Colossians 1

Nagaemo Polo'nae'mo Goti'a agesamo afiteno hau'nigeno'ae'mo Yesu Kalaisi apa veka'amo lekana paino nate'niya vekamo'na'e konagatimo Timoti'e'mo mani avo'mo nekao'ae. La'agaemo Kolosi taonifi'mo mai'naya lapaote vaya'mo Kalaisipi'mo mai'netapae'mo o'ataleta alagepa huta mai'naya konagati'ae'mo mani avo'mo nekao'ae.

Afotimo Goti'e Ala kava ne'mo Yesu Kalaisi'e'mo fiku lapa mae'ana lapami'anageno lapaipamo'mo falu hino.

Polo'a hao ke heteno'ae'mo nunumu huno apate'niya gemae

Hogotetapa alagepa faigoko gemo afitetapae'mo Goti'a koku'napi'mo male'neno yagaino nelapateya yafe'mo ava gemo afitetapa lapavayagunagu hutapa agava ne'maiye. Agava mai'netapae'mo Kalaisi Yesufe'mo lapakesa afita fatago hu'netapae'mo muki apaote vaya'aife'mo lapau lapayamopafi'mo lapau'niya kavafe'mo lapava gemo afi'none. Afi'nona afinateti'mo muki afina'ae'mo nunumu huta nelapatone. Ala kava netimo Yesu Kalaisi afo'amo Gotife'mo hao ke heta nelapatone. Alagepa faigoko ge'amo lapakaetegamo eno afole ai'niya gemo'a ma mopafi muki haopalega'e'mo eno afole aiteno ne'ya'amo alino ne'ate. Mani gemo Goti'a fiku hapa maeno ne'apamiya gemo afitetapae'mo lama gemo hane'niye, hutapa afi'naya afinateti'mo lapakaepati'e'mo ne'ya'mo alino ne'ate. Epafalasife'mo lahau layamopafi'mo lahau'niya vekamo'a lagae'e'mo lokaeno ali'ya'mo ne'aliya vekamo'a lapakaetefe'mo Kalaisi ali'ya'amo o'ataleno alagepa huno ne'aliya vekamo'a mani gemo ago lapa pai'nigetapa afi'nae. Agaemo lapava gemo huno'ae'mo, Goti Auneme'amo'mo apaipafi'mo ali'ya'mo ali'nige'apae'mo hapau apayamopafi'mo nehapaiye, huno laha pai'niye.

Ani kava hutapa mai'naya'mofe'mo afi'nona afinateti'mo o'ataleta nunumu huta lapateme lapateme eta mai'none. Lagaemo, Apakaemo kahau'nisiya kava'mo hisayafe'mo kaunekame'mo'a alino apaya malenage'a alagepa hu'a apakesamo afite'a age'a aeto nehaya kava'mo apaipafi'mo havai teno, huta nunumu nehune. 10 Goti'a ani kava'mo hisigeta ala agi'amo amisaya agufa kava'mo hutapa maisageno alagepa kava'mo'a lapaipafati'mo alagagana huno afole aisigetapa Goti'mo mago'e mago'e hutapa agesayafe'mo nunumu nehune. 11 Goti'a ha le konali ayamufa'age vekamo'a ayamufa'aleti'mo lokiya vaino lapateno. Lokiya vaino lapatesigetapa hosu afina'mo o'ataleta hosu lapaipamo okalita lapamogaga ai'netapa muki ya'mo Afo'amofeke'mo hao ke hegae. 12 Agaemo yagaino ne'apateya ha le kote'mo hai'a ne'maiya vaya'e'mo hetama maleno late'niya hetamatimo afa'a alisunafe'mo alo huno late'niye. 13 Agaemo hani ya'mo lokiya'alegati'mo lagufamo alino katino lateteno lavalelineno hau'niya Mafa'ne'amo'a yagaino ne'apateya kegi'yafi'mo late'niye. 14 Mafa'ne'amo'mo kola'aleti'mo miya faino hatu maeno lateteno'ae'mo hosu kavatimo alino atale'niye.

Kalaisi'mo hogote vekamo mai'niya gemae

15 Kalaisi'a no'agaya Goti aune'amo mai'niye. Yege Mafa'ne'amo mai'neno'ae'mo muki alo hu'niya ya'e vaya'e'mo aeno apakaseno mai'niye. 16 Goti'a Kalaisipi'mo muki ya'e vaya'e'mo alo huno apate'niye. Koku'napi'mo hane'niya ya'e vaya'enagi ma mopafi'mo hane'niya ya'e vaya'enagi ne'agaya ya'e vaya'enagi no'agaya ya'e vaya'enagi huno alo huno apate'niye. Agaetetike'mo yagai'a ne'apataya vayanagi ala vayanagi kava vayanagi ala apaki vayanagi huno agaetefe'mo alo huno apate'niye. 17 Agaemo muki yate'e vaya'aite'e'mo hogote vekamo mai'neno yagaino ne'apatege'apae'mo hanege maige hu'a mai'nae. 18 Siosi vaya'mo Kalaisi agufa'agana hu'a mai'nageno'ae'mo apakenopa'agana huno mai'neno yagaino ne'apate. Agaemo aepa fai'niya vekamo mai'niyanageno alagi hogote vekamo maisiyafe'mo kanolufati'mo hogoteno he ti'niye. 19 Goti'a muki agai'a aipa agesamo Kalaisi aipafi'mo alagi hanesiyafe'mo hau'niye. 20 Hau'niyanageno koku'napi vaya'e ma mopafi vaya'e'mo agaeteti'mo alino nanu aeno apatesige'a magokepi lokae'a maisayafe'mo hau'niye. Goti'a hau'nigeno'ae'mo Mafa'ne'amo'mo malipu yosale'mo aino laki'niya kola'aleti'mo alino nanu aeno late'niye.

21 Lapakaemo mago afina'mo Goti'e'mo lokaeta o'maitapa lapaote aote hutapa mai'netapae'mo hosu kava'mo huge hosu lapakesamo afige hutapa mai'netapae'mo kame vaya'amo mai'naya'monanafa hemenimo agai'a'e'mo alino nanu aeno lapate'niye. 22 Goti aulagale'mo lapaote vaya'amo maisageno hosu kavatapimo alagi ohanesigetapa vai'mo o'alisayafe'mo Mafa'ne'amo'mo agufamo aliteno fali'niya kavateti'mo alino nanu aeno lapate'niye. 23 He, o'ataleta lapakesa afita fatago hume hume ne'utapae'mo no'mo yafate'mo fai'a ategekana hutapa mai'neta o'ataletapa alagepa faigoko ge'amo afitetapa lapavayagunagu hutapa agava mai'neta o'atale'nisayana Goti aulagale'mo alagepa huta he titapa maigae. Mani alagepa faigoko ge'amo muki ma mopafi vaya'aife'mo ae'a hakalo hu'a hapa pai'nage'a afi'nae. Nagaemo Polo'na ani gelefe'mo Goti ali'ya'amo ne'aluva vekamo hamale'nove.

Polo'a siosi vaya'aite'mo ali'ya'mo ali'niya gemae

24 Nagaemo lapakaetefe'mo kanamo ne'aluva'mofe'mo namogaga ne'auve. Kalaisi'a kanamo ali'niya kava hu'na agufalefe'mo kanamo ne'aluve. Kalaisi agufa'amo agai'a siosi vaya'amae. Goti mafa'ne'amogi kanamo ne'aliya ali'ya'apimo hano osu'niye. Nagaemo kanamo ne'aluva hetama'nimo ali'na hapa maegauve. 25 Goti'a lapakaetefe'mo ge'amo ae'na hakalo hu'na hano hisuvafe'mo siosi ali'yate'mo navaleno alino nate'niye. 26 Goti'a mago kava'amo alino fala ki male'nige'a muki vaya'mogimo muki afina'mo o'age'naya'monanafa hemenimo apaote vaya'amo alino apave li'niye. 27 Goti'a muki nofi vaya'aitegamo asole ha le konali kava'amo fala ki'niyanageno alino apave lisiyafe'mo hau'nigeno'ae'mo agesamo afi'niye. Mani fala ki'niya gemo Kalaisi'a lapaipafi'mo mai'niya nefe'mo ava gemo hane'niye. Agaetefe'mo ha le konali ya'amo alisayafe'mo lapavayagunagu hutapa agava ne'maiye. 28 Lagaemo muki vaya'amo apavalelita uta apatesunage'a Goti aulagale'mo Kalaisipi'mo mai'ne'a hai'a hapaisayafe'mo muki vaya'aife'mo Kalaisife ava gemo aeta hakalo huta hapa nepaune. Lagaemo alagepa lagesamo ne'afitae'mo muki vaya'aife'mo, ehetapiye, huta huge muki vaya'aina alita apaya malege huta ne'maune. 29 Nagae'e'mo mani kava'mo afole aisiyafe'mo Kalaisi ayamufa'aleti'mo naipafi'mo lusi kava huno ali'ya'mo ne'alige'nae'mo ayamufa'aleti'mo naya mukiki hu'na ali'ya'amo ne'aluve.

Copyright information for `KYG