'none. Egamo Polo'a avagi hu'nona vaya'mo apakaemo apataleta Sisaliya taonifi'mo uta ava'yi huteta Filipi'a umenitata huno alagepa faigoko gemo aeno hakalo huno hapa nepaiya vekamo nopi'mo haita agae'e'mo lokaeta mai'none. Filipi'a seveni'a vaya'mo Yulusalemu taonifi'mo lekana pai'a apate'naya vayapati vekamo mai'niye. Lole'e lole'e a'mafa'ne anaga'mo vele o'mai'naya a'mafa'nemogi Gotitegati gemo alini'e'a ae'a hakalo hu'a hapa nepaiya a'mafa'nemo mai'nae. 10 Mago'e afina'mo mai'nonageno'ae'mo mago vekamo agi'amo Agamasi'a Gotitegati gemo alinineno aeno hakalo huno hapa nepaiya vekamo Yutiya kotegati'mo lagaetegamo eno ava'yi hu'niye. 11 Agaemo Polo mapalu'mo alino agai'a aiyalate'e ayatalate'e'mo ki male'neno'ae'mo, Goti Auneme'amo'mo ina ge huno'ae'mo, ani kava hu'a Yulusalemu taonifi'mo mai'naya Yu vaya'mogimo mani mapalu'mo afo'amo'mo nofi ki'a atete'apae'mo alu nofi vaya'mo avale'a apamigae, huno hu'niye, huno laha pai'niye. 12 Ani gemo afitetae'mo lagae'e magokepi lokae'a mai'naya vaya'e'mo Polofe'mo hao ke hetae'mo, Yulusalemu taonifi'mo ohaiyo, huta ha pai'none. 13 Polo'a getile'mo aeno atagaina huno laha paino'ae'mo, na kava higetapae'mo nagaefe'mo avi'ya hutetapa naipamo'mo kana hisiya ya'mo alitapa ne'namiye. Yulusalemu taonifi'mo nofi ki'a natesayafeke'mo alo hu'na o'mai'nofa Ala kava ne'mo Yesu agi'alefe'mo falisuvafe'mo alo hu'na mai'nove, huno laha pai'niye. 14 Lagaemo Polo agesamo o'ali'nona'mofe'mo, Ala kava ne'mo'a hu male'niya kava'mo afa'a afole aino, huta hu'none.

15 Mago'e afina'mo mai'netae'mo kagemi yatimo alita alo huta aliteta Yulusalemu taonifi'mo haisunafe'mo u'none. 16 Mago Sisaliya vaya'mo ge'amo ne'afiya vaya'mogimo lagaemo lavaleli'u'a Nesoni nopi'mo maigae, hu'a hute'a no'afi'mo late'nae. Nesoni'a Saipalasi kotega vekamo akeya'vilagamo agesa afino fatago hu'niya vekamo mai'niye.

Polo'a Yemisitegamo u'niya gemae

17 Lagaemo Yulusalemu taonifi'mo uta ava'yi hu'nonage'apae'mo konagatimogimo apamogaga aite'a ali'a falu fala hu'a late'nae. 18 Ega'amo Polo'e lagae'e'mo Yemisitegamo u'nonage'apae'mo Yemisi'e vayatama vaya'e'mo mai'nae. 19 Polo'a ge apamamaeteno Goti'a ha mae'nigeno alagepa ali'ya'mo ali'nigeno'ae'mo alu nofi vaya'aitegamo afole ai'niya kavafe'mo ava gemo huno hapa pai'niye. 20 Ani gemo afite'apae'mo muki'amogi Goti agi'ale'mo ali'a asaga hu'a ate'nae. Apakaemo Polofe'mo, konagatimogae, hu'a, asole Yu vaya'mogimo apakesa afi'a fatago hute'apae'mo ke'aepa gemo apayamukiki hu'a akame nehae. 21 Mago vaya'mogi kava gemo hu'apae'mo, Polo'a alu kotega mai'naya Yu vaya'aife'mo, Mosese ke'aepa gemo ataleyo. Mafa'netapimo apakufamo lagautapa apatetetapa Yu vaya'ai kava'mo osiyo, huno hapa nepaiye, hu'a hapa pai'nage'a afi'nae. 22 Polo'a ago eno ava'yi hu'niye, hu'a hisage'a afigaya'mofe'mo lagaemo haiya kava hugune. 23 Kaha paisuna gemo akame huvo. Lole'e lole'e vaya'mogimo Gotife'mo, ani kava'mo hugune, hu'a lokiya gemo ago hu male'naya vaya'mo manile'mo mai'nae. 24 Kagaemo apakae'e'mo magokepi lokaelika haika kagae kagufa'e apakae apakufa'e'mo Goti aulagale'mo alitapa alagepa huta lapatesayafe'mo mono nopi'mo haiyo. Hapa maeka miya faika apato. Kava'apimo hano hisige'apae'mo apayoka'mo lagau'a apategae. Ani kava'mo hisanage'a agete'apae'mo, Polofe'mo aigofe ava gemo hu'nae. Polo'a alagepa kava'mo huno Mosese ke'aepa gemo akame nehiye, hu'a hugae. 25 Kagaemo ani kava'mo hugana'monanafa alu nofi vaya'mogimo apakesa afi'a fatago hu'naya vaya'aitegamo lagaemo avo'mo kaeta atale'nonageno u'niye. Ani gemo lagaemo avo'mo kaeteta, Vegemo hutae'mo ne'ya'mo aigofe Goti'apimogi ali'a ne'apamiya ne'ya'mo o'neyo. Muki ya'mo kola'amo o'neyo. Lugo'afi'mo nofi aesageno falisiya afumo'a agufafati'mo kola'amo ali'a laki'a o'atale'nisaya afumo o'neyo. Kumai kava'mo osiyo, huta avo'mo kaeta atale'none, hu'a ha pai'nae. 26 Ani gemo hu'naya'mofe'mo Polo'a ega'amo apavalelinuno mono kava'mo huno agae agufa'e apakae apakufa'e'mo alino alagepa huno apate'niye. Agaemo ani Yu vaya'ai mono kava'mo huteno Yu vaya'ai alopa mono nopi'mo haino mono hu'a ne'apataya vaya'aife'mo, seveni'a afina'mo utesigeno alita alagepa huta nelatona kava'mo hano hugiye. Alo hutapa mai'netapa hano hisigetapae'mo ofalinimo alitapa amitapa lateyo, huno hapa pai'niye.

Polo'a kalavusi hu'a ate'naya gemae

27 Seveni'a afina'mo hano hisiyafe'mo hu'nige'apae'mo mago Esiya kotega Yu vaya'mogi age'nayana Polo'a alopa mono nopi'mo haino mai'nige'a age'nae. Apakaemo muki vaya'mo ali'a he ti'a apatete'a u'a Polo'mo atafaute'apae'mo, 28 Isaleli vaya'mogitapae, hu'a, Laha maeyo. Ani vekamo'a Yu vaya'mogitae'mo hosu lava gemo huge Mosese ke'aepa ge'ae'mo hosu gemo hane'niye, huno huge mani alopa mono nofe'mo hosu ge huge huno muki kotegamo alino apaya ne'male. Agaemo hemenimo mago alu nofi vaya'mo apavalelineno lagae laote mono notimo alino hosu huno ate'niye, hu'a hapa pai'nae. 29 Ani vaya'mogimo Efasasi taonifi vekamo Tilofimasi'e Polo'e'mo taonifi'mo mai'na'age'ana anakete'anae'mo alopa mono nopi'mo avalelino e'niye, hu'a apakesa afi'naya'mofe'mo ani gemo hu'nae. 30 Muki Yulusalemu taonifi'mo mai'naya vaya'mogimo lusi kava hu'a apano aete'apae'mo nagu nagu hu'a u'a ali'a anupa hute'a alopa mono nopi'mo hai'a Polo'a atafau'a he'a vayu huli'a kumatega lami'nae. Kumatega he'a vayu huli'a nelamige'apae'mo malage hu'a alopa mono nopi kitamo ki'nae. 31 Apano ae'naya vaya'mogimo hu'apae'mo, faligiye, hu'a hute'a ne'amagigeno'ae'mo mago vekamo'a Lomu ati vaya'aite'mo yagaino ne'apateya vekalegamo uno ha paino'ae'mo, Muki Yulusalemu vaya'mogi apano ne'ae, huno ha pai'nigeno'ae'mo 32 malage huno ati vaya'e ati vaya'aite'mo yagai'a ne'apataya vaya'e'mo apavalelino nagu nagu huno lami'niye. Ani amagi'naya vaya'mogimo agae'e ati vaya'a'e'mo apakete'apae'mo Polo'a mago'e hu'a o'amagi'a afa'a ate'nae. 33 Ati vaya'aite'mo yagaino ne'apateya hogote vekamo'a Polo haopale'mo uno mai'neno'ae'mo, Lole seli nofitalateti'mo kitapa ateyo, huno hapa pai'niye. Agaemo ani vaya'aife'mo, Ina la'mo mai'neno'ae'mo na kava hu'niye, huno apafi ge'niye. 34 Mago vaya'amogimo alopa gefati'mo mago alu gemo hu'a huge mago vaya'amogimo alopa gefati'mo alu gemo hu'a huge hu'a mai'nae. Lusi gemo nehu'a kalekale gemo hu'nageno yagaino ne'apateya hogote vekamo'mo afole ai'niya kava'mo aepa'amo alagepa huno o'afi'niya'mofe'mo ati vaya'aife'mo, Avalelitutapa lagae yafa nopi'mo ateyo, huno hapa pai'niye. 35 Avaleli'a yafa no ku'yale'mo u'a ava'yi nehage'apae'mo ani vaya'mogimo lusi apayamukiki hu'a e'naya'mofe'mo ati vaya'mogi Polo'mo avale ali'a asagauli'a hai'nae. 36 Apakame hu'a ne'e'apae'mo lokiya gefati'mo, amagigeno falino, hu'a hu'nae.

Polo'a agai'amo ge huno ha maeno hapa pai'niya gemae

37 Ati vaya'mogi Polo'a yafa nopi'mo avaleli'a haigefe'mo nehageno'ae'mo Polo'a yagaino ne'apateya hogote vekae'mo, Mago gemo afa'a kaha paisufiye, huno afi ge'nigeno'ae'mo, Galiki gefati'mo nehapiye. 38 Nagaemo kagaefe'mo nagesa afi'nae'mo, Isipi vekamo saufamo egatomo gamani vaya'mo alita hapafaitalegaune, huno huteno fo tauseni'a vaya'mogimo vaya'mo ne'apaiya naipemo ali'naya vaya'mo apavalelino ka'me kotega u'niya vekae, hu'na nagesa afi'nove, huno ha pai'nigeno'ae'mo 39 Polo'a, Nagaemo Yu vekamo Tasasi taonimo Silisiya kotegamo hogote taonifi vekamo mai'nove. Kahao ke hove. Vaya'aife'mo ge'nimo hapa paigesuve, huno ha pai'nigeno'ae'mo, 40 yagaino ne'apateya hogote vekamo'a, he, huno ha pai'nigeno Polo'a ku'yaleti'mo he tino aya'mo atale'nige'apae'mo mago'e hu'a ge osu'nageno'ae'mo Yu gefati'mo hapa pai'niye.

Copyright information for `KYG