Acts 26

Polo'a agai'amo ha maesiya agufa gemo Agalipafe'mo ha pai'niya gemae

Agalipa'a Polofe'mo, kagaikamo kaha maesana gemo afa'a hugane, huno ha pai'nigeno'ae'mo, Polo'a aya'mo alino asagauteno agai'amo ha maesiya gemo huno'ae'mo, Ala kini vekamo Agalipao, huno, Kaulagale'mo he ti'na mai'ne'nae'mo gemo hu'na naha maesuvafe'mo Yu vaya'mogi agoti hu'a nate'naya gemo kaha paisuvafe'mo naipamo'mo falu hu'niye. Kagaemo muki Yu vaya'mogitamo nehuna kavati'e lagesa ne'afuna ya'e'mo ago afiteka age'nana'mofe'mo mago'e huno naipamo'mo falu nehiye. Kahao ke hove. Alaga okahae'ninageka ge'nimo afiyo.

Hogote'na mafa'ne'nile'mo mai'ne'nae'mo vaya'ni'e'mo Yulusalemu taonifi'mo maime maime e'nae'mo hu'nova kava'nimo Yu vaya'mogimo ago nage'nae. Yatala afina'mo nage'naya'mofe'mo Falasi vaya'ai kava'mo kana hu'niya agufa mono'mo nehaya kava'mo yatala afina'mo akame hu'niye, hu'a hapa paigefe hapau'nisiyana ani gemo afa'a hapa paigae. Hemenimo agotile'mo ali'a he ti'a nate'naya gemo aepa'amo kaha paiguve. Goti'a akeya'vilaga laginago vaya'aife'mo, ani kava'mo huguve huno hu'niya kava'mo afole aisiyafe'mo navayagunagu hu'na agava ne'mauva kavatefe'mo agoti hu'a ne'natae. Feluga'e hani'ilaga'e'mo tuolofu'a nofi vayatimogi Gotife'mo mono huge apakesa afi'a fatago huge hu'a ani gelefe'mo apavayagunagu hu'a agava ne'maiye. Ala kini vekamo Agalipao, huno, Navayagunagu hu'na agava ne'mauva kavatefe'mo agoti hu'a ne'natae. Yu vaya'mogitapae, huno, Na kava higetapae'mo, Goti'a fali'naya vaya'mo afa'a alino he tino o'apategaiye, hutapa nehae. Ani kava'mo hu'na Nasalasa vekamo Yesutegamo naini hu'na ategauve, hu'na nagesa afite'na agi'ale'mo ali'na afepi ate'nove. 10 Ani agufa kava'mo Yulusalemu taonifati'mo hu'nove. Mono hu'a ne'apataya vaya'aite'mo yagai'a ne'apataya vaya'mogi mago lokiya gemo hu'a himamu'nimo alisuva agufa avo'mo kae'a nami'nage'na alite'na asole apaote vaya'mo apavaleli'ne'na kalavusi hu'na apate'nove. Kanisole vaya'mogimo, kamiti apamagigune, hu'a hu'nage'nae'mo nagae'e'mo, he kanalene, hu'nageke'mo hu'nove. 11 Umenitata hu'na Yu vaya'ai mono no'ale no'ale'mo kayo'mo apamite'na Yesufe'mo hu'a faipa hu'a atesayafe'mo apamagi'nove. Lusi kava huno naipamo le'nige'nae'mo alu nofi vaya'ai taoni'apifi'e taoni'apifi'e'mo umenitata hu'na kayo'mo apami'nove.

Polo'a Goti mafa'nemo hamale'niya kavafe'mo ava gemo huno hapa pai'niya gemae

(Apa 9:3-19; 22:6-16)

12 Nagaemo mono hu'a ne'apataya vaya'aite'mo yagai'a ne'apataya vaya'mogimo kae'a nami'naya avo'mo alite'na ani kava'mo hisuvafe'mo Namasakasi taoni kate'mo u'nove. 13 Ala kini vekao, hu'na, Felugakuku'mo kate'mo ne'ugeno'ae'mo ha le ya'mo'a yegemo ago aeno agase'niya ha le ya'mo nagaete'mo aeno ha le'nigeta nagae'e'mo magokepi lokaeta u'nona vaya'e'mo ageteta mopafi'mo asagauta aiteta lago'ya fai'none. 14 Mago vekamo'a Himulu gefati'mo huno'ae'mo, Solo, Solo, huno, Na kava higeka kaini huka ne'natane. Pulumakamo'a ali'ya alinino visiyafe'mo ne'yagaiya vekamo'a agufafi'mo ako'ya kayoteti'mo nefaigeno aiyaleti'mo aeno fayo nehisigeno'ae'mo mago'e huno agafu kigiye. Ani kava huka ako'ya kayote'mo aeka lanu nepaine, huno naha pai'niye. 15 Naha pai'nige'nae'mo, Ala kava nene, hu'na, Kagaemo ina lagae, hu'na afi ge'nogeno'ae'mo, Yesu'namo kaini huka ne'natana vekamo mai'nove. 16 He tika maiyo. Ali'yanile'mo mai'neka ge'nimo aeka hakalo huka hapa paisanafe'mo lekana pai'na katesuvafe'mo kagaetegamo afole ai'nove. Kagaemo nage'nana kava'e ali'na kave lisuva kava'efe'mo ava gemo huka hapa paigane. 17 Nagaemo Yu vaya'aitega'e alu nofi vaya'aitega'e'mo ali'na katesugeka uka mai'nisanage'nae'mo apayapati'mo kagufamo ali'na kati'na kategauve. 18 Apakaemo nagaefe'mo apakesa afi'a fatago hisage'na hosu kava'apimo ali'na atalesuge'a Goti apaote vaya'a'e'mo hetama'apimo alite'a magokepi lokae'a maisayafe'mo kagaemo uka apaulagamo alika ayakeka apateteka hani hu'nisiya yategati'mo apayate alinika aika atagi nekeka ha le yategamo apategane. Satani'a yagaino ne'apateya kegi'yafati'mo apayate alika apavalelikeka Goti'a ne'yagaiya kegi'yafi'mo apategane, huno naha pai'niye, huno ha pai'niye.

Polo'a ali'ya'mo ali'niya kavafe'mo ava gemo hu'niya gemae

19 Polo'a huno'ae'mo, Ala kini vekamo Agalipao, hu'na, ani koku'napati hu'niya gemo amagi'na o'atale'na u'na Namasakasi taonifinagi Yulusalemu taonifinagi muki Yutiya kotegagi hu'na u'na Yu vaya'aife'mo ani gemo ae'na hakalo hu'na hapa paite'na u'na alu nofi vaya'aife'mo ae'na hakalo hu'na hapa pai'nove. Nagaemo hu'nae'mo, lapaipamo alitapa afe letetapa aitapa atagi netapa Gotitega etetapa muki vaya'mo alitapa apave lisayafe'mo apaipamo ali'a afe nelaya vaya'mogi nehaya agufa alagepa kava'mo hiyo, hu'na hapa pai'nove. 21 Ani gemo hu'nova'mofe'mo alopa mono nopi'mo mai'noge'apae'mo Yu vaya'mogimo natafaute'a falisuvafe'mo namagi'nae. 22 Goti'a alagepa huno naha maeme naha maeme e'nige'na apaki hane'niya vaya'e apaki ohane'niya vaya'efe'mo ae'na hakalo hu'na hapa pai'na mai'nove. Gotitegati gemo alini e'a ae'a hakalo hu'a hapa nepaiya vaya'mogi'e Mosese'e'mo hu'apae'mo, ani kava'mo afole aigiye, hu'a hapa pai'naya agufa ge'age'mo hu'na hapa nepauve. 23 Apakaemo hu'apae'mo, Kalaisi ne'mo Goti'a lekana paino ate'niya vekamo agafu kisigeno faliteno kanolufati'mo hogoteno he tigiye. Agaemo he tino Goti'a hapa maesiya ha le yafe'mo Yu vaya'e alu kotega vaya'efe'mo aeno hakalo huno hapa paigiye, hu'a hapa pai'nae, huno hapa pai'niye.

24 Polo'a agai'amo gemo huno ha maesiyafe'mo ani gemo nehigeno'ae'mo Fesitasi'a Polofe'mo, kagaemo negi ne'malane. Asole afina'mo mukufi'mo lekana nepaina'mofe'mo kagesamo alino hosu huno kate'nigekae'mo negi nagi gemo nehane, huno ha pai'nigeno'ae'mo, 25 Ala vekamo Fesatasiyo, hu'na, Nagaemo negimo no'malove. Hapa nepauva gemo negi gemo nosufa nagesamo hane'nige'na alagi lama gemo nehuve. 26 Ala kini vekamo'a ani kavafe'mo ava gemo ago afi'niya'mofe'mo koli osu'na ae'na hakalo hu'na ha nepauve. Ago ha le yategamo afole ai'niya'mofe'mo ago afi'novana ani kavafe'mo ava gemo ago afi'niye. 27 Ala kini vekamo Agalipao, hu'na, Gotitegati gemo alini e'a ae'a hakalo hu'a hapa nepaiya vaya'mogi ge'apie'mo kagesa afika fatago nehapiye. Ago afi'novana kagesa afika fatago nehane, huno ha pai'nigeno 28 Agalipa'a, aise afina'mo Kalisitini vekamo hamalesuvafe'mo nagesamo alika naha nepaine, huno ha pai'nigeno'ae'mo, 29 he, aise afina'mo hemenimo kagae'e muki ge'nimo ne'afiya vaya'e'mo nagaekana hutapa hamalesayafe'mo Gotife'mo nunumu nehuve. Nagaekana hutapa maisayafe'mo nahau'niya'monanafa nagaekana hutapa seli nofite'mo maisayafe'mo o'nahaiye, huno ha pai'niye. 30 Huno ha pai'nige'apae'mo ala kini veka'apimo Agalipa'agi yagaino ne'apateya vekamo Fesitasi'agi Menisi'agi muki vayanagi hu'a he ti'a kumategamo lami'a apakai'api apakai'apimo ge hu'apae'mo, Ani vekamo kalavusifi maisiyafe'mofi falisiyafe'mofi huno mago hosu kava'mo osu'niye, hu'a hu'nae. 32 Agalipa'a Fesitasife'mo, Agaemo ala hogote vekamo Sisa'a agoti huno nategaiye, huno osu'niyesinana kalavusifati'mo afa'a hatu maeta atesunageno viyesine, huno ha pai'niye.

Copyright information for `KYG