Ephesians 2

Goti'a fali'nayateti'mo ago alino he tino lapate'niya gemae

Hogotetapa Goti ge'amo ago amagita ataletetapa hosu kavapi'mo mai'netapae'mo fali kavategamo mai'nae. Ma mopafi hosu kava'mo akame huge ala vekamo koku'na'e mopa'e'mo hanetegeno folagate ne'maiya hosu enisole vaya'aite'mo yagaino ne'apateya vekamo ge'amo akame huge hutapa mai'nae. Agaemo Goti ge'amo amagi'a ne'atalaya vaya'ai apaipafi'mo ali'ya ne'aliya aune vekamo mai'niye. Muki vaya'amogitamo apakaekana huta mai'neta hosu kavafeke'mo laha'ye hu'nigetae'mo lagufamo'mo hau'niya kava'mo huge hosu kavafe'mo lagesamo afita akame huge huta mai'none. Itatimogi ali'a late'nagetae'mo muki ma mopafi vayakana huta hosu laipamo alita mai'nona'mofe'mo Goti'a aipamo leno nelateyanageno kayo'mo lamisiya agufa kavategamo mai'none. Mai'nona'monanafa kagemi ya'api'e vaya'mogimo alopa kagemi ya'apimo age'a male'naya kava huno Goti'a hau huno ne'apateya kava'amo kagemi ya'agana huno male'niya vekamo'a lagaefe'mo Goti ge'amo ago amagita ataleteta hosu kavapi'mo fali kavategamo mai'nonageno'ae'mo lusi kava huno hau ayamopafi'mo hau'niya'mofe'mo afa'a maisuna ya'mo alino lami'nigeta Kalaisi'e'mo afa'a mai'none. Fiku lapa maeno lapami'niya kavateti'mo lapakufamo alino katino lapate'niye. Kalaisi Yesupi'mo mai'nonageno'ae'mo Goti'a agae'e'mo alino he tino lateteno koku'napi lavalelino haino late'nigeta agae'e'mo fai mai'none. Goti'a lusi kava huno fiku laha maeno lami'niya kava'amo kagemi ya'agana huno male'neno Kalaisi Yesuteti'mo agai'a aipamo alino ao ya'mo hu male'niya kava'amo alino apave lisige'apae'mo afole aisiya afina'mo agege agege hu'a maigae. Goti'a fiku lapa maeno lapami'niya'mofe'mo lapakesa afita fatago hu'naya kavateti'mo lapakufamo alino katino lapate'niye. Lapakaitapimo lapakesa afita fatago osu'nafa Goti'a fiku lapa maeno lapami'nigetapa lapakesa afita fatago hu'nae. Goti'a vaya'mogimo apaki'apile'mo ali'a asaga osisayafe'mo alagepa kava'apileti'mo apakufamo alino katino no'apate. 10 Goti'a alagepa kava'mo hisunafe'mo hogoteno, hugae, huno hu male'niya kava'mo hisunafe'mo Kalaisi Yesupi'mo saufa vaya'mo alo huno late'niye.

Kalaisipi'mo magoke vaya'mo mai'none, huno hu'niya gemae

11 Alo huno lapate'niya'mofe'mo lapakaemo, hogoteta mai'nona afina'mo haiya agufa kava'mo huta mai'nopi, hutapa lapakesamo afita ho hiyo. Itatapimogimo ali'a lapate'nagetapae'mo Yu nofi vaya'mo o'mai'nae. Yu vaya'mogi apayateti'mo apakufamo lagau'a ne'atalaya vaya'mogimo lapakaefe'mo, Goti ke'aepa ge'amo o'afi'naya vaya'moge'apae'mo apakufamo lagau'a no'atalaya vaya'mo mai'nae, hu'a nehae. 12 Ani afina'mo Kalaisi'e'mo lokaeta o'maitapa lapaote mai'nae. Isaleli vaya'ai kegi'ya yu'ilaga haiteta o'maitapa malaga mai'nae. Goti'a lapa maegauve, huno hu male'niya kotalake gelefe'mo polomasi gemo hu male'niya gemo lapa opai'nigetapa o'afi'nae. Ma mopafi'mo mai'netapae'mo Gotitegati'mo alagepa ya'mo alisayafe'mo agava mai'netapa lapavayagunagu osu'nageno Gotitapimo'mo o'mai'niye. 13 Lapakaemo afagi'ale'mo mai'naya'monanafa hemenimo Kalaisi Yesupi'mo mai'nageno'ae'mo Kalaisi'a kola'aleti'mo lapavalelineno Goti haopale'mo lapate'niye. 14 Agai'age'mo kame kavatimo alino hano huno atale'nigeta magokepi lokaeta ne'maune. Hogoteno folagapi hane'niya kegi'yamo'mo alino fako huno late'nigetae'mo lapaote maige laote maige huta ne'maunageno'ae'mo ani kegi'yamo ago alino halagape vaino atale'niye. 15 Agaemo malipu yosale'mo mai'neno'ae'mo agufa'aleti'mo Yu ke'aepa gemo'a ma kava hiyo, ina kava osiyo, huno hu'niya gemo alino ataleteno Yu nofi vaya'e alu nofi vaya'e'mo alino agaepi'mo lokaeno lateteno saufa nofi vaya'mo alo huno lateteno'ae'mo kame nehuna kavatimo alino hano huno atale'niye. 16 Kalaisi'a malipu yosale'mo fali'niya kavateti'mo apaini hu'a atete'apae'mo apaini hu'a ne'apataya kava'mo alino hano huno ataleteno lole nofi vaya'mo alino magoke nofi vaya'mo hamaleno lateteno'ae'mo lagaegi lapakaegi Goti'agi huno alino nanu aeno late'niye. 17 Ani kava huteno'ae'mo eno lapakaemo afagi'ale'mo mai'naya vaya'e lagaemo Goti haopale'mo mai'nona vaya'mogita'e'mo, kame nehaya kava'mo ali'na hano hu'na atale'novanagetapa Goti'e'mo magokepi lokaeta maigae, huno aeno hakalo huno laha pai'niye. 18 Agaemo lagae'e lapakae'e'mo ka'mo valino late'niyanageta hemenimo magoke Auneme'aleti'mo muki ya'mo Afo'amotegamo afa'a haigune.

19 Ani kava hutapa mai'naya'mofe'mo hemenimo lapakaemo nata vaya'mo maige alu kotegati'mo e'a mai'naya vayakana huta maige hutapa o'mai'naya'monanafa Goti apaote vaya'a'e'mo magoke kote vaya'mo mai'netapa Goti afamo anaga vaya'a'e'mo magokepi lokaeta mai'nae. 20 Apa vaya'mo Gotitegati gemo alini e'a ae'a hakalo hu'a hapa nepaiya vaya'mogimo Goti'a no'mo faino ne'ateya yafakana hu'a mai'nae. Goti'a ani yafate'mo no kigekana huno alino lapate'niye. Yesu Kalaisi'a hogote yafa'mo aluga aluga atupale'mo no'mo fai'a ne'ataya yafakana huno mai'niye. 21 Agaepi'mo muki ya'ale'mo atafau'neno Ala kava ne'mo aote mono no'amo kime kime nehaiye. 22 Agaepi'mo Goti'a Auneme'amo no'afi'mo maisiyafe'mo lapakae'e'mo alino anupa huno no kigekana huno nelapate.

Copyright information for `KYG