Esther 1

Kuvini a kanomo Vasiti'a kini vekamo Sekisi ge'amo o'afi'niya gemae

Pesiya kotegamo Sekisi'a kini vekamo mai'niye. Agaemo Susa taonifi'mo gamani yafa lafi kegi'yafi'mo yagaino ne'apateya siate'mo fai mai'neno'ae'mo muki vaya'mo vani hataleti tuveti seveni'a polovenisifi'mo mai'naya vaya'aite'mo yagaino apate'neno'ae'mo Itiya kotegati'mo aepa faiteno uno Itiyopiya kotega'e'mo yagaino apate'niye. Lole'e mago'e kafugamo kini vekamo mai'neno yagaino ne'apateno'ae'mo muki ala apaki vaya'mo muki kotega mai'naya vaya'aifenagi ali'ya'amo ne'aliya vaya'aifenagi gamani vaya'aifenagi huno alopa yagita huteno ge hu'niye. Pesiya ami vaya'aifenagi Mitiya ami vaya'aifenagi yagai'a ne'apataya vaya'aifenagi ala vaya'aifenagi huno ge hu'nige'a e'a mai'nae. Ani ne'ya'mo mago'e huno apamime apamime u'nige'a sigisi'a kaimo ne'a mai'nageno'ae'mo ani kini vekamo'a muki no'afi konali ya'amogi kagemi ya'amogi muki alu ya alu ya'amogi huno alino apave li'niye. Ani ya'mo age'nayana alagepa ya'mo hane'nigeno mago hogote ya'mo hane'nige'a age'nae.

Ani alopa ne'ya'mo ago ne'a hano hutageno'ae'mo kini vekamo'a mago alu alopa ne'ya'mo agai'a no haopa'ale'mo lafi kegi'ya yu'ilagamo yagita hu'niye. Ani ne'ya'mo Susa taonifi'mo gamani yafa lafi kegi'yafi'mo muki mai'naya vaya'mo ala vayanagi ina agufa vayanagi hu'a e'a ne'nae. Ani ne'ya'mo neme neme u'a magoke salemo mai'nae. Ani ne'ya'mo ne'naya haopale'mo alagepa hi'yalamu'mo hane'niya haopale'mo akeya'vilaga vaya'mogimo haesa huge yaveyave huge oko huge hu'niya yafa'e alave'yogana agufa yafa'e'mo ali'a mopafi'mo kale kae'a hi'yalamu'mo hu male'nae. Ani ne'ya'mo negefe'mo hu'apae'mo ani yate'mo yaveyave lavolavoleti'e oko lavolavoleti'e'mo asai malete'a alagepa nofiteti'mo ki male'nae. Vegovego siluva kete'mo lavolavomo asai malete'a yafa posimo fai'a ate'naya posile'mo nofi ki male'nae. Ani ne'ya'mo nesaya aupilaga yate'mo alagepa goli siamo malege alagepa siluva siamo malege hu'a maleli u'e'a hu male'nae. Vaya'mogimo ani'mo nesaya kapumo aeto agufa'e goli kapumo ali'nae. Kini vekamo'a asole nofi alagafati ani'mo alino ani vaya'mo lakino apami'niye. Nofi alagafati ani'mo na magi kapumo lakita negaune, hu'a hu'nafi hapau'niya agufa ani kapumo laki'a ne'nae. Kini vekamo'a no'afi'mo ali'ya'amo ne'aliya vaya'ae'mo, muki vaya'amogimo anife'mo hapau'nisiya'mo'mo kapu'apifi'mo ani'mo lakitapa apamiyo, huno hapa pai'niye. Ani afina'mo Kuvini a kanomo Vasiti'a ina kava huno muki a'ne anaga'ageke'mo kini vekamo nopi'mo alopa ne'ya'mo nesayafe'mo yagita huno apate'nige'a e'a ne'nae.

10 Ani alopa ne'ya'mo ne'naya afina'mo napa seveni afina'mo kini vekamo'a nofi alagafati ani'mo lusi ani'mo neteno aise'amo negi male'niye. Maleteno hogote vaya'mo no'afi'mo ali'ya'amo ne'aliya vaya'mo seveni'a vaya'aife'mo ge hu'nige'a e'nae. Apaki'apimo Mehumani'agi Misita'agi Hamona'agi Mikita'agi Amakita'agi Seta'agi Kakasi'agi hu'a mai'nae. 11 Kini vekamo'a, Kuvini a kanomo Vasiti'mo utapa avalelita eyo, huno hapa pai'niye. Ani Kuvini a kanomo Vasiti'mo egefe'mo, kuvini kakolitamo alino agenopale'mo maleno aliteno eno, huno hapa pai'niye. Ani kuvini a kanomo alagepa agufamo hane'niya a kanomo mai'niya'mofe'mo kini vekamo'a muki gamani vaya'e muki ani alopa ne'yate'mo e'naya vaya'mogi'e'mo kanale agufa'amo alinineno apavelisige'a agesayafe'mo hau'niye. 12 No'afi'mo ali'ya'amo ne'aliya vaya'mogimo kini vekamo'a hapa pai'niya gemo u'a ha pai'naya'monanafa Kuvini a kanomo Vasiti'a o'afi'niye. O'afi'nigeno ani gemo kini vekamo'a afiteno'ae'mo lusi kava huno ge ne'nigeno aipamo le'niye. 13 Kini vekamo'a hu'niya kava'amo hane'niyana muki vaya'aite'mo alagepa huno yagaino apatege ke'aepa gemo afige huno maisiyafe'mo aipa agesamo ali'a api ai'a hu'a atesaya vaya'aife'mo ge huno apafi nekeya agufa kava'mo hane'niye. Ani agufa kava'amo hane'niya'mofe'mo kuvini a kanomo'mo hu'niya kavafe'mo ava gemo afiteno'ae'mo ani agete'a afi'naya vaya'aife'mo keya aeno ge hu'niye. 14 Ina kava huvo, hu'a ha nepaiya vaya'ai apaki'apimo Kasena'agi Seta'agi Atimata'agi Tasisi'agi Melesi'agi Masena'agi Memukani'agi hu'a mai'nae. Ani seveni'a vaya'mo Pesiya vayapati'mo maige Mitiya vayapati'mo maige hu'a mai'ne'a hogote gamani vaya'mo mai'nae. 15 Inagi agaemo ani vaya'aife'mo ina ge huno hapa pai'niye. Kuvini a kanomo Vasiti'a nagaetegamo egefe'mo hisiya kavafe'mo no'nifi'mo ali'ya'nimo ne'aliya vaya'mo ali'na apate'noge'a u'a ha pai'naya'monanafa ge'nimo ago amagino atale'niye. Ani kavatefe'mo ke'aepa gemo'mo na yane, huno hu'niye. Lagaemo Kuvini ategamo na agufa kava'mo hugune, huno apafi ge'niye.

16 Inagi ala vekamo Memukani'a kini veka'e ha ne'maya gamani vaya'efe'mo ina ge huno hapa pai'niye. Kini vekae, hu'na, afiyo. Kuvini a kanomo Vasiti'a kini vekamogalegage'mo ani agufa hosu kava'mo osu'niya'monanafa agaemo muki gamani vayakalega'e kagaemo muki yagaika ne'apatana vaya'aitega'e'mo ani agufa hosu kava'mo hu'niye. 17 Kagaemo muki haopalegamo yagaika ne'apatana a'ne anaga'mogimo kuvini a kanomo'mo hu'niya kavafe'mo ava gemo afite'apae'mo ina ge hu'a hugae. Kini vekamo Sekisi'a Kuvini a kanomo Vasitife'mo, eno, huno ge hu'niya'monanafa ge'amo ago amagino atale'niye, hu'a hugae. 18 Ani gemo hute'a anau'apimogi ge'apimo o'afisage'apae'mo kaveta hugae. 19 Kini vekae, kahau'nisiya'mo'mo mani agufa gemo huteka ge huka atalegeno muki vaya'aitegamo uneno hino. Vasiti'a halate mago'e huno eno o'nagegaiye. Ani agufa lokiya gemo huka Pesiya vaya'e Mitiya vaya'e'mo ke'aepa ge'apimo hane'niya mukufi'mo vaya'mogimo ae'a kalo pae'a o'atalesayafe'mo avo'mo kae malegeno haneno. Avo'mo kae maletesagekae'mo Vasiti aimu'yale'mo mago aeno aga se'nisiya a kanomo kuvini a kanomo maisiyafe'mo lekana paika ato. 20 Mani gemo'mo muki ne'yagaina kotegamo aino atagu faeno uneno hisige'apae'mo muki a'ne anaga'mogimo afite'a anau'apimogi ge'apimo afigae. A'nemogimo apaki hane'niya anau'apimogi ge'api'e apaki ohane'niya anau'apimogi ge'api'e'mo afa'a afigae, huno ha pai'niye.

21 Kini veka'e muki ne'yagaiya vaya'mogi'e'mo ani gemo afite'apae'mo ani gee'mo hapau'nigeno kini vekamo'a Memukani'a hu'niya gemo akame hu'niye. 22 Inagi kini vekamo'a avo'mo kaeno atalegeno muki ne'yagaiya kotegamo uneno hu'niya gemo ina ge huno alu apake alu apakefati'mo avo'mo kaeno'ae'mo, Vemogige'mo afamo anaga'apile'mo yagai'a apateyo, huno avo'mo kae male'niye.

Copyright information for `KYG