Galatians 3

Ke'aepa gemo akame nehaya kava'e apakesa afi'a fatago nehaya kava'efe'mo hu'niya gemae

Galesiya vaya'mogitapae, alagi lusi kava hutapa negi ne'malae. Ina la'mo negi nofi'mo aeno lapami'nigetapae'mo lama gemo akame nosae. Lagaemo Yesu Kalaisi'a malipu yosale'mo fali'niya kavafe'mo ava gemo lapaulagafati'mo age'negekana hutapa afisayafe'mo lapakae folagapi'mo mai'neta aeta hakalo huta ago lapa pai'none. Magoke kavafe'mo ge hu'na lapafi gesuvafe'mo huve. Lapakaemo ke'aepa gemo akame hu'naya kavateti'mo Goti Auneme'amo ali'nafi Kalaisife'mo ava gemo afitetapa lapakesa afita fatago hu'naya kavateti'mo ali'nae. Lapakaemo Goti Auneme'aleti'mo aepa fai'naya'monanafa lagaitimo haita hapaigune, hutapa negi ne'malafiye. Kanamo ali'nageno Goti'a alagepa huno lapa mae'niya kava'mo afa kava'mo hane'ninageno alagamo o'ae'nisifiye. Nagesa afuvana alagamo ago ae'negaiye. Lapakaemo Goti ke'aepa ge'amo akame nehaya'mofe'mo Goti'a agai'a Auneme'amo alino lapamige lapaipafi'e lapaopale'e'mo aune kava'mo huge nehifi Kalaisife'mo ava gemo afitetapa lapakesa afita fatago nehaya kavateti'mo aune kava'mo nehiye. Emalehamu'a ani kava huno agesa afino fatago hu'niye. Goti Mukufi avo'mo kae male'niya gemo'a huno'ae'mo,Emalehamu'a Goti ge'ae'mo agesa afino fatago hu'nigeno'ae'mo, naulagale'mo fatago vekamo mai'nane, huno ha pai'niye. Huno ha pai'niya'mofe'mo apakesa afi'a fatago nehaya vaya'age'mo Emalehamu aginago vaya'amo mai'nae, hutapa lapakesamo afiyo. Goti'a hogoteno apake'niyana malaga nofi vaya'mogimo apakesa afi'a fatago hisage'na apakete'nae'mo, naulagale'mo fatago vaya'mo mai'nae, hu'na hapa paiguve, huno apake'niye. Apaketeno hogoteno alagepa faigoko ge'amo Emalehamufe'mo polomasi gemo huno ha paino'ae'mo,nagaemo kagaeteti'mo muki nofi vaya'mo fiku hapa mae'na apamisuge'a alagepa hu'a maigae, huno ha pai'niye. Ha pai'niya'mofe'mo Goti'a agesa afino fatago hu'niya vekamo Emalehamu'e apakesa afi'a fatago nehaya vaya'e'mo magokepi fiku hapa maeno apami'niye.

10 Hapa ne'maeya'monanafa mago vaya'mogimo, Goti ke'aepa ge'amo akame nehuna'mofe'mo laha maegaiye, hu'a apakesamo ne'afiya vaya'aife'mo, hosu vaya'mo mai'nayanage'a alagi lageso hugae, huno nehiye. Ani kavatefe'mo Goti Mukufi'mo avo kae male'niya gemo'a huno'ae'mo,Ina lagimo muki afina'mo muki ke'aepa ge'amo akame hu'a hano nosisafigeno Goti'a, hosu vaya'mo mai'nayanage'a alagi lageso hugae, huno nehiye. 11 Goti Mukufi'mo mago'e huno avo kae male'niya gemo'a huno'ae'mo,Goti'a apakesa afi'a fatago nehaya kavatetike'mo, naulagale'mo fatago vaya'mo mai'nae, huno hapa pai'nisige'a mai'nisaya vaya'age'mo alagepa hu'a maigae, huno hu'niya'mofe'mo ago afi'nonana Goti'a ke'aepa ge'amo akame nehisaya kavateti'mo muki vaya'aife'mo, naulagale'mo fatago vaya'mo mai'nae, huno nosiye. 12 Goti aulagale'mo fatago vaya'mo maisayafe'mo Goti ke'aepa ge'amo akame nehaya kava'mo'a Kalaisife'mo apakesa afi'a fatago nehaya kavatefe'mo ohane'nifa alu kava'mo hane'niye. Ke'aepa gemo akame nehaya kavatefe'mo Goti Mukufi'mo avo kae male'niya gemo'a huno'ae'mo,Goti ke'aepa ge'amo akame nehaya vaya'mo ani kavateti'mo alagepa hu'a maigae, huno hu'niye. 13 Goti ke'aepa ge'amo akame osu'nonageno'ae'mo Goti'a, hosu vaya'mo mai'nayanagetapa alagi lageso hugae, huno hu male'niye. Hu male'niya'monanafa Kalaisi'a emineno lagae laimu'yale'mo mai'nigeno'ae'mo Goti'a, hosu vekamo mai'niyanageno alagi lageso hugiye, huno hu'nigeno'ae'mo Kalaisi'mo Goti'a lamagisiya kayo'mo alino ataleteno lageso osisunafe'mo miya faino hatu maeno late'niye. Goti mukufi'mo avo kae male'niya gemo'a ani kavatefe'mo,Goti'a hosu kava'apilefe'mo yosale'mo asai male'naya vaya'aife'mo, hosu vaya'mo mai'nayanage'a alagi lageso hugae, huno hu'niye. 14 Goti'a Emalehamufe'mo, fiku kaha mae'na kamiguve, huno polomasi gemo huno ha pai'niya ya'mo alu nofi vaya'mogi Kalaisiteti'mo alisayafe'mo hatu maeno late'niye. Goti'a muki vaya'amogitae'mo polomasi gemo huno'ae'mo, Naune'name'mo ali'na lapamiguve, huno hu'niya Auneme'amo lagesa afita fatago hisuna kavatetike'mo alisunafe'mo hu'niye.

Ke'aepa gemo'mo Goti'a ani kava'mo huguve, huno hu'niya polomasi gemo aeno ati okaegaiye, huno hu'niya gemae

15 Konaga'nimogitapae, alagepa hutapa afisayafe'mo ma mopafi kavategamo hu'na ae'na kalafefa gemo hugesuve. Ma mopafi vaya'mogi mago kotalake gemo hu malete'a apaki'apimo avo'mo kae male'nisaya'mo'mo mago vaya'mogi afa'a ae'a kalo opaegae. Mago vaya'mogi afa'a ali'a o'atalege alu gemo ali'a magokepi'mo avo'mo kae'a o'malege hugae. 16 Inagi Goti'a Emalehamufe'mo, fiku kaha maegauve, huno ha pai'niya polomasi gemo aginago vekae'mo, kaha maegauve, huno ha pai'niye. Goti'a Emalehamu aginago vaya'aife'mo ani gemo hapa opai'nifa magoke aginago vekae'mo ani gemo ha pai'niye. Ani magoke aginago vekamo Kalaisi'mae. 17 Goti'a Kalaisitefe'mo kotalake ge'amo ago hu male'nigeno'ae'mo fo hataleti teti'a kafugamo utegeno Goti'a ke'aepa ge'amo alino Yu nofi vaya'mo apami'niye. Ani gemo aepa'ae'mo hu'nae'mo, henaga'amo afole ai'niya ke'aepa gemo'a hogoteno hu male'niya kotalake gemo fiku kaha mae'na kamiguve, huno ha pai'niya polomasi gemo alagi amagino o'atalegaiye. 18 Vaya'mogi Goti ke'aepa ge'amo akame nehaya kavateti'mo Gotitegati'mo aligae, huno hu male'niya ya'mo ali'naesinana Goti'a fiku kaha mae'na kamiguve, huno ha pai'niya polomasi ge'aleti'mo afa'a o'ali'naesina'monanafa Goti'a Emalehamufe'mo, fiku kaha mae'na kamiguve, huno ha pai'niya polomasi geleti'mo fiku ha maeno ami'niye.

19 Goti'a mani ke'aepa ge'amo'mo na agufa ali'ya'mo alisiyafe'mo alino apami'niye. Goti'a ke'aepa ge'aleti'mo alino ka'mo akani male'nisige'a Yu vaya'mogimo hosu kava'mo osisayafe'mo polomasi ge'e'mo alino magokepi lokaeno male'niye. Ke'aepa ge'amo haneme haneme ne'esigeno Emalehamu aginago'amo emi'negaiye, huno agesamo afi'niye. Goti'a ani aginago vekae'mo, fiku kaha mae'na kamiguve, huno polomasi gemo huno ha pai'niye. Goti ke'aepa ge'amo enisole vaya'ai apavayafati'mo Mosese'a folagate vekae'mo ha pai'nageno Yu vaya'aife'mo hapa pai'niye. 20 Magoke vekae'mo fiku kaha mae'na kamiguve, huno ha paisiya'mo'mo folagate vekamo ali'ya'amo ohanegaiya'mofe'mo Goti'a Emalehamufe'mo, fiku kaha maegauve, huno ha pai'niya afina'mo folagate vekamo o'mai'nigeno'ae'mo hu male'niye.

Ke'aepa gemoke'mo hogoteno yagaino late'niya kavafe'mo hu'niya gemae

21 Ke'aepa gemo'a polomasi gee'mo kame huno ne'atefiye. Ani gemo alagi atalegeno hano hino. Ke'aepa gemo'a afa'a maisaya ya'mo alino apami'niyesinana ani ke'aepa gemo akame nehaya kavateti'mo naulagale'mo fatago vaya'mo mai'nae, huno hu'niyesine. 22 Hu'niyesina'monanafa Goti mukufi'mo avo kae male'niya gemo'a huno'ae'mo, hosu kava'mo'a muki ma mopafi vaya'mo kalavusi huno apate'niye. Yesu Kalaisifeke'mo apakesa afi'a fatago nehaya kavateti'mo fiku hapa mae'na apamiguve, huno hu male'niya ya'mo apakesa afi'a fatago nehaya vaya'mo alino apamisiyafe'mo kalavusi huno apate'niye. 23 Hogoteta Kalaisife'mo lagesa afita fatago osu'nonageno'ae'mo ke'aepa gemo'a kalavusi huno lateme lateme ne'egeno'ae'mo Kalaisife'mo alagepa faigoko ge'amo lagesa afita fatago hisuna gemo lagaetegamo afole ai'niye. 24 Afole ai'niya'mofe'mo ke'aepa gemo'a Kalaisitegamo lavalelino uno latesigeta Goti'a lagesa afita fatago hisuna kavateti'mo huno'ae'mo, naulagale'mo fatago vaya'mo mai'nae, huno hisiyafe'mo ke'aepa gemo'a yagaino nelateya vekagana huno hane'niye. 25 Kalaisifeke'mo apakesa afi'a fatago hisaya gemo afole ne'aisigeno'ae'mo yagaino nelateya vekamo'a mago'e huno yagaino olategaiye.

Goti mafa'ne'amo mai'nona gemae

26 Muki vaya'amogitapamo Kalaisi Yesufeke'mo lapakesa afita fatago hu'naya kavateti'mo Goti mafa'ne'amo mai'nae. 27 Ani'mo fale'a ne'apataya kava huno Kalaisipi'mo faleno lapate'nigetapa Kalaisi'mo kukena vaigekana hutapa alita vaitetapa mai'nae. 28 Kalaisipi'mo magoke aiyaya vaya'mo mai'naya'mofe'mo mago vaya'mo Yu vaya'mo maige mago vaya'mo alu nofi vaya'mo maige huta mai'none, hutapa osuge kalavusi ali'ya'mo ne'aliya vaya'mo maige afa vaya'mo maige huta mai'none, hutapa osuge ve maige a'ne maige huta mai'none, hutapa osuge nehutapa maiyo. Kalaisi Yesupi'mo mai'netapae'mo magoke aiyaya vaya'mo mai'nae. 29 Lapakaemo Kalaisi vaya'amo mai'nisayana Emalehamu aginago'amo mai'nae. Mafa'ne'apimogimo afo'apimogi muki male'naya ya'apimo ne'aliya kava hutapa Goti'a fiku kaha mae'na kamiguve, huno ha pai'niya polomasi geleti'mo muki ya'amo afa'a aligae.

Copyright information for `KYG