Esther 4

Motekai'a Yu vaya'mo hapa maesiyafe'mo Esatafe'mo afi ge'niya gemae

Motekai'a afole ai'niya kavafe'mo ava gemo afiteno'ae'mo kukena'amo alino apake aino ataleteno hosu ulale kukenamo alino vaiteno la'nefamo alino faleteno'ae'mo aipafati'mo atu hae'nigeno alopa gefati'mo faiyosago faino yoke hulino taonifilagamo hai'niye. Agaemo kini vekamo yafa lafi kegi'ya kate kipate'mo uno ava'yi hu'niya'monanafa lafi kegi'ya yu'ilagamo ohai'niye. Kini vekamo'a, ha'ao, huno hu male'niyanage'a ulale kukenamo vai'a ali'nisaya vaya'mo ani lafi kegi'ya yu'ilagamo afa'a fale'a ohaigae. Apakaemo kini vekamo'a hu'niya gemo muki kotegamo mai'naya vaya'aife'mo ae'a hakalo hu'a hapa pai'naya afina'mo muki Yu vaya'mogimo ani gemo afite'apae'mo yulagefa aige ne'ya'mo o'ne'a mosige faiyosago fai'a yokemo hu'a avi'ya huge hu'a mai'ne'apae'mo muki vaya'amogimo ulale kukenamo ali'a vaite'a la'nefafi'mo havae'a mai'nae.

Esata ali'ya'amo ne'aliya a'ne anaga'e yagai'a ne'ataya ve anaga'mogi'e'mo e'a Motekai'a hu'niya kavafe'mo ava gemo hu'a ha pai'nageno Esata'a afiteno'ae'mo lusi kava huno aipamo'mo kana hu'niye. Agaemo Motekai'a ulale kukenamo asagino ataleteno alagepa kukenamo alino vaisiyafe'mo kukenamo alino apami'nige'a alini'a e'naya'monanafa Motekai'a o'ali'niye. Inagi Esata'a mago vekamo agi'amo Hatakife'mo ge hu'nigeno e'niye. Hataki'a mago kini vekamo a'ne anaga'aite'mo yagaino ne'apateya vekamo'a Esata ali'ya'amo alisiyafe'mo kini vekamo'a lekana paino ate'niye. Esata'a Hataki'mo uno Motekai'a hu'niya kava'mo aepa'ae'mo agesiyafe'mo alino ate'nigeno u'niye. Hataki'a Motekaitegamo uno'ae'mo ali'a anupa hu'a ne'maiya kuma'mo haopale'mo kini vekamo alopa no'mo lafi kegi'ya kate kipate'mo u'niye. Motekai'a agaetegamo afole ai'niya kavafe'mo Hatakife'mo ava gemo huno ha paiteno'ae'mo, Hemani'a Yu vaya'mo naipeleti'mo laisiyafe'mo alopa monimo kini vekamo'a monimo ne'maleya no'afi'mo malegauve, huno hapa pai'niya gemo ha pai'niye. Motekai'a Hemani'mo kae'niya avopati'mo mago avo'mo alino Hataki'a ami'nigeno ali'niye. Ani avopi gemo'mo huno'ae'mo, muki Yu vaya'mo apaige'a faliyo, huno avo'mo kae male'niya avo'mo alino Hataki'mo amiteno'ae'mo, Esatafe'mo muki afole aisiya kavafe'mo ava gemo huka ha paiyo, huno ha pai'niye. Hataki'a uno Esatafe'mo ha paisigeno Esata'a uno kini vekae'mo afi gesigeno kini vekamo'a muki Yu vaya'aife'mo hau huno apateno. Inagi Hataki'a uno Esatafe'mo Motekai'a muki hu'niya ge'amo ha pai'niye. 10 Esata'a ani gemo afiteno'ae'mo Hataki'mo uno mago gemo Motekaife'mo ha paisiyafe'mo alino ate'nigeno u'niye. 11 Esata'a huno'ae'mo, ina ge huka ha paiyo, Kini vekamo afa'a u'na o'agegauve. Inagi kini vekamo'a mago vekae'mo ge hisigeno'aeke'mo mai'neno yagaino ne'apateya nopi'mo haigiye. Inagi mago vekae'mo ge osu'nisigeno agai'amo haisiyana naipeleti'mo aisageno faligiye. Ani ke'aepa gemo ae'a aga nesaya ka'mo magoke ka'mo hane'niyana mago vekamo afa'a nehaisigeno'ae'mo kini vekamo'a goli hayopa kayo'aleti'mo alino ako'ya huno lekana paino atesiya'mo'mo ani vekamo ofalino agaetegamo afa'a ugiye. Muki vaya'amo kini vekamo ali'ya'amo ne'aliya vaya'e afa vaya'mogi'e'mo ani ke'aepa gemo ago afi'nae. Inagi magoke kai agufa kana'amo ago u'niyana nagaefe'mo ge osu'niye.

12 Hataki'a uno ani gemo Motekaife'mo ha pai'nigeno afiteno'ae'mo 13 ina ge hutapa Esatafe'mo ha paiyo, kini vekamo nopi'mo mai'nana'monanafa fiku yanageka ae'na kasalo paegauve, huka kagesamo afigane. Muki Yu vayatimo alisaya agufa hanageke ya'mo kagae'e'mo afa'age'mo aligane. 14 Inagi kagaemo ani afina'mo ge osuka maisana'mo'mo mago laha maesiya kava'mo alu kateti'mo lagaetegamo afole aigiye. Afole aigiya'monanafa kagaemo falisanage'apae'mo muki afokamo nofi vaya'a'e'mo alagike'mo fali'a hano hugae. Fali'a hano hugaya'mofe'mo mani agufa hosu afina'mo lagaemo Yu vaya'mo laha maesanafe'mo kuvini a kanomo mai'nisapi huta o'afi'none. 15 Inagi Esata'a ani gemo afiteno'ae'mo, Ina ge hutapa Motekaife'mo ha paiyo, huno hapa pai'niye. 16 He, kanalene. Kagaemo uka Susa taonifi'mo mai'naya Yu vaya'mo apavaleka alika anupa huka apatege'apao lole'e mago'e afina'e hani'ilaga'e'mo ne'ya'e ani'e'mo o'netapa mositapa maiyo. Ani kava huta nagae'e ali'ya'nimo ne'aliya a'ne anaga'e'mo ne'ya'mo o'neta mosigune. Ke'aepa gemo amagi'na atalesuvana kini vekalegamo haiguve. Inagi ani kava'mo hisugeno naipeleti'mo naisige'na falisuvana kanalene afa'a faliguve, huno ha pai'niye. 17 Motekai'a Esata'mo ha pai'niya gemo afiteno'ae'mo kini vekamo yafa lafi kegi'ya kate kipateti'mo ataleno uno Esata'a huvo, huno ha pai'niya kava'mo hu'niye.

Copyright information for `KYG