Acts 9

Solo'a Goti mafa'nemo hamale'niya kavafe'mo ava gemo hu'niya gemae

(Apa 22:4-16; 26:9-18)

Ani afina'mo Solo'a Ala kava ne'mo ge'amo ne'afiya vaya'aife'mo lokiya gemo huno'ae'mo, apamagisuge'a faligae, huno huteno lusi kava huno ha ha hulinuneno huno mono hu'a ne'apataya vaya'aite'mo yagaino ne'apateya vekae'mo, mago avo'mo kaeka namiyo. Nagaemo ani avo'mo alininu'na Namasakasi taonifi'mo mono hu'a ne'apataya vaya'aite'mo yagai'a ne'apataya vaya'mo apamisuge'a agete'a naha maesage'na Yesu kate'mo ne'vaya ve a'ne'aina apakesuvate'mo apavale'na kalavusi hu'na apatete'na Yulusalemu taonifi'mo apavaleli'na egauve, huno ha pai'niye.

Solo'a Namasakasi kate'mo uno ava'yi hugefe'mo uno taoni haopale'mo hogo nehigeno'ae'mo koku'napati'mo mago ha le ya'mo'a agufale'mo aeno ha le'nigeno age'niye. Ageteno'ae'mo mopafi'mo asagauno aino ago'ya faino mai'nigeno'ae'mo, Solo, Solo, huno, Na kava higekae'mo nagaefe'mo kaini huka ne'natane, huno ha pai'nigeno'ae'mo, Ala kava nene, kagaemo ina lagae, huno afi ge'nigeno'ae'mo, Nagaemo Yesu'namo kaini huka ne'natana vekamo mai'nove. Hosimo'mo aeno fayopayo hiyategamo ako'ya kayote'mo aiyaleti'mo aeno lanu pai'nigeno agafu nekiya agufa kava'mo nehane, huno ha pai'nigeno afiteno'ae'mo hau aiteno atete nehuno'ae'mo, Ala kava nene, na kava hisuvafe'mo kahau'niye, huno afi ge'nigeno Ala kava ne'mo'a, He tika taonifilagamo ugeno'ao mago vekamo'a hisana kavafe'mo kaha paigiye, huno ha pai'niye. Solo'e'mo lokae'a u'naya vaya'mogi ani hu'niya gemo afi'naya'monanafa mago vekamo o'age'naya'mofe'mo ge osu'a afa'a he ti'a mai'nae. Solo'a mopafati'mo he tino aulagamo ageno ayake'niyana aulagafati'mo hani'age hu'niye. Hu'nige'a vaya'amogi ayate ali'a avaleli'a Namasakasi taonifi'mo u'nae. Solo'a lole'e mago'e afina'mo mago ya'mo o'agege ani'mo o'nege ne'ya'mo o'nege huno mai'niye. 10 Mago vekamo agi'amo Ananaiyasi'a Yesu ge'amo ne'afiya vekamo Namasakasi taonifi'mo mai'niye. Agaemo alagamuna age'niyana Ala kava ne'mo'a, Ananaiyasiyo, huno hu'nigeno'ae'mo, Ala kava nene, mai'nove, huno ha pai'nigeno'ae'mo, 11 Alo huka mago ka'mo agi'amo api kate'mo uvo. Uka Yutasi nopi'mo mai'niya vekamo Tasasi taonifi vekamo agi'amo Solo'a kahauya huka ago. Afiyo, agaemo nunumu'mo nehiye. 12 Alagamuna kage'niyana Ananaiyasigage'mo eka kaya'mo agufale'mo male'neka alika ayakeka ne'atanageno kage'niye, huno ha pai'niye. 13 Ananaiyasi'a, Ala kava nene, huno, Muki vaya'mogimo ani vekae'mo ava gemo ago hu'nage'na afi'nova vekae. Agaemo Yulusalemu taonifi vayakamo lusi kava huno hanageke ya'mo alino apami'niye, hu'a ava gemo hu'nage'na afi'nove. 14 Ani vekamo'a kagikalefe'mo nunumu'mo nehaya vaya'mo kalavusi huno apatesiyafe'mo mago avo'mo mono hu'a ne'apataya vaya'aite'mo yagai'a ne'apataya vaya'aitegati'mo aliteno mani taonifi'mo e'niye, huno ha pai'nigeno'ae'mo 15 Ala kava ne'mo'a, Nagaemo ali'ya'nilefe'mo uno nagi'nimo alu nofi vaya'aifenagi yagai'a ne'apataya vaya'aifenagi Isaleli vaya'aifenagi huno aeno hakalo huno hapa paisiyafe'mo lekana pai'na ate'novanagi afa'a uvo. 16 Nagi'nilefe'mo agafu kisiya kava'mo ali'na ave lisugeno ali'ya'nimo aligiye, huno ha pai'niye.

17 Ha pai'nigeno Ananaiyasi'a uno ani nopi'mo faleno haino Solo agufale'mo aya'mo male'neno'ae'mo, Solo konaga'nimogae, huno, Ala kava ne'mo Yesu'a kategamo ne'anageno kaulagale'mo afole ai'nigeka age'nana vekamo'mo nagaemo alino nate'nige'na e'nove. Nagaemo kaulagamo ali'na ayake'na katesugeno Goti Auneme'amo'mo kaipafi'mo havai tesiyafe'mo alino nate'nige'na e'nove, huno ha nepaigeno'ae'mo 18 malage huno mago noyame hainanigana agufa ya'mo aulagafati'mo asagauno ai'nigeno'ae'mo aulagamo alagepa huno ageno ayake'niye. Agaemo he ti'nigeno ani'mo faleno ate'niye. 19 Ani'mo faleno ate'nigeno'ae'mo ne'ya'mo ne'nigeno alino lokiya vaino ate'niye.

Solo'a Namasakasi taonifi'mo Goti ge'amo aepa faino alininuno aeno hakalo huno hapa pai'niya gemae

20 Solo'a Goti ge'amo ne'afiya vaya'e'mo Namasakasi taonifi'mo mago afina'mo mai'niye. Malage huno Yu vaya'ai mono no'ale no'ale'mo uneno huno Kalaisife'mo, Ani vekamo Goti mafa'ne'amo mai'niye, huno aeno hakalo huno hapa pai'niye. 21 Muki vaya'mogimo ani gemo afi'a hapau aite'apae'mo, Ani vekamo'mo Kalaisi agilefe'mo nunumu'mo nehaya vaya'mo Yulusalemu taonifi'mo mai'naya vaya'mo apamagi'niye. Hogoteno apamagiteno'ae'mo hemenimo kalavusi huno apateteno mono hu'a ne'apataya vaya'aite'mo yagai'a ne'apataya vaya'aitegamo apavalelinuno apamisiyafe'mo manile'mo e'niya vekamae, hu'a hu'nae. 22 Solo'a mago'e mago'e huno lokiya gefati'mo huno aeno hakalo huno hapa paino'ae'mo, Yesu'a Kalaisi ne'mo mai'niye, huno alino apave li'niye. Alagepa huno alino apave li'niya'mofe'mo Namasakasi taonifi'mo mai'naya Yu vaya'mogimo ge'ale'mo afa'a ae'a atagaina hu'a osu'nae. 23 Yatala afina'mo utege'apae'mo Yu vaya'mo ali'a anupa hu'a mai'ne'apae'mo, Solona haegaune, hu'a hu'naya'monanafa 24 Solo'a ani gemo ago afi'niye. Apakaemo Solo'mo haesayafe'mo feluga'e hani'ilaga'e'mo ani taonifi'mo muki lafi kipa'ale'mo yagai'a mai'nae. 25 Yagai'a mai'naya'monanafa Kalaisi ge'amo ne'afiya vaya'mogi hani'ilagamo avaleli u'a yafa kegi'yale'mo hai'a ate'ne'a hona yuvapagana yapi'mo ali'a ate'ne'a nofi aete'a ali'ne'a atalageno Solo'a lamino kegi'ya malaga mopafi'mo asagauno aiteno u'niye.

Solo'a Yulusalemu kotegamo uno mai'niya gemae

26 Solo'a Yulusalemu taonifi'mo Yesu ge'amo ne'afiya vaya'e'mo magokepi ali'a anupa hu'a maisayafe'mo e'niya'monanafa agaefe'mo Kalaisi ge'amo no'afiya vekamo mai'niye, hu'a apakesa afi'naya'mofe'mo agaefe'mo koli'amo hu'nae. 27 Koli nehageno'ae'mo Manamasi'a eno ha maeno apa vaya'aitegamo avalelino u'niye. Manamasi'a apa vaya'aife'mo, Solo'a kategamo ne'uno'ae'mo Ala kava ne'mo age'nigeno Ala kava ne'mo'a ha pai'niye Inagi Solo'a uno Yesu agi'alefe'mo Namasakasi kotegamo lokiya himamu'aleti'mo aeno hakalo huno hapa pai'niye, huno hapa pai'niye. 28 Hapa pai'nigeno'ae'mo Solo'a apakae'e'mo magokepi lokaeno mai'neno muki Yulusalemu haopalega apakae'e'mo magokepi lokaelino uneno huno mai'niye. 29 Solo'a koli osuno lokiya gemo huno Ala kava ne'mo Yesu agi'alefe'mo aeno hakalo huno hapa pai'niye. Galiki apakemo ne'aiya Yu vaya'e'mo ge huge afige hu'a mai'ne'a hapa pai'nige'apae'mo haesayafe'mo hu'nae. 30 Konaga'amogi ani gemo afite'apae'mo Sisaliya kotega avaleli u'a Tasasi kotegamo ali'a ate'nageno u'niye. 31 Ani afina'mo Goti mafa'ne'amo ali'a anupa hu'a mai'naya vaya'mo Yutiya kotegagi Galeliya kotegagi Samaliya kotegagi hu'a mai'naya siosi vaya'mogimo apaipamo'mo falu hu'nige'a apayamufa hu'a mai'nae. Gotife'mo koli hu'a mai'nageno'ae'mo Goti Auneme'amo'mo alagepa huno hapa mae'nige'a alagepa hu'a mai'nage'apae'mo mago'e mago'e vaya'mo Goti mafa'ne'amo hamale'nae.

Pita'a Lita kotega'e Yopa kotega'e'mo uno mai'niya gemae

32 Pita'a muki aupilaga umenitata nehuno'ae'mo Lita kotega mai'naya Goti mafa'ne'aitegamo u'niye. 33 Lita kotega mai'neno'ae'mo ageyana mago vekamo agi'amo Iniyasi'a eiti'a kafugamo kanage kanaga osuno muki afina'mo ne'maiya vekamo hipa'ale'mo havaeno mai'nigeno age'niye. 34 Ageteno'ae'mo Iniyasiyo, huno, Yesu Kalaisi'a alino alagepa huno kate'nigi he tika yakaikonakamo alika alagepa huka yakaiyo, huno ha pai'nigeno malage huno he ti'niye. 35 Muki Lita kotega mai'naya vaya'e Saloni kotega mai'naya vaya'mogi'e'mo agaemo agete'apae'mo apaipamo ali'a afe lete'a Ala kava netegamo u'nae.

36 Mago a kanomo agi'amo Tamaita'a Yopa taonifi'mo mai'neno Goti ge'amo ne'afiya a kanomo mai'niye. Galiki gefati'mo Nokasi'ae hu'a agi ae'nae. Muki afina'mo alagepa kava'age'mo huno kagemi ya'apimo ohane'niya vaya'mo hapa maeno apamige apamige huno mai'niya a kanoe. 37 Pita'a Lita taonifi'mo mai'nigeno'ae'mo ani a kanomo kaita hau'nigeno ago fali'niye. Fali'nige'a agufa'amo sese hutale'a anaga aeno anagi male'niya nopi'mo male'nae. 38 Yopa taonimo Lita taoni haopale'mo hane'niya'mofe'mo Pita'a Lita taonifi'mo mai'niye, hu'a hu'naya gemo Yopa taonifi'mo mago vaya'mo ge'amo ne'afiya vaya'mogi ani gemo afite'apae'mo lole vekala'mo ali'a anate'nage'ana u'ana Pitafe'mo, Malage huka lagaetegamo eno, hu'ana ha pai'na'ae. 39 Pita'a ani gemo afiteno'ae'mo anakae'e'mo uno ava'yi hu'nige'apae'mo avaleli'u'a anaga aeno anagi male'niya nopi'mo hai'nae. Muki kogu a'ne anaga'mogimo e'a Pita haopale'mo lokae'a mai'ne'a avi'ya'mo nehu'apae'mo Nokasi'a apakae'e'mo magokepi lokaeno mai'niya afina'mo alo hu'niya sioti'e kukena'e'mo ali'a ave li'nae. 40 Ave li'nageno'ae'mo Pita'a, kumatega lamiyo, huno hapa pai'nige'a lami'nageno ale'ya faino mai'neno nunumu'mo huteno aino afe leno kefa'ale'mo age'neno'ae'mo, Tamaitao, huno, he tiyo, huno nehigeno'ae'mo aulagamo ageno ayakeno Pita'mo ageteno'ae'mo he tino fai mai'niye. 41 Pita'a ayate'mo alino he tino ate'nigeno he ti'niye. Pita'a apaote vaya'e kogu a'ne anaga'aefe'mo ge hu'nige'a hai e'a mai'nageno'ae'mo Pita'a alino apaveli'nige'a age'nayana afa'a mai'nige'a age'nae. 42 Ani kavafe'mo ava gemo muki Yopa haopalegamo aino atagu faenuneno hu'nige'apae'mo asole vaya'mogi Ala kava nefe'mo apakesa afi'a fatago hu'nae. 43 Pita'a yatala afina'mo Yopa taonifi'mo mago vekamo'a afu agufaleti'mo alu ya alu ya'mo alo hisayafe'mo heno kalo paeno alino api aino ne'ateya vekamo agi'amo Saimoni nopi'mo havaeno mai'niye.

Copyright information for `KYG