Ephesians 5

Lapakaemo Goti'a hau ayamopafi'mo nehaiya mafa'ne'amo mai'naya'mofe'mo agaekana huta mai'netapa nehiya agufa kava'mo hiyo. Kalaisi'a lagaefe'mo hau ayamopafi'mo hau'nigeno'ae'mo agufa'amo sipisipimo amagi'naya agufa kava'mo huno alagepa atumo ne'aiya ofalinimo alino Goti'mo ami'niya agufa kava'mo hutapa konagatapie'mo lapau lapayamopafi'mo nelapainagetapa maiyo. Kumai kava'mo osuge muki o'ani'ya kava'mo osuge lapa'ye osuge hutapa Goti apaote vaya'amogi hisaya agufa kavake'mo hiyo. Fiku yanage'a ani agufa hosu kava'mo nehafi, hu'a apakesamo afigae. Alino o'ani'ya faino ne'apateya agufa gemo osuge negi nagi gemo osuge hosu kigi yokalo gemo osuge hutapa maiyo. Goti mafa'ne'amogi nosaya agufa gemo hane'niyanagi ani agufa gemo osutapa Gotifeke'mo hao ke heyo. Lapakaemo ago afi'nayana kumai kava'mo nehaya vaya'mofi o'ani'ya kava'mo nehaya vaya'mofi hapa'ye nehiya vaya'mofi hu'a Kalaisi'e Goti'e'mo yagai'ana ne'apata'a koteti'mo hetama'apimo o'aligae. Mago vaya'mogi aigofe goti'apimogife'mo mono nehaya agufa kava'mo hu'a hapa'ye nehiya vaya'mogi ma mopafi yatefeke'mo mono nehae. Mani agufa hosu kava'mo nehaya'mofe'mo Goti ge'amo o'afi'a amagi'a ne'atalaya vaya'aife'mo aipamo leno ne'apateyanageno alagi apamagigiya'mofe'mo fiku yanage'a negi gemo hute'a humi lapategae. Alagi apamagigiya'mofe'mo afalu afalugana agufa kava'mo hutapa o'maiyo. Hogotetapa hanipi'mo mai'naya'monanafa hemenimo Ala kava nepi'mo mai'netapae'mo ha le yakana hutapa mai'naya'mofe'mo mafa'ne'amogimo hisaya agufa kava'mo hiyo. Goti Auneme'amo'mo alagamo ne'aesigetapae'mo alagepa kava'mo huge fatago kava'mo huge lama ge kava'mo huge hutapa maigae. 10 Mafa'ne'amo mai'netapae'mo Ala kava ne'mo'a hau'niya kava'mo amalageka hutapa agegeyo. 11 Hanipi'mo nehaya kava'mo'a alagamo no'aeyanagi hosu kava'mo nehaya vaya'e'mo afalu afalugana agufa kava'mo osutapa hosu kava'apimo alita ha le yategamo afole aitapa ateyo. 12 Fala ki'a nehaya kavafe'mo ava gemo hisunana lavagage hugiye. 13 Fala ki'a nehaya'monanafa hosu kava'apimo ha le yategamo alita afole aita ne'apatesage'apae'mo alagepa hu'a agete'a ha le vaya'mo hamalegae. 14 Ani kavafe'mo huno'ae'mo,

kaukale'nana vekamogamo kaupati'mo he tige fali'naya vayapati'mo he tige huka maigeno'ao Kalaisi'a kaipafi'mo ha le ya'mo alino kamino, huno hu'niye.
15 Hu'niya'mofe'mo muki afina'mo alu kava alu kava'mo nehutapae'mo alagepa hutapa yagaita maiyo. O'afi'nisaya vaya'ai kava'mo osutapa agete'a afi'naya vaya'ai kavake'mo hutapa maiyo. 16 Hemenimo hosu kava'mo nehaya afina'mo hane'niya'mofe'mo muki afina'ae afina'ae'mo alagepa kavake'mo huge huge hutapa maiyo. Fiku yanageno alagepa kava'mo hisaya afinatapimo uno kasaegaiyanagi. 17 Inagi negi nagi vaya'mo o'maitapa Ala kava ne'mo hau'niya kavafe'mo kahauya hutapa ageyo. 18 Lusi ani'mo ne'netapa negi nagi gemo osigeno'ao lapakufamo alino hosu huno olapateno. Osutapa Goti Auneme'amo'mo lapaipafi'mo havai teno. 19 Mai'netapae'mo konagatapimogife'mo Samu gemo huge mono yokemo huge lapaunelapameteti'mo yokemo huge huta hapa paiyo. Lapaipafi'mo mono yokemo huge Ala kava nefe'mo Samu yokemo huge hutapa maiyo. 20 Muki afina'mo muki ya'e kavate'efe'mo Afotimo Gotife'mo Ala kava netimo Yesu Kalaisi agi'aleti'mo hao ke hetapa maiyo. 21 Lapakaemo Gotife'mo koli hutapa mai'netapae'mo konagatapimogi'e'mo afalu afalu kava'mo nehutapa apaiyafi'mo maiyo.

A'ne'api'e anau'apimogi'efe'mo hu'niya gemae

22 A'ne'apimogitapae, hu'na, Ala kava netapimo ge'amo afitetapa aiyafi'mo ne'maiya'mofe'mo anautapimogi ge'apimo ne'afitapa apaiyafi'mo maiyo. 23 Siosi vaya'mogimo Kalaisi agufamo mai'nageno Kalaisi'a apakufamo alino katino ne'apateya vekamo'a agufa'amo agenopagana huno mai'neno yagaino ne'apate. Ani kava'mo hu'a anautapimogi yagai'a nelapataya vaya'mo mai'nae. 24 Siosi vaya'mogimo Kalaisi ge'amo ne'afi'a aiyafi'mo ne'maiya kava hutapa anautapimogi ge'apimo ne'afitapa muki kavatefe'mo apaiyafi'mo maiyo. 25 Anau'apimogitapae, hu'na, Kalaisi'a siosi vaya'aife'mo hau ayamopafi'mo hau'nigeno'ae'mo falino apate'niya kava hutapa a'netapie'mo lapau lapayamopafi'mo lapaino. 26 Agaemo siosi vaya'amo alino apaote apate'neno Goti ge'aleti'mo ani'mo falegekana huno faleno apatesiyafe'mo siosi vaya'alefe'mo falino apate'niye. 27 Alagepa siosi'amo ha le konali siosi'amo'a o'ani'ya faifa ya'mo ohanege kalagukifa yakana huno ohanege magoke hosu ya'mo ohanege huno ohane'nisigeno'ae'mo a'mo aligekana huno alisiyafe'mo falino apate'niye. 28 Anau'apimogimo apakai'api apakufae'mo nehapaiya kava hu'a a'ne'apie'mo hapau apayamopafi'mo hapaino. A'ne'apie'mo nehapaiya vemogimo apakai'apie'mo nehapaiye. 29 Muki vaya'mogimo apakai'api apakufae'mo apaini osu'a hapau'nige'a ne'ya'mo nege apakufale'mo alagepa hu'a yagai'a atege hu'a ne'maiye. Ala kava ne'mo'a siosi'ale'mo ani kava'mo nehiye. 30 Agufa'amo maige agufafi alu ya alu ya'amo maige ayamufafi'mo alu ya alu ya'amo maige huta mai'nona'mofe'mae. 31 Goti mukufi gemo'a huno'ae'mo,

Hu'niya'mofe'mo mafa'nemogimo kosite'apae'mo ita'api afo'apimogimo apatale u'a a'mo alite'a a'ne'api'e'mo lokae'a maisageno'ae'mo lole kanola'moganimo magoke anakufamo hamalegaiye,
huno hu'niye.
32 Mani gemo alagi alino fala ki male'niya gemo hane'niya'monanafa siosi vaya'mogita'e Kalaisi'e'mo magokepi'mo lokaeta ne'maunageno'ae'mo magoke lagufamo nehaneya kavafe'mo mani gemo nehuve. 33 Siosilefe'mo nehuva'monanafa lapakaitapie'mo lapau lapayamopafi'mo nelapaiya kava hutapa lapamete lapamete hutapa a'netapie'mo lapaino. Inagi a'nemogimo anau'apimogi apaki'apile'mo ali'a asaga nehu'a ge'apimo afi'a akame hu'a maiyo.

Copyright information for `KYG