Acts 27

Ati vaya'mogimo Polo'a avaleli'a Lomu taonifi'mo u'naya gemae

Itali kotegamo sipifi'mo apavaleli'a ugae, hu'a hute'a Polo'e mago kalavusi hu'a apate'naya vaya'e'mo apavaleli'u'a mago ati vaya'aite'mo yagaino ne'apateya vekamo agi'amo Yuliyasife'mo, yagaika apato, hu'a ha pai'nae. Yuliyasi'a hogote vekamo Sisa ati vayapati vekamo mai'niye. Atalamitiya kotega sipimo eno hane'nige'a Esiya kotegamo muki sipi'amo u'a ava'yi nehaya taonifi'mo ugefe'mo nehagetae'mo ani sipifi'mo haita mai'neta mopamo ataleta anipi'mo u'none. Alitakasi'mo Tesalonaika taonifi'mo Masetoniya kotega vekamo lagae'e'mo magokepi lokaeno mai'nigeta u'none. Egamo Saitoni taonifi'mo uta ava'yi huteta Yuliyasi'a Polofe'mo, kagaemo kao vaya'mo afa'a uka apakegane. Mago kaha maesiya ya'mo kamisageka afa'a aligane, huno ha pai'nigeno Polo'a mopafi'mo lami'niye. Lagaemo ani taonifati'mo ataleta ne'unageno'ae'mo visuna kategati'mo lusi kava huno yasimo alinineno aeno ago'ya fai'nigeta Saipalasi ani ago'nanenamo'a aino hau vai'niya kate'mo u'none. Uta Silisiya haopalega ani'mo lakaeteta Pamifiliya haopalega ani'mo lakaeta Maila taonifi'mo Lisiya kotega taonifi'mo uta ava'yi hu'none. Ani taonifi'mo mago sipimo Alekasaniya kotega sipimo Itali kotega visiya sipimo hane'nigeno ati vaya'aite'mo yagaino ne'apateya vekamo'a ageteno'ae'mo lavalelino haino sipifi'mo late'niye. Ani sipimo'mo asole afina'mo vase vase huno u'nigeta ayamufaime faime u'none. U'nigeta Naitasi taoni haopalega uta ava'yi huteta anipi'mo ne'unageno'ae'mo yasimo alinino lagaetegamo e'nigeta afa'a o'u'none. Ani kate'mo ataleta Kiliti ani ago'nanenamo'a aino hau vai'niya kate'mo uta Kiliti kotega mopamo atupamo agi'amo Salamonigayagamo ayamufaime faime uta aeta agaseta u'none. Uta mago taonimo agi'amo Fehevenesi'ae agimo aepa'amo sipimo kanale huno nehaneya kotegae. Ani kotegamo Lasiya taoni haopale hane'nigeta uta ava'yi hu'none. Yatala afina'mo maite maite hulita ne'unageno Yu vaya'ai hopa afina'mo ne'ya'mo mosi'a ne'maiya afina'mo ago hano hu'nigeno lusi kava huno yasimo ne'aliya afina'mo ani'mo lakaesayafe'mo hosu afina'mo afole ai'niye. Afole ai'niya'mofe'mo Polo'a hapa maesiyafe'mo, 10 Veguseyo, huno, Ani kotegamo hemenimo ataleta visunana lusi kava huta hanageke ya'mo aligune. Sipifi'mo hane'niya kagemi ya'mo alino hosuge sipimo alino hosuge hisigeta vaya'e'mo faligune, huno hapa pai'niya'monanafa 11 ati vaya'aite'mo yagaino ne'apateya vekamo'a Polo'a hu'niya gemo o'afino sipile'mo ne'aliya veka'e sipi aepa vekamo'e'mo hu'na'a gege'mo afi'niye. 12 Lusi kava huno yasimo ne'aliya afina'mo afole ai'niya'mofe'mo sipi male'naya yategamo alino hosu'niye. Asole vaya'mo sipifi'mo mai'naya vaya'mogi hu'apae'mo, yasimo ne'aliya afina'mogeta manile'mo ataleta lakaetuta Finikisi taonifi'mo uta ava'yi hisunafe'mo amalageka huta agegesune, hu'a hu'nae. Finikisi taonimo'mo alopa agi'amo Kiliti kotegamo yasi ne'aliya afina'mo sipimo alini'a o'u'a afa'a atale'a ne'maiya kotegamo hane'niye.

Lusi kava huno yasimo ali'niya gemae

13 Mago yasimo lakamelegati'mo vase vase huno alinino ne'ege'apae'mo, Hemenimo kanalenageta ge hu'nona kava'mo afa'a hugune, hu'a apakesa afite'a sipimo ae'a ne'atafaya yate nofi'mo ali'a vayu hu'a sipifi'mo male'nageta Kiliti ani ago'nanenamo agi'nale'mo u'none. 14 U'nona'monanafa aise afina'mo utegeno lusi kava huno yasimo ani ago'nanena kotegati'mo alinineno sipimo alino ago'ya fai'nigeno sipimo'a yasimo alinine'niya kategamo afa'a o'u'niye. 15 Afa'a o'u'niya'mofe'mo ataleta yasimo alinino ne'viya kategamo u'none. 16 Mago aise ani ago'nanenamo agi'amo Ko'nagayaga ani ago'nanenamo'a aino hau vai'niya kate'mo ne'utae'mo aise sipimo aeta vayu hu'nona sipimo lokiya kava'mo huta nofite'mo alita vayu huta alita asagauta alopa sipifi'mo nofi kita ate'nonageno kanage osuno afa'a hane'niye. 17 Vaya'mogimo sipimo aino o'atagisiyafe'mo alopa nofi'mo ali'a anipati'mo fai'a fale'a ali'a vayu hu'a sipimo akamelegamo ki'a ate'nae. Ani vaya'mogimo, Fiku yanageno sipimo ani kahaepafi'mo alino ago'ya failino ugiye, hu'a hute'a lavolavo selimo ali'a atalageno emine'nigeno yasimo'a sipimo alino ago'ya failino u'niye. 18 Lusi kava huno yasimo alige alige huno mai'niya'mofe'mo egamo mago kagemi yako'mo ali'a anipi'mo yaga au'a atalageno asagauno ai'niye. 19 Olaga'amo muki sipifi hane'niya yako'amo seli nofi'e yosa'e'mo ali'a anipi'mo yaga au'a atalageno asagauno ai'niye. 20 Yatala afina'mo yegemo o'agege kanefi'mo o'agege huta mai'nonageno'ae'mo lusi kava huno yasimo alige alige huno mai'niye. Ne'aligeta lagesa afitae'mo falisunageno'ae'mo laugosamo alagi lageso hugiye, huta lagesa afi'none. 21 Yatala afina'mo ne'ya'mo o'ne'a mosi'a mai'ne'apae'mo Polo'a vaya'ai folagapi'mo he tino'ae'mo, Veguseyo, huno, Ge'nimo afitetapa Kiliti kotegamo alita o'atale'nonesinana mani agufa hanageke kava'mo afole o'aisigeno muki ya'mo afa'a lageso osiyesine. 22 Inagi koli osutapa lapaipamo lokiya vaitapa ateyo. Magoke vekamo alagi lageso osugifa sipi'ageke'mo lageso hugiye. 23 Nagaemo Goti vekamo mai'ne'na ali'ya'amo ne'aluva vekamo mai'nogeno enisole veka'amo alino ate'nigeno nagaetegamo emine'niye. 24 Agaemo, Polo, huno, Koli osuvo. Uka hogote ala vekamo Sisa aulagale'mo he tika maigane. Goti'a sipifi'mo mai'naya vaya'mo apavaleno kami'niye, huno naha pai'niya'mofe'mo 25 koli osutapa lapaipafi'mo alitapa lokiya vaitapa ateyo. Goti ge'ae'mo nagesa afi'na fatago nehuvanageno naha pai'niya gemo afole aigiye. 26 Afole aigiya'monanafa yasimo'a sipimo alininuno ani ago'nanena agi'nale'mo yaga auno lategaiye, huno hapa pai'niye.

27 Yasimo aepa faino ali'niya afina'mo lole salemo ago utegeno Etiliya anite'mo yasimo alinino uneno nehige'apae'mo hani'ilaga folagu'mo sipifi'mo ali'ya ne'aliya vaya'mogi hu'apae'mo, Ani agi'nale'mo uno hogo nehiye, hu'a hute'a 28 mago kana hu'niya ya'mo ali'a nofi aete'a anipi'mo yaga au'a atalageno lamino avo'mo kae male'naya ya'mo yatala'amo tuveti mita agufa yatala ya'mo hane'niye. Sipimo hogo kate'mo u'nige'a halate anipi'mo ali'a yaga au'a atalageno fifitini agufa yatala ya'mo hane'niye. 29 Apakaemo, yafa'mo'a sipimo aeno ago'ya faigiye, hu'a hute'a sipimo ae'a ne'atafaya ya'mo lole'e lole'e ya'mo sipi akamelagati'mo ali'a atalageno anipi'mo asagauno aiteno aeno hanino alagi huteno sipimo aeno atafau'niye. Malage huno kotisiyafe'mo nunumu'mo hu'nae. 30 Sipifi'mo ali'ya'mo ne'aliya vaya'mo sipimo ago atale'a visayafe'mo aise sipimo nofi aete'a ali'a atale'nageno anipi'mo lami'niye. Lagaemo, sipimo ae'a ne'atafaya ya'mo ago'yafati'mo ali'a atalegae, huta lagesamo afisunafe'mo hu'a lami malesayafe'mo hu'nae. 31 Inagi Polo'a ati vaya'aite'mo yagaino ne'apateya vekae'mo, Sipifi'mo ali'ya ne'aliya vaya'mo sipimo atale'a visagetapae'mo faitapa kasalo opaegae, huno ha pai'nige'apae'mo 32 ati vaya'mogi aise sipile'mo nofi ki'a atafau male'naya nofi'mo he'a hatagautalageno u'niye.

33 Ko aligefe'mo hu'nigeno'ae'mo Polo'a, Lapao ke hove, huno, Ne'ya'mo afa'a neyo lole salemo ne'ya'mo o'netapa mositapa mai'nae. 34 Mai'naya'mofe'mo lokiya gemo hu'na lapa nepauve. Afa'a maisayafe'mo ne'ya'mo neyo. Magoke lapayoka'mo aino lupaeno lageso osisiyana alagi afa'a maigae, huno hapa paiteno 35 muki vaya'ai apaulagale'mo peleti mayamo ali'neno Gotife'mo hao ke heno nunumu'mo huteno alino akaya heno aepa faino ne'niye. 36 Ne'nige'apae'mo apaipamo'mo kanale hu'a atete'apae'mo muki'amogimo ne'ya'mo ali'a ne'nae. 37 Ani sipifi'mo mai'nona vaya'mo tu hataleti seveti sigisi'a vaya'mo mai'none. 38 Ne'ya'mo ne'a apamu hute'apae'mo sipimo'mo kana osisiyafe'mo viti ku'mo ali'a anipi'mo yaga au'a atale'nae.

Ani'mo'a sipimo aeno atagi'niya gemae

39 Kotilamiyapi'mo sipifi ali'ya ne'aliya vaya'mogi mopamo o'age'nae. Agayana mago ani ago'nanenafi'mo ani kahaepamo hane'nige'a agete'apae'mo, Sipimo alinituta ani kahaepale'mo malesunafe'mo amalageka huta agegaune, hu'a hu'nae. 40 Sipimo ae'a ne'atafaya nofi'mo he'a hatagau'a atalete'a akamelega ai'a atagi ne'naya yosale nofi'mo hakalu he'a atale'nae. Yasimo'mo ani agi'nalega kahaepale'mo sipimo avalelino visiyafe'mo sipi ago'yafi selimo ali'a asagau'a nofi aete'a male'nae. 41 Male'nageno'ae'mo yasimo'mo sipimo avalelino ani agi'nale'mo o'u'nifa anipi'mo mago yafa avemo'mo atafauno alagi huno mai'niye. Ani'mo'a sipimo akamelegamo aeno atava aige hu'niye. 42 Ati vaya'mogimo vegemo hu'apae'mo, Kalavusifi mai'naya vaya'mo muki'amo apamagisunage'a faligae. Fiku yanage'a mago vaya'mo nagosa aili'u'a apaune he'a ugae, hu'a hu'naya'monanafa 43 ati vaya'aite'mo yagaino ne'apateya vekamo'a Polo agufamo alino katino atesiyafe'mo, ha'ao, huno hapa paiteno'ae'mo nagosa ne'aiya vaya'aife'mo, Anipi'mo asagautapa aiteta nagosa aime aime utapa ani agi'nale'mo ava'yi hiyo, huno hapa paiteno 44 mago nagosa no'aiya vaya'aife'mo, Latapa yosamo sipimo aeno atava ai'niya yosale'mo maitetapa alinitapa viyo, huno laha pai'nigeta muki'amogitamo ani agufa kava'mo huta ani agi'nale'mo alagepa hututa ava'yi huta hano hu'none.

Copyright information for `KYG