Galatians 1

Nagaemo Polo'namo Goti apa veka'amo mai'ne'nae'mo avo'mo nekaove. Ma mopafi vaya'mogi apa ali'yate'mo lekana pai'a o'nate'nageno Goti'a mago vaya'aiteti'mo navaleno o'nate'niye. Yesu Kalaisi'e Afotimo'mo Yesu Kalaisi'a fali'niyateti'mo alino he tino ate'niya Goti'e'mo lekana pai'ana natete'ana apa ali'yate'mo navale'ana nate'na'ae. Nagae'e muki nagae'e'mo magokepi lokae'a mai'naya konagatapimogi'e'mo Galesiya kotega alita anupa hutapa mai'naya siosi'ale siosi'alefe'mo ge nelapamamaone. Goti'a Afotimo'e Ala kava netimo Yesu Kalaisi'e'mo fiku lapa mae'ana lapami'anageno lapaipamo'mo falu hino. Goti'a Afotimo'mo hau'nigeno Kalaisi ge'amo akame huno hemenimo ma mopafi hane'niya hosu kavategati'mo lagufamo alino katino latesiyafe'mo hosu kavatilefe'mo agufamo amiteno fali'niye. Goti agi'ale'mo muki afina'ae afina'ae'mo alita asaga huge huge huta maigetao.

Alagepa faigoko gemo magoke'ageke'mo hane'niya gemae

Aise afina'mo utegetapae'mo Goti'a lapakaefe'mo keya aeno ge huteno Kalaisiteti'mo fiku lapa maeno lapami'niya vekamo ataletapa alu faigoko gemo afisayafe'mo ne'vage'na nahau ai'nove. Alu alagepa faigoko gemo ohane'niya'monanafa mago vaya'mogimo alagepa faigoko gemo ali'a ai'a ataginovano gemo hute'a lapakesamo nefaigetapae'mo lapausoli nehae. Lagaemofi koku'napati'mo eminesiya enisole vekamo'mofi huta alagepa faigoko gemo lapa pai'nona gemo ataleta alu faigoko gemo aeta hakalo huta lapa paisunana Goti'a alino laha faitalenageta alagi lageso hino. Hogoteta ani gemo ago hu'nonanage'na hemenimo halate mago'e hu'na ani agufa gege'mo hu'nae'mo, mago vaya'mogi ago lapa pai'nonagetapa afitetapa ali'naya gemo osu'a alu faigoko gemo lapa pai'nisaya'mo'mo Goti'a alino hapa faitalenage'a alagi lageso hiyo, hu'na nehuve. 10 Nagaemo vaya'mogi amuse hu'a natesayafe'mo naha'ye nehige'na kahauya nehufiye. Ha'ao, Gotike'mo amuse huno natesiyafe'mo naha'ye nehige'na kahauya nehuve. Hogote'na vaya'aife'mo nagesamo afi'nova'monanafa hemenimo amuse hu'a natesayafe'mo naha'ye nehisige'na kahauya nehuvesinana Kalaisi ali'ya'ale'mo o'mauvesine.

Polo'a Goti apa veka'amo hamale'niya kavafe'mo ava gemo hu'niya gemae

11 Konaga'nimogitapae, ma mopafi vaya'mogi alagepa faigoko gemo ae'na hakalo hu'na hapa nepauva gemo aepa vaya'mo o'mai'nae, hu'na lapa nepauva gemo alagepa huta afiyo. 12 Nagaemo mago vekalegati'mo mani gemo o'alige mago vekamo'a alino naya o'malege hu'niyana Yesu Kalaisi'a agai'age'mo alino nave li'nige'na agete'na afi'nove.

13 Lapakaemo ago afi'nayana Yu nofi vaya'mogi nehaya kava hu'na mono hu'nova kavafe'mo nava gemo ago afi'nae. Nagaemo Goti siosi vaya'alegamo lusi kava hu'na naini hu'na apatete'na siosi vaya'mo ali'na hano hu'na apatalesuvafe'mo hu'nove. 14 Nagaemo Yu nofi vaya'mo nehaya kava hu'na mago'e hu'na huli'na ne'u'nae'mo nafalu'nimogimo ago ae'na apakase'na laginago vaya'ai gemo akame nehu'nae'mo lusi kava hu'na nayamukiki hu'na mai'nove.

15 Hu'na mai'nova'monanafa ita'nimo'mo alino o'nate'nigeno'ae'mo hogoteno Goti'a hau'niya afina'mo agai'alefe'mo ago lekana paino nateteno fiku naha maeno nami'niya kavateti'mo nagaefe'mo keya aeno ge hu'niye. 16 Agaemo Mafa'ne'ae'mo ava gemo malaga nofi vaya'aife'mo ae'na hakalo hu'na hapa paisuvafe'mo Goti'a hau'niya afina'mo Mafa'ne'amo naipafi'mo alino nave li'nige'na agete'nae'mo u'na mago vaya'e'mo ge huge afige hu'na o'mai'nove. 17 Nagaemo hogote apa vaya'mo u'na apakesuvafe'mo Yulusalemu taonifi'mo o'u'nova'monanafa Alepiya kotegamo u'na ka'me kote'mo maige'na halate ai'na atagi ne'na Namasakasi taonifi'mo e'na mai'nove. 18 Lole'e mago'e kafugamo utege'na Pita'mo u'na agesuvafe'mo Yulusalemu taonifi'mo u'na lole salemo mai'ne'nae'mo 19 mago alu apa vaya'amo o'apake'nova'monanafa Yemisi'a Ala kava ne'mo agana'amoke'mo age'nove. 20 Goti aulagale'mo mai'ne'nae'mo aigofe gemo nosufa alagi lama gemo hu'na avo'mo nekaove. 21 Henaga'amo Siliya kotega'e Silisiya kotega'e'mo u'na mai'noge'apae'mo 22 Yutiya kotega siosile vaya'mo Kalaisipi'mo mai'naya vaya'mogimo naugosamo o'nage'nae. 23 O'nage'naya'monanafa mago vaya'mogi, ani vekamo'a aini huno lateteno apakesa afi'a fatago hisaya faigoko gemo alino hano huno atalesiyafe'mo hu'niya vekamo'mo hemenimo ani gemo aeno hakalo huno hapa nepaiye, hu'a hapa pai'nage'a afite'apae'mo 24 nagaeteti'mo Goti agi'ale'mo ali'a asaga hu'a ate'nae.

Copyright information for `KYG