Acts 8

Solo'a siosi vaya'mo lusi kava huno hanageke ya'mo apami'niya gemae

Sitiveni'a fali'niya afina'mo Yulusalemu taonifi'mo mai'naya siosi vaya'aitegamo lusi hanageke kava'mo hu'nae. Hu'nage'apae'mo muki siosi vaya'mo atagu fae'a apaune he'a Yutiya kotega'e Samaliya kotega'e'mo u'e'a hu'nage'a apa vaya'age'mo Yulusalemu taonifi'mo mai'nae. Mago mono ne'afiya vaya'mogi Sitiveni'mo ali'a ki'a ne'ate'apae'mo lusi kava hu'a yulagefa ai'nae.

Inagi Solo'a siosi vaya'mo apamagino hano hisiyafe'mo ina kava'mo huno no'apifati no'apifati'mo haino ve a'nemo heno apavayu hulinuno kalavusi huno apatete apatete hu'niye.

Samaliya kotegamo u'a Goti ge'amo ae'a hakalo hu'a hapa pai'naya gemae

Atale'a atagu fae'a u'e'a hu'naya vaya'mogimo muki haopalegamo Goti ge'amo ae'a hakalo hu'a hapa pai'nae. Filipi'a Samaliya kotega taonifi'mo uno Kalaisife ava gemo aeno hakalo huno hapa pai'niye. Muki vaya'mogi ge'amo afige no'agaya agufa lokiya aune kava'mo hu'nige'a agege hute'apae'mo muki ve a'nemogimo magoke apaipa apakesa ali'ne'a Filipi ge'amo alagepa hu'a afi'nae. Agaemo lokiya kava'mo nehige'apae'mo hosu apaune vaya'mo muki vaya'ai apaipafati'mo emi ne'e'apae'mo alopa gefati'mo hu male'a atale'a apaune he'nae. Agaemo muki kanage kanaga osu'a ne'maiya vaya'mo alino alagepa huno apatege apaiyamo hosu'niya vaya'mo alino alagepa huno apatege hu'nige'apae'mo muki Samaliya taonifi vaya'mogimo agete'a lusi kava hu'a amuse hute'a apamogaga ai'nae. Mago ani taonifi'mo mai'niya vekamo agi'amo Saimoni'a hogoteno hapa paino'ae'mo, ala vekamo mai'nove, huno hapa paiteno hosu apaune vaya'ai himamu'apileti'mo no'agaya aeto agufa aune kava'mo huge huge huno mai'nige'apae'mo Samaliya vaya'mogi hapau ai'nae. 10 Muki ala apaki hane'niya vaya'mogi'e apaki ohane'niya vaya'mogi'e'mo ge'amo alagepa hu'a afite'apae'mo, Vae, hu'a, ani vekamo lokiya vekamo goti'a mai'niye, hu'a hu'nae. 11 Yatala afina'mo hosu apaune vaya'ai himamu'apileti'mo no'agaya aeto agufa aune kava'mo huno alino apave li'nige'apae'mo hapau aite'a alagepa hu'a ge'amo afi'nae. 12 Saimoni ge'amo afi'naya'monanafa Filipi'a alagepa gemo Goti'a ne'yagaiya kavafe'mo ava gemo huge Yesu Kalaisife'mo ava gemo huge hu'nige'a afite'apae'mo apakesa afi'a fatago hu'naya ve a'nemo ani'mo faleno apate'niye. 13 Saimoni'e'mo agesa afino fatago hu'nigeno ani'mo faleno ate'nigeno'ae'mo Filipi'e'mo lokaeno mai'neno ageyana Filipi'a no'agaya agufa himamu kava'mo hu'nigeno ageteno'ae'mo lusi kava huno hau ai'niye.

14 Mago vaya'mogi, Samaliya vaya'mogimo Goti ge'amo alagepa hu'a afite'a ago ali'nae, hu'a apava gemo hu'nage'a apa vaya'mogi afite'apae'mo Pita'e Yoni'e'mo ali'a anate'nage'ana apakaetegamo u'na'ae. 15 Emi'e'ana ava'yi hute'anae'mo apakesa afi'a fatago hu'naya vaya'mogimo Goti Auneme'amo alisayafe'mo nunumu'mo hu'na'ae. 16 Ala kava ne'mo Yesu agi'alefe'mo ani'mo fale'a apate'naya'monanafa Goti Auneme'amo o'ali'nae. 17 Pita'e Yoni'e'mo anaya'mo apakufale'mo male'ne'ana nunumu'mo hu'ana apate'na'ageno Goti'a Auneme'amo alino apami'niye.

18 Apa vekala'moganimo apakufale'mo anaya'mo male'na'ageno Goti'a Auneme'amo alino apami'nigeno Saimoni'a ageteno'ae'mo monimo anamisiyafe'mo huno'ae'mo, 19 Ani himamu'amo alitana nami'age'nao naya'mo vaya'ai apakufale'mo malesuge'a Goti Auneme'amo aliyo, huno hana pai'nigeno 20 Pita'a, Goti'a fiku hapa maeno ne'apamiya yafe'mo kagaemo, monileti'mo miya faiguve, huka kagesa ne'afina'mofe'mo kagae'e monika'e'mo ata kopi'mo utana lamiga'ae. 21 Goti aulagale'mo kaipamo'mo kanale osu'niya'mofe'mo mani ali'ya'mo kagae ali'ya'mo ohane'niye. 22 Kaipamo alika afe leteka hosu gemo huve, huka huteka ataleka kakame'ya amiteka Gotife'mo hukae'mo, hosu nagesa afite'na hosu gemo hu'novanagi alika atalo, huka nunumu'mo huvo. Goti'a alino atalesifi alino o'atalesifi huka amalageka huka ago. 23 Kage'novana kaipa kafa nehanageno atuofa yakana ya'mo kaipafi'mo hane'niye. Hosu kavakamo'mo yagaino nekateya'mofe'mae, huno ha pai'niye. 24 Saimoni'a Pita'e Yoni'efe'mo, hu'na'a kava'mo nagufale'mo afole o'aisiyafe'mo nunumu'mo hutana nate'ao, huno hana pai'niye. 25 Anakaemo Yesu Kalaisi'a hu'nige'ana age'na'a gemo huge ala kava ne'mo ge'amo ae'ana hakalo hu'ana hapa paige hute'anae'mo apatale'ana atagi ne'ana Yulusalemu taonifi'mo u'na'ae. Ne'u'anae'mo Samaliya kotega alu taonifi'e alu taonifi'e'mo alagepa faigoko gemo ae'ana hakalo hu'ana hapa paimale hapa paimale huli'ana u'na'ae.

Filipi'e Itiyopiya kotega veka'efe'mo anava gemo hu'niya gemae

26 Mago Ala kava ne'mo enisole veka'amo'a Filipife'mo, Kagaemo he tika Yulusalemu kotegati'mo mago ka'mo lamino Gasa taoni haopalegamo ka'me kotegamo vaya'mo o'mai'naya kotega lamino ne'viya kate'mo uvo, huno ha pai'nigeno 27 Filipi'a he tino u'niye. Ne'vigeno'ae'mo mago gamani vekamo Itiyopiya vaya'mo kuvini a kanomo monile'mo ne'yagaiya vekamo no'alega ugefe'mo u'niye. 28 Agaemo Gotife'mo mono huteno Yulusalemu taonifati'mo eno atagi neno hosimo'mo halaulino u'niya talalafi'mo haino fai maiteno ne'uno'ae'mo Goti Mukufi'mo Aiyeya'a avo'mo kae male'niya gemo lekana pailino u'niye. 29 Goti Auneme'amo'mo Filipife'mo, Uka talala haopale'mo lokaeka uvo, huno ha pai'nigeno 30 Filipi'a nagu nagu hununo afiyana Aiyeya Mukufi'mo lekana nepaigeno afiteno'ae'mo, lekana nepaina gemo aepa'amo afi'napiye, huno afi ge'nigeno'ae'mo, 31 Mago vekamo'a ani gemo aepa'amo naha opaisiyana haiya kava hu'na afiguve. Haikeno, huno ha pai'niye. 32 Goti Mukufi'mo lekana pai'niya gemo'mo huno'ae'mo,

Sipisipigana huno mai'nige'a avaleli e'a amagi'nae. Vaya'mogimo aikeli sipisipimo ayoka'mo lagau'nageno'ae'mo age no'aiya sipisipigana huno mai'neno'ae'mo ge osuno afa'a mai'niye.
33 Agi'ale'mo ali'a afepi atete'a ali'a alagepa hu'a fako hu'a agoti hu'a o'ate'nae. Apakaemo hu'apae'mo, Ma mopafi'mo afa'a o'maigiye. Falitesige'apae'mo agae vayapati'mo mago'e hu'a afole o'aigae, hu'a hute'a amagi'nageno fali'niye,
huno hu'niye.

34 Gamani vekamo'a Filipife'mo, Naha paiyo, Gotitegati gemo alinineno aeno hakalo huno hapa nepaiya vekamo'a agai'ae'mo ava gemo huno avo'mo kae male'nifi alu vekae'mo ava gemo huno avo'mo kae male'niye, huno loka huno afi ge'nigeno'ae'mo 35 Filipi'a lekana pai'niya gefati'mo Yesufe'mo ava gemo aepa faino aeno hakalo huno ha pai'niye. 36 Kategamo ne'u'anae'mo mago ani kotu'mo hane'niya yate'mo u'ana ava'yi nehu'anae'mo gamani vekamo'a, Manile ani kotu'mo hane'niye. Natafauno natesiya ya'mo hane'nifi afa'a ani'mo faleka nategane, huno afi ge'nigeno'ae'mo 37 Filipi'a, Muki kaipa kagesafati'mo alagi kagesa afika fatago nehisana'mo'mo afa'a ani'mo fale'na kategauve, huno ha pai'nigeno'ae'mo, Ago ani gemo kaha nepauve, huno, Yesu Kalaisi'mo Goti mafa'ne'amo mai'niye, hu'na nagesa afi'na fatago nehuve, huno ha pai'niye.

38 Gamani vekamo'a hosimo talalafi'mo mai'neno ka'mo alino ho huno atelino u'niya vekae'mo, Manile maigunanagi atafauka ategetao, huno ha pai'nigeno atafauno ate'nigeno agae'e Filipi'e'mo ani kotupi'mo lami'ana ani'mo faleno ate'niye. 39 Anipati'mo atale'ana hai e'na'ageno'ae'mo Goti Auneme'amo'mo Filipi'mo avalelino u'niye. Gamani vekamo'a amogaga aime aime ne'uno'ae'mo Filipi'mo mago'e huno o'age'niye. 40 Goti Auneme'amo'mo Filipi'mo avalelinuno ate'nigeno'ae'mo, Asatoti taonifi'mo mai'nove, huno ageteno'ae'mo muki taoni'afi taoni'afi'mo aeno hakalo huno hapa paimale hapa paimale hulinuno Sisaliya taonifi'mo uno ava'yi hu'niye.

Copyright information for `KYG