Esther 7

Esata'a Hemani'mo agoti huno ate'niya gemae

Inagi kini veka'e Hemani'e'mo Esata'e'mo u'ana ne'ya'mo nesayafe'mo u'na'ae. Lole afina'mo utege'anae'mo nofi alagafati ani'mo ne'ne'apae'mo kini vekamo'a Esatafe'mo ina ge huno afi ge'niye. Kuvini Esatao, huno, Na agufa yafe'mo kahau'niye. Kahau'nisiya yafe'mo naha paige'na kamino. Inagi kagaemo kahau'nisiya'mo'mo nagaemo muki ne'yagauva kopati'mo folagapati ali'na fako hu'na magokayaga ko'amo kamiguve, huno ha pai'niye. Esata'mo kuvini a kanomo'mo, kini vekae, huno, amuse huka ne'natesanana kahau'nisigekae'mo nagae'e vaya'ni'e'mo ofalita afa'a maisunafe'mo naha mao, hu'na kafi nekove. Mago vekamo'a nagae'e vaya'ni'e'mo laisigeta falisunafe'mo lagufamo ago maketi hu male'niye. Lagaemo afa vaya'mo mai'neta kalavusi ali'ya'mo afa'a alita maisunafe'mo lagufamo maketi hu male'niyesinana kanalenageno getimo alagi ohane'niyesine. Falisunageno'ae'mo kini vekamo'a ne'yagaiya ko'alegamo muki ya'amo alagepa huno ohaneno ago asagauno aigiye. Kametimo'a kini vekamo anona'alefe'mo afa'a o'amigiye, huno hapa pai'niye.

Kini vekamo Sekisi'a ani gemo afiteno'ae'mo Esatafe'mo, haiya agufa hosu vekamo'mo koli osuno'ae'mo ani agufa himu'namu gemo hu'niye. Ani vekamo haiya'ale'mo mai'niye, huno afi ge'niye. Esata'a ge'ale'mo aeno atagaina huno ha paino'ae'mo, Ani hosu vekamo Hemanifeke'mo nehugeno'ae'mo kametimo agaemo mai'niye, huno ha pai'niye. Hemani'a kini veka'e kuvini a kano'efe'mo koli nehigeno'ae'mo lusi kava huno atete hau'niye. Kini vekamo'a Esata'mo hu'niya gemo afiteno'ae'mo lusi kava huno aipamo le'nigeno ne'ya'mo o'neno ataleno he tino kumatega lamino no'ale'mo hane'niya hoyafi'mo lami'niye. Hemani'mo, kini vekamo'a ago namagigiye, huno agesamo afiteno'ae'mo Esatafe'mo afi gesigeno kini vekamo'mo o'amagino ha maesiyafe'mo nopi'mo mai'niye. Inagi kini vekamo kumatega hoyafi'mo maigeno ataleno nopi'mo haineno ageyana Hemani'a Esata'mo havae'niya hipale'mo ago'ya faino havaeno mai'nigeno ageteno'ae'mo, hae, huno, ani vekamo'mo nagai'ni naulagale'mo kuvini ategamo hosu kava'mo hisiyafe'mo nehifiye, huno hutege'apae'mo u'a Hemani augosafi'mo lavolavoleti'mo ai'a ati kae'a ate'nae. Mago vekamo kini vekamo ali'ya'amo ne'aliya vekamo agi'amo Ha'mona'a huno'ae'mo, Hemani'a agai'a no'ale'mo lusi yatala posi yosamo faino ate'niya yosale'mo Motekai'mo ane'mu aeno asaisiyafe'mo faino ate'niya'monanafa kini vekae, hu'na, Motekai'a kaha mae'niya vekamo mai'niye. Kini vekamo'mo, lapakaemo Hemani'mo avalelitutapa agai'amo ani posi yosale'mo ane'mu aetapa asaigeno falino, huno hapa pai'niye. 10 Inagi Hemani'a Motekai'mo faligiye, huno alo huno ate'niya yatala posi yosale'mo ane'mu ae'a asai'nae. Ani kava'mo hu'nageno'ae'mo kini vekamo'a aipamo le'niya kava'amo hano hu'niye.

Copyright information for `KYG