Acts 25

Polo'a, Sisake'mo agoti huno nategaiye, huno hu'niya gemae

Fesitasi'a yagaino apatesiya kotegamo eno ava'yi huteno lole'e mago'e afina'mo utegeno Sisaliya kotegamo ataleno Yulusalemu taonifi'mo eno ava'yi hu'niye. Eno ava'yi hu'nige'apae'mo mono hu'a ne'apataya vaya'aite'mo yagai'a ne'apataya vaya'e Yu vaya'aite'mo yagai'a ne'apataya vaya'mogi'e'mo e'a Fesatasife'mo, Polo'a hosu kava'mo hu'niye, hu'a ha paite'a agoti hu'a ate'nae. Apakaemo hu'apae'mo, Polo'a kate'mo ne'esigetae'mo kafo yagai'neta amagigune, hu'a vegemo hu'naya'mofe'mo kahao ke hone, Polo'a Yulusalemu taonifi'mo avalelika eno, hu'a ha pai'naya'monanafa Fesitasi'a, Ha'ao, huno, Polo'a Sisaliya kotega kalavusifi'mo mai'nisige'na aise afina'mo lamiguve. Nagae'e kava vayatapi'e'mo magokepi lokaeta ugune. Polo'a hosu kava'mo hu'nisiyana agoti hu'a ategae, huno hapa pai'niye.

Fesitasi'a naya lole'a afina'mo maiteno apakae'e'mo Sisaliya kotega lami'niye. Egamo agoti hu'a ne'apataya nopi'mo haino fai mai'neno'ae'mo, Polo'a avalelika eno, huno ha pai'niye. Polo'a eno mai'nige'apae'mo Yu vaya'mo Yulusalemu taonifati'mo e'naya vaya'mogimo he ti'apae'mo, Ani vekamo'a lusi hosu kava'mo nehiya vekamo mai'niye, hu'a hute'a agoti hu'a atege atege hu'a mai'naya'monanafa hosu kava'amo afa'a ali'a ave oli'nae. Polo'a agai'amo huno ha maesiya gemo huno'ae'mo, Nagaemo Yu vaya'ai ke'aepa gemo amagi'na o'atalege Yu vaya'ai alopa mono nofe'mo hu'na faipa hu'na o'atege Lomu vaya'ai kava ne'apilegamo mago hosu kava'mo osuge hu'nove, huno hapa pai'niye.

Fesitasi'a Yu vaya'mogimo agaefe'mo amuse hu'a atesayafe'mo Polofe'mo, Yulusalemu taonifi'mo hai'na agoti hu'na katesuvafe'mo afa'a haigapiye, huno afi ge'nigeno'ae'mo, 10 Lomu vaya'ai ala kava ne'apimo agoti nopi'mo mai'nove. Manileke'mo afa'a agoti hu'a nategae. Ago afi'nanana Yu vaya'aitegamo mago hosu kava'mo osu'nove. 11 Ke'aepa gemo amagi'na atale'nofi namagisage'na falisuva kava'mo hu'nisufige'a afa'a namagisage'na faliguva'monanafa agoti hu'a ne'nataya gemo aigofe gemo hane'nisiyana magoke vekamo'a nagaemo navalelinuno apayapi'mo o'nategaiye. Sisa'a gamani vaya'aite'mo hogote kava ne'apimo'a afa'a alino fako huno ne'nateno agoti huno nategaiye, huno ha pai'niye. 12 Fesitasi'a ani gemo afiteno'ae'mo uno kanisole vaya'e'mo ge huge afige huteno'ae'mo, Gamani vaya'ai kava ne'apimo hogote vekamo'a alino fako huno nateteno agoti huno nategaiye, huka hu'nana'mofe'mo Sisategamo ugane, huno ha pai'niye.

Ala kini vekamo Agalipa'a Fesitasitegamo e'niya gemae

13 Mago afina'mo utege'ana mago ala kini vekamo agi'amo Agalipa'e a'amo Menisi'e'mo Sisaliya kotegamo Fesitasi'a agesa'afe'mo e'na'ae. 14 Mago afina'mo maita'ageno'ae'mo Fesitasi'a ala kini vekae'mo Polo ava gemo huno ha paino'ae'mo, Filikisi'a mago vekamo kalavusi huno ate'nigeno mai'niye. 15 Yulusalemu taonifi'mo u'na mai'noge'apae'mo Yu vaya'mo mono hu'a ne'apataya vaya'aite'mo yagai'a ne'apataya vaya'e yagai'a ne'apataya vayatama vaya'mogi'e'mo, Hosu kava'mo hu'niye, hu'a hute'a agoti hu'a atete'apae'mo, amagigeno falino, hu'a naha pai'nae. 16 Naha pai'naya'monanafa, Ha'ao, Lagaemo Lomu vaya'mogita ani agufa kava'mo nosune. Hogoteta agoti hu'a atesaya vekamo agotimo huta ategaune hu'a hu'naya vaya'ai apaulagale'mo alita he tita ate'nonageno agai'amo ha maesiya agufa gemo higeta ne'afune, hu'na hapa pai'nove. 17 Ani vaya'mo manile e'a mai'nage'nae'mo afa'a o'mai'nofa egamo agoti nopi'mo hai'na mai'ne'nae'mo, Kalavusifi mai'niya vekamo avalelika eno, hu'na ha pai'nove. 18 Avalelino e'nige'apae'mo agoti hu'a ategefe hu'naya vaya'mogimo he ti'a mago gemo hu'apae'mo, Polo'a ina hosu kava'mo hu'niye, hu'a hute'a agoti hu'a atesafi hu'na nagesa afi'novana ani agufa gemo osu'nae. 19 Apakaemo mono gee'mo ge haute'a mago vekamo Yesu'a fali'niye, hu'a hu'nageno Polo'a afa'a mai'niye, huno hu'niya'mofe'mo ge hau'nae. 20 Ani gemo hu'nage'na afite'nae'mo haiya kava hu'na ani gemo aepa'amo afiguve, hu'na nagesa afi'nove. Afite'na Polofe'mo, Mani kavatefe'mo agoti hu'a katesayafe'mo Yulusalemu taonifi'mo afa'a haigapiye, hu'na afi ge'nogeno'ae'mo 21 ha'ao, ala kini vekamo Sisa Agasasi'a hogote vekamo'a agoti huno nategaiye, huno naha pai'niya'mofe'mo nagaemo ati vekae'mo, yagaika ate'nege'nao Sisategamo ali'na atesugeno ugiye, hu'na ha pai'nove, huno ha pai'niye. 22 Agalipa'a Fesitasife'mo, Ani vekamo ge'amo nagai'nimo afa'a afiguve, huno ha pai'nigeno'ae'mo, Egamo afa'a afigane, huno ha pai'niye.

23 Egamo Agalipa'e Menisi'e'mo muki konali ya'animo alite'ana e'na'age'apae'mo muki vaya'mogimo anaki'anile'mo ali'a asagau'a anate'nae. Anakaegi ati vaya'aite'mo yagai'a ne'apataya vayanagi ani taonifi'mo apaki hane'niya vayanagi hu'a e'a ali'a anupa hu'a ne'maiya nopi'mo hai'a mai'nae. Fesitasi'a huno'ae'mo, Polo'mo uka avalelikeno, huno ha pai'nigeno uno avalelino e'niye. 24 Fesitasi'a, Ala kini vekamo Agalipao, Muki vaya'mo lagae'e'mo magokepi lokaetapa mai'naya vaya'mogitapae, huno, Lapakaemo ani vekamo age'nae. Muki Yu vaya'mogimo Yulusalemu taonifi'mo nagaefe'mo, ago amagigeno falino, hu'a hute'a halate e'a manile'e'mo, ago amagigeno falino, hu'a hu'nae. 25 Hu'a hu'naya'monanafa agoti gemo afi'novana amagisugeno falisiya kava'mo afa'a osu'niya'monanafa agai'amo huno'ae'mo, Sisa'a alino fako huno nateteno agoti huno nategaiye, huno hu'niya'mofe'mo ali'na atesugeno ugiye, hu'na nagesa afi'nove. 26 Ali'na ategefe'mo hu'novana mago gemo avo'mo kaesuva gemo alinino ala kava veka'nimotega visiya gemo ohane'niye. Ge'nimo ohane'niya'mofe'mo kini ne'mo Agalipao, huno, kagaetega'e muki vaya'aitega'e'mo avaleli'na e'nove. Hisiya gemo afitetapa naha paisage'nae'mo avo'mo kaegauve. 27 Nagaemo kalavusifi mai'niya vekamo agoti hu'a atesaya gemo avo'mo okae'na fiku ali'na atesugeno visiyana kanale osugiye, huno hapa pai'niye.

Copyright information for `KYG