Galatians 2

Polo'e mago alu apa vaya'e'mo magoke apaipa apakesamo ali'naya gemae

Inagi fotini'a kafugamo maite'nae'mo halate Yulusalemu taonifi'mo Manamasi'e'mo Taitasi'mo avalelita'a u'no'ae. Goti'a uvo, huno naha paino alino nave li'nige'na agete'nae'mo hai'nove. Hai'na muki vaya'ai apaulagale'mo hapa opai'na ala apaki vaya'aifeke'mo alagepa faigoko gemo malaga nofi vaya'aife'mo ae'na hakalo hu'na hapa nepauva gemo ali'a fako hu'a afisayafe'mo hapa pai'nove. Fiku yanageno ali'ya'mo ali'nova kava'nimo'mofi ali'ya'mo alisuva kava'nimo'mofi huno ne'ya'amo afole o'aigiye, hu'na nagesa afi'nove. Taitasi'a navagi hu'niya vekamo Galiki nofi vekamo mai'niya'monanafa, Yu vaya'mogita mono nehuna kava hutapa agufamo lagautapa ataleyo, hu'a laha opai'naya'monanafa mago vaya'mo aigofe konagatimogimo agufamo lagau'a atalesayafe'mo hapau'niye. Ani vaya'mogi kesi kateti'mo lamata huli'a e'a alita anupa huta mai'nona vayapi'mo e'a fale'a mai'nae. Kalaisi Yesu'a hatu maeno late'nigeta agaepi'mo afa vaya'mo mai'nonage'apae'mo kalavusi hu'a latete'a ke'aepa gemo afe'alumelagamo ali'a latesayafe'mo e'a lamata hu'a mai'naya'monanafa Lama ge alagepa faigoko gemo lapakaetegamo afa'a hanege hanege huno hanesiyafe'mo lagaemo hu'naya ge'apilefe'mo he huta osuta ge'apimo alagi o'afi'none. Mago vaya'mogi ala apaki'apimo ali'naya'monanafa afa'a ina agufa yane, hu'na ani apaki'apie'mo nagesamo no'afuve. Goti'a ali'naya apaki'apilefenagi apakufalefenagi huno agesa no'afiye. Ani ala apaki vaya'mogimo mago'e gemo ali'a naya o'male'naya'monanafa apakaemo ago age'nayana Goti'a Pita'mo Yu vaya'aife'mo alagepa faigoko ge'amo aeno hakalo huno hapa paisiyafe'mo lekana paino ate'niya kava huno Polo'a malaga nofi vaya'aife'mo alagepa faigoko ge'amo aeno hakalo huno hapa paisiyafe'mo lekana paino ate'niye, hu'a ago nage'nae. Goti'a himamu'aleti'mo Pita'mo lokiya vaino ate'nigeno Yu nofi vaya'aitegamo ne'viya kava huno Goti'a himamu'aleti'mo lokiya vaino nate'nige'na malaga nofi vaya'aitegamo ne'uve. Ala apaki ne'apamiya vaya'mo Yemisi'agi Pita'agi Yoni'agi hu'a nage'nayana Goti'a Polo'mo fiku ha maeno amiteno mani aote ali'yate'mo avaleno ate'niye, hu'a nagete'apae'mo nagae'e Manamasi'e'mo ali'a afalu afalu kava'mo hu'a apaya'mo la'ami'nae. La'amite'apae'mo, he kanalenagi utana malaga nofi vaya'aitegamo ali'ya'mo ali'agetao lagaemo Yu nofi vaya'aitegamo uta ali'ya'mo aligune, hu'a la'aha pai'nae. 10 Ani kavatefe'mo mago alu gemo osu'nafa magoke gemo hu'apae'mo, lagaepati'mo kagemi ya'apimo o'male'nisaya vaya'aife'mo lanake okanitana hapa mae'ao, hu'a la'aha pai'nae. Ani kava'mo hisuvafe'mo lusi kava hu'na nayamukiki nehuve.

Polo'a Pita'mo alino api aino ate'niya gemae

11 Inagi Pita'a Atiyoki taonifi'mo eno hosu kava'mo hu'niya'mofe'mo agaefe'mo aulagafi'mo ge hau'nove. 12 Hogoteno malaga nofi vaya'e'mo magokepi lokaeno ne'ya'mo ne'nige'apae'mo mago vaya'mo Yemisitegati'mo e'a ava'yi hu'nageno'ae'mo ani apakufamo lagau'a ne'atalaya vaya'aife'mo koli hu'neno malaga nofi vaya'mo apataleno uno aote mai'niye. 13 Yu konagatimogi ani hosu kava'mo amega apakufamo'mo hau'niya kava'mo hu'a vaya'aife'mo koli hu'naya'mofe'mo Pita'e'mo hosu kava'mo hu'niye. Manamasi'e'mo ayate ali'nageno apakame hu'niye. 14 Nagaemo agovana lama ge mono kava'mo alagepa faigoko gemo akame hu'a alagepa kate'mo o'u'nage'na apakete'nae'mo muki vaya'ai apaulagale'mo Pitafe'mo, Kagaemo Yu nofi vekamo mai'nana'monanafa Yu nofi vaya'ai kava'mo osuka malaga nofi vaya'ai kavake'mo nehane. Na kava higekae'mo malaga nofi vaya'mogimo Yu nofi vaya'mogi nehaya agufa kava'mo hisayafe'mo alika he tika apatesanafe'mo nehane, hu'na ge hau'nove.

15 Yu vaya'mogi malaga nofi vaya'aife'mo, hosu vaya'mo mono nosaya vaya'mo mai'nae, hu'a nehaya'monanafa ani nofi vayapi'mo o'mai'nonage'apae'mo Yu nofi vayapati itatimogimo ali'a late'nageta Yu nofi vaya'mo mai'none. 16 Lagaemo afi'nonana Goti'a ke'aepa ge'amo akame nehaya kavateti'mo, naulagale'mo fatago vaya'mo mai'nae, huno hapa nopaiya'monanafa Yesu Kalaisifeke'mo apakesa afi'a fatago nehaya kavatetike'mo, naulagale'mo fatago vaya'mo mai'nae, huno hapa nepaiye, huta ago afi'none. Goti'a ke'aepa ge'amo akame nehuna kavateti'mo, naulagale'mo fatago vaya'mo mai'nae, huno laha opaigiya'monanafa Kalaisifeke'mo lagesa afita fatago nehuna kavatetike'mo, naulagale'mo fatago vaya'mo mai'nae, huno laha paisiyafe'mo lagae'e'mo Kalaisifeke'mo lagesa afita fatago hu'none. Goti'a muki vaya'aife'mo, ke'aepa ge'nimo akame hisaya kavateti'mo naulagale'mo fatago vaya'mo mai'nae, huno nosiya'mofe'mae. 17 Goti'a Kalaisipi'mo mai'nonageno'ae'mo, naulagale'mo fatago vaya'mo mai'nae, huno laha paisiyafe'mo ke'aepa gemo'a laha o'maegaiye, huta huteta atalesunage'apae'mo, hosu vaya'mo mai'nae, hu'a hugaya'monanafa Kalaisi'a hosu kava'mo hisuna ka'mo valino late'nifiye. Ani agufa gemo osutapa alagi atalegeno hano hino. 18 Lagaemo heta halagape vaita atale'nona ya'mo halate alita he tita atesuna'mo'mo hosu kavake'mo hugune. 19 Goti ke'aepa ge'amo'mo alagi kamiti namagi'nige'na fali'nove. Goti'a hau'niya kava'mo hisuvafe'mo ke'aepa ge'alefe'mo ago fali'nove. 20 Inagi Kalaisi'a malipu yosale'mo fali'nige'nae'mo agae'e'mo fali'nova'mofe'mo hemenimo afa'a o'mai'nova'monanafa Kalaisi'a nagaepi'mo mai'niye. Hemenimo ma mopafi'mo mai'ne'nae'mo Goti Mafa'ne'ae'mo nagesa afi'na fatago nehuva kavatetike'mo afa'a mai'nove. Agaemo nagaefe'mo hau ayamopafi'mo hau'nigeno falino nate'niye. 21 Goti'a ke'aepa ge'amo akame nehaya kavateti'mo, naulagale'mo fatago vaya'mo mai'nae, huno hapa nepaiyesinana Kalaisi'a afa'a fiku fali'niyesine. Goti'a fiku naha maeno nami'niya yafe'mo, afa'a ina agufa yane, hu'na nakame'ya o'ami'nove.

Copyright information for `KYG