Galatians 4

Ani kavatefe'mo mago'e hu'na ae'na kalafefa gemo hugesuve. Mafa'ne'amo'mo afo'amo muki kagemi ya'amo henaga'amo aligiya'monanafa ko osino aise mafa'nemo mai'neno'ae'mo kalavusi ali'ya ne'aliya vekagana huno mai'niye. Ali'ya'amo ne'aliya vaya'mogi ani mafa'nele'e kagemi ya'ale'e'mo yagai'a ateme ateme ne'esageno'ae'mo afo'amo'mo hu male'niya afina'mo afole aigiye. Ani kava huta aise mafa'negana huta mai'netae'mo ma mopafi ke'aepa gemo afe'alumelagamo kalavusifi'mo mai'nona'monanafa Goti'a hu male'niya afina'mo afole ai'nigeno'ae'mo Mafa'ne'amo alino ate'nigeno emine'niye. Mago ma mopafi a kanomo'mo alino ate'nigeno Yu ke'aepa gemo afe'alumelagamo mai'niye. Agaemo ke'aepa gemo afe'alumelagamo mai'nona vaya'mo miya faino hatu maeno latesigeta Goti'a alopa mafa'ne'amo maisunafe'mo Yu ke'aepa gemo afe'alumelagamo mai'niye. Lapakaemo mafa'ne'amo mai'naya'mofe'mo Goti'a Mafa'ne'amo Auneme'amo alino ate'nigeno emineno lapaipafi'mo faleno haino mai'nigetapae'mo, Afo, Afotimogae, hutapa ge nehae. Inagi kalavusi ali'ya ne'aliya vaya'mo mago'e hutapa o'mai'nafa Kalaisiteti'mo Goti mafa'ne'amo mai'netapa muki ya'mo afo'amo ya'mo alisayafe'mo mafa'ne'amo mai'nae.

Polo'a Galesiya vaya'aife'mo lusi kava huno agesamo afi'niya gemae

Hogotetapa Goti'mo o'agetapa afa'a mai'netapae'mo hosu apaune vaya'mo aigofe gotitapimogi ke'aepa ge'apimo afe'alumelagamo mai'netapa kalavusi ali'ya'apimo alita mai'naya'monanafa hemenimo Goti'mo ago age'nae, hu'na huguva'monanafa Goti'a lapake'niye, hu'na hisuva gemo hane'niye. Lapake'niya'mofe'mo na kava higetapa Goti'a ataletapa aita atagi netapa ke'aepa gemo'a afa'a lapa o'maeno lokiya vaino olapatesiya gemo afe'alumelagamo maisayafe'mo lapau'niye. Halate kalavusi ali'ya ne'aliya vaya'mo maisayafe'mo nehafiye. 10 Lapakaemo sapati afina'mo akame huge saufa kai le kava'mo huge kafugamo hopa afina kava'mo huge hutetapae'mo aeto aeto hopa afinafe'mo lusi kava hutapa lapakesamo ne'afiye. 11 Lapakaefe'mo nagesamo afite'na koli nehu'nae'mo, apakaetegamo afa ali'yapafi ali'nofiye, hu'na nehuve. 12 Konaga'nimogitapae, hu'na, nagaemo hogote'na Yu vaya'ai ke'aepa gemo afe'alumelagamo maige'na atale'na e'na alu nofi vekamo lapakaekana hu'na mai'nove. Lapao ke hovanagi ani kava hutapa nagaekana hutapa ke'aepa gemo afe'alumelagamo o'maiyo. Nagaetegamo mago hosu kava'mo osu'nae. 13 Hogote'na lapakae'e'mo mai'nova afina'mo kaita nahau'nige'nae'mo visuva himamu'nimo ohane'niya'mofe'mo alagepa faigoko gemo ae'na hakalo hu'na lapa pai'nove. 14 Kanamo ali'nogetapae'mo, hosu vekamo mai'niye, hutapa lapakame'ya o'nami'nae. Mago enisole vekamofi Kalaisi Yesu'mofi huno esigetapae'mo lusi kava hutapa alita falu fala hutapa atesaya agufa kava'mo hutapa alita falu fala hutapa nate'nae. 15 Nagaemo lapakae'e'mo mai'nogetapae'mo lapamogaga ai'nae. Na agufa kava'mo afole ai'nigetapae'mo lapamogaga no'aiye. Lapa maesiya agufa gemo hu'nae'mo, apakaemo afa'a hu'naesinana apaulagamo ali'a kati'a nami'naesine, hu'na hapa nepauve. 16 Lama gemo lapa nepauva'mofe'mo kametapige'mo hamalete'na mai'nofiye. 17 Mago vaya'mogi lapakae lapao vaya'mo maisayafe'mo lapakaetegamo apayamukiki nehaya'monanafa lapakesamo faisayafe'mo nehae. Lapakaemo nataletapa lapayamukiki hutapa uta apakame hisayafe'mo apayamukiki nehae. 18 Vaya'mogi alagepa kava'mo hisayafe'mo apayamukiki hu'a ali'a apao ya'mo nehisayana kanalene. Hogotetapa nagaemo lapao vekamo maisuvafe'mo lusi kava hutapa nagaetegamo lapayamukiki hu'naya'monanafa hemenimo lapakae'e'mo o'mai'nova'mofe'mo o'ataletapa ani kavake'mo hutapa maiyo. 19 Nahau'niya mafa'ne'nimogitapae, hu'na, a'nemogimo mafa'nemo ali'a atesayafe'mo nehageno apakafu nekiya kava hu'na lapakaemo Goti mafa'nemo hamalesayafe'mo nagafu ki'niyanage'na Kalaisikana hutapa maisayafe'mo halate mago'e huno nagafu nekiye. 20 Vaehae, hu'na, na agufa gemo lapa paigufi hu'na alagepa hu'na nagesamo afisuvafe'mo lapakae'e'mo u'na maisuvafe'mo nahau'niye.

Sela'e Hega'efe'mo anava gemo hu'niya gemae

21 Ke'aepa gemo afe'alumelagamo maigune, hutapa nehaya vaya'mogitapamo Mosese'a avo kae male'niya ke'aepa gemo aepa'amo o'afi'nafiye. 22 Ani gemo'a huno'ae'mo, Emalehamu'a lole mafa'nela'mo alino anate'niye. Henaga a'amo'mo kalavusi ali'ya ne'aliya a kanomo agi'amo Hega'a mafa'nemo alino atetegeno hogote a'amo afa a'mo agi'amo Sela'a mafa'nemo alino ate'niye. 23 Kalavusi ali'ya ne'aliya a'mo'a ma mopafi vaya'mogita alita ne'apatona kava huno mafa'nemo alino ate'niya'monanafa afa a'amo'mo Goti'a fiku kaha mae'na kamiguve, huno ha pai'niya polomasi geleti'mo mafa'ne'amo alino ate'niye. 24 Mani gemo kalafefa gemo hane'niye. Lole atala'anife'mo osu'nifa lole kotalake gelafe'mo hu'niye. Goti'a mago kotalake gemo ke'aepa ge'amo Mosese'mo Sainaigayaga avele'mo ami'niye. Hega'a kalavusi ali'ya'mo ne'aliya mafa'nemo alino ate'niya kava huno mani kotalake gemo'a kalavusi ali'ya'mo ne'aliya mafa'nemo alino ne'apate. 25 Hega'a Sainaigayaga avemo Alepiya kotega avemo aune'amo mai'niye. Sainai avemo hane'niya kava huno hemenimo hane'niya Yulusalemumo aune'amo hane'niye. Yulusalemu'e Yulusalemu mafa'ne'amogi'e'mo kalavusi ali'ya ne'aliya'monanafa 26 koku'napi Yulusalemu taonimo'a afa akana huno hane'neno muki vaya'amogita itatimokana huno hane'niye. 27 Mani kavatefe'mo Goti mukufi'mo avo'mo kae male'niya gemo'a huno'ae'mo,Anamo a kanomo mafa'nemo alika o'ate'nana a kanomogamo kamogaga aiyo. Mafa'nemo alika o'ate'nanageno kagafu oki'niya a kanomogamo kamogaga aiteka alopa gefati'mo ge huvo. Na kava higekaene. Anau'amo'mo atale'niya akana huka mai'nana'monanafa vele'mo mai'niya a kanomo ago aeka agaseka asole mafa'nemo alika apate'nane, huno hu'niye. 28 Inagi konaga'nimogitapae, hu'na, Aisiki'a fiku kaha mae'na kamiguve, huno ha pai'niya polomasi ge'aleti mafa'nemo mai'niya kava huta polomasi ge'aleti mafa'ne'amo mai'none. 29 Agufaleti'mo alino ate'niya mafa'nemo'a Auneme'aleti'mo alino ate'niya mafa'ne'ae'mo aini huno ate'niya kava hu'a hemenimo apaini hu'a nelatae. 30 Nelataya'monanafa Goti mukufi'mo avo'mo kae male'niya gemo'mo, na yane, huno hu'niye. Mani gemo'a huno'ae'mo, kagaemo kalavusi ali'ya ne'aliya a kano'e mafa'ne'a'e'mo alika hana faika anatalege'ana vi'ao. Kalavusi ali'ya ne'aliya a kanomo mafa'nemo'e afa'a mai'niya a kanomo mafa'nemo'e'mo afo'animo ya'mo magokepi o'aliga'ae, huno hu'niye. 31 Inagi konaga'nimogitapae, lagaemo kalavusi ali'ya ne'aliya a kanomo mafa'ne'amo o'mai'nopa afa'a mai'niya a kanomo mafa'ne'amo mai'none.

Copyright information for `KYG