Esther 3

Hemani'a muki Yu vaya'mo naipeleti'mo apaisuge'a faligae, huno hu male'niya gemae

Henaga'amo aise afina'mo kini vekamo Sekisi'a mago vekamo'a muki ne'yagaiya vaya'mo aeno apakaseno hogote gamani vekamo maisiyafe'mo ani vekamo agi'amo Hemani'a lekana paino ate'niye. Hemani afo'amo'mo Hame'nata'ae, Agagai aginago vekamae. Kini vekamo'a muki vaya'aife'mo, Hemani'a ala agi'amo amiyo, huno hapa pai'nige'a muki kini vekamo ali'ya'amo ne'aliya vaya'mogimo ape hute'a ala agi'amo ami'naya'monanafa Motekai'a ape huteno Hemani'mo ala agi'amo amisiyafe'mo ohau'niye. Kini vekamo lafi kegi'yafi'mo mai'ne'a ali'ya'amo ne'aliya vaya'mogimo Motekaife'mo, Na kava higekae'mo kini vekamo ge'amo akame nosane, hu'a afi ge'nae. Apakaemo muki afina'ae afina'ae'mo Motekaife'mo ani kava'ae'mo ha pai'nayana ge'apimo o'afi'niya'mofe'mo u'a Hemanife'mo, Motekai'a, Yu nofi vayapati vekamo mai'nove, huno hapa pai'niye. Apakaemo, Hemani'a Motekai'mo afa'a atesigeno mai'neno ani agufa kavake'mo huno maisifigeta agegaune, hu'a apakesamo afi'nae. Hemani'a Motekai'mo ageyana agaetefe'mo ape huteno ala agi'amo o'ami'nigeno ageteno'ae'mo lusi kava huno aipamo le'niye. Apakaemo Motekaife'mo, Yu nofi vayapati vekamo mai'niye, hu'a ha pai'naya'mofe'mo Hemani'a Motekaike'mo naipeleti'mo aisiyafe'mo ohau'niya'monanafa muki Motekai nofi vaya'mo Pesiya kotegamo mai'naya Yu nofi vaya'e'mo apaisige'a falisaya kafe'mo agesamo afino kahauya huno agesayafe'mo hu'niye. Inagi tuolofu'a kafugamo Sekisi'a kini vekamo mai'niya afina'mo napa vani kaimo agi'amo Nisani'e hu'a agi ne'aya kaile'mo Hemani'a na agufa kaile'mo hainu afina'mo alagepa hu'a Yu vaya'mo apaisaya afinafe'mo kahauya hu'a agesayafe'mo yafateti'mo satu yokalomo le'nae. Ani yokalomo ago le'a kahauya hu'a age'nayana tuolofu kaimo agi'amo A'na kaile'mo apaisaya afina'mo age'nae. Inagi Hemani'a uno kini vekae'mo ina ge huno ha pai'niye. Mago nofi vaya'mo muki kagaemo ne'yagaina kotegamo mai u'e'a hu'a mai'nae. Ani vaya'mogimo mago alu vaya'mo mani kote'mo mai'naya vaya'mogimo nehaya agufa kava'mo nosae. Apakaemo aeto agufa vaya'mo mai'ne'a kagaemo ne'yagaina kote'mo hu male'nana ke'aepa gemo akame nosae. Ani kava nehaya'mofe'mo kagaemo afa'a apatesanage'a maisaya'mo'mo ani kava'apimo'a alagi kaha o'maesigeno kagaemo kokamo'mo alagi alagepa huno ohanegaiye. Inagi kini vekae, huno, kagaemo kahau'nisiya'mo'mo ke'aepa gemo huka atalegeno uneno hisige'a muki vaya'mogimo ani ve a'nemo apaisage'a faliyo. Inagi kagaemo ani kava'mo hisanage'apae'mo naipeleti'mo apaisaya vaya'ai miya'apimo nagaemo lusi asole siluva monimo fifiti miliyoni kinamo ali'na monimo ne'malana nokafi'mo malegauve, huno ha pai'niye. 10 Kini vekamo'a Hemani'mo ke'aepa gele'mo alagena ya'amo hu maleteno alino lokiya vaino atesiyafe'mo ayateti'mo linimo asagino Hemani'mo Yu vaya'ai kame'apimo ami'niye. 11 Kini vekamo'a Hemanife'mo, Monikamo afa'a ate'neka ani vaya'aitegamo na agufa kava'mo huguve huka hisapigi ani kava'mo afa'a huvo, huno ha pai'niye.

12 Napa vani kaile'mo tetini afina'mo Hemani'a kini vekamo avo'amo nekaya vaya'aife'mo ge hu'nige'a e'nae. E'nageno'ae'mo agaemo muki ge'amo alagi hapa pai'nige'a avo'mo kae'nae. Muki ani kotega mopale'mo mai'naya vaya'ai apake'apifati apake'apifati'mo ani avo'mo kae'nae. Avo'mo ago kaetageno'ae'mo ani avo'mo alino muki agenopa ya'mo hu'a ne'yagaiya vaya'aitegagi gamani vaya'aitegagi hogote vaya'aitegagi huno atalegeno uneno hu'niye. Hemani'a muki ani kae'naya avo'ale'mo kini vekamo Sekisi linileti'mo alagena ya'amo hu male'nigeno kini vekamo'a agai'amo ani avo'mo kae'negekana hu'niye. 13 Avo'mo alini'a ne'vaya vaya'mogimo ani avo'mo alini u'apae'mo ani kini vekamo'a ne'yagaiya kote'mo ne'yagaiya vaya'mo apami'nae. Muki ani avopi gemo'mo huno'ae'mo, Tetini afina'mo tuolofu kaimo agi'amo A'na kaile'mo muki Yu vaya'mo apaisage'a faliyo. Muki neya ve a'negi anau anekalogi mafa'negi hutapa apaitapa hano hutapa apataleyo. Apaitapa hano hutaletapa muki kagemi ya'apimo aliyo, huno hu'niye. 14 Muki vaya'amogimo afite'a alo hu'a mai'ne'a lekana pai male'naya afina'mo Yu vaya'mo apaisayafe'mo avo'mo kae'naya gemo lekana paitapa muki polovenisi'afi'mo mai'naya vaya'aife'mo hapa paiyo, huno hapa pai'niye. 15 Inagi ani gemo alopa taonimo Susa taonifi'mo gamani yafa lafi kegi'yafi'mo mai'naya vaya'aife'mo ae'a hakalo hu'a hapa pai'nage'a afi'nae. Kini vekamo'a ani ke'aepa gemo avo'mo alini'a ne'vaya vaya'aife'mo malagene, huno hapa pai'nige'a u'a alini'a muki haopalegamo u'e'a hu'nae. Kini veka'e Hemani'e'mo fai mai'ne'ana nofi alagafati ani'mo ne'ana mai'na'a'monanafa Susa taonifi'mo mai'naya vaya'mogimo ani gemo afi'a hapau aite'a alu apakesa alu apakesamo afi'nae.

Copyright information for `KYG