Galatians 6

Konaga'nimogitapae, hu'na, mago hosu kava'mo'a malage huno mago konagatapimo'mo atafau'nisigeno hosu kava'mo hu'nisigetapae'mo lapakaepati'mo Goti Auneme'amo alagepa hu'a akame nehisaya vaya'mogimo yagu yaga gemo hu'a ali'a alagepa hu'a ateyo. Lapakae'e'mo lapamalageka hisagetapae'mo hosu kava'mo osisayafe'mo lapakaitapile'mo alagepa hutapa yagai'netapaeke'mo alita api aita ateyo. Konagatapimogimo ne'aliya kana ya'mo alita hapa maeyo. Alita hapa maesaya'mo'mo Kalaisi ke'aepa ge'amo akame hugae. Mago vekamo'a, ala nagi vekamo mai'nove, huno agesamo ne'afisiyana ina agufa vekamo mai'niya'mofe'mo agai'aeke'mo humi ne'ate. Ne'ateya'mofe'mo muki'amogi apamete apamete hu'a apakai'api kava'apimo ali'a fako hu'a agegeyo. Mago vekamo'a alagepa kava'mo nehisiyana agaemo alu vekae'mo, ago ae'na agase'nove, huno agesamo o'afino agai'a kavafeke'mo amogaga aigiye. Muki vaya'mogimo apamete apamete hu'a apakai'api ali'ya'apimo aligaya'mofe'mae. Goti ge'amo ne'afiya vaya'mogimo hu'a ali'a apaya ne'malaya tisa vaya'apimo afalu afalu kava'mo hu'a alagepa ya'apimo ali'a fako hu'a apamigae.

Lapakaitapie'mo humi olapateyo. Lapakaemo Gotife'mo afa'a hutapa ami o'malegae. Ha'ao, na agufa avina ya'mo hakale'nisafigeno hagesigetapae'mo ani agufa ne'ya'mo aligae. Vaya'mogimo atafa apaipamo'mo nehaiya kava'mo nehisayana hosu ne'ya'mo afole aisige'a alite'a faligae. Vaya'mogimo Goti Auneme'amo'mo nehaiya kava'mo nehisayana alagepa ne'ya'mo afole aisige'a alite'a maige maige hu'a maigae. Alagepa kava'mo nehutae'mo alagi alaga'mo olahaegetao o'atalesunana hoyatifati'mo afu lesiya afina'mo alagepa ne'ya'mo aligune. 10 Hapa maesuna ka'mo hane'nisiya'mo'mo muki vaya'aina afa'a hapa maegauna'monanafa apakesa afi'a fatago nehaya afamo anagatimo mago'e huta hapa maegaune.

Ge atupa gemo hu'niya gemae

11 Hemenimo nagaemo avo kayo'mo ali'na nagai'nimo alopa avo'mo nekaovanagetapa agetetapae'mo, Polo'mo mani avo'mo kae'niye, hutapa hugae. 12 Amega apakufale kavafe'mo amuse hu'a apatesage'a ala apaki'apimo alisayafe'mo hapau'niya vaya'mogimo lokiya gefati'mo, lapakufamo lagaiyo, hu'a nehae. Kalaisi'a malipu yosale'mo fali'niya kavafe'mo ava gee'mo apaini hu'a o'apatesayafe'mo lapakufamo lagaiyo, hu'a nehae. 13 Apakufamo nelagaya vaya'mogimo apakai'apimo ke'aepa gemo akame nosaya'monanafa lagaemo lakame nehae, hu'a ala apaki'apimo alisayafe'mo hapau'nige'apae'mo, lapakufamo lagaiyo, hu'a nehae. 14 Nehaya'monanafa nagaemo mago kavatefe'mo nagi'nile'mo ali'na asaga hu'na natete'na namogaga aisufiye. Ha'ao, alagi atalegeno hano hino. Nagaemo Ala kava netimo Yesu Kalaisi'a malipu yosale'mo fali'niya kava'aeke'mo naipafati'mo namogaga ai'ninage'na hapa paisuva ge'age'mo hane'niye. Goti'a malipu yosale'mo fali'niya kavateti'mo atafa naipamo ago amagino atale'nige'na ma mopafi ya'e amega apakufale kava'efe'mo, ina agufa kava'mo malipu yosale'mo faligekana huno hane'niye, hu'na nagesamo ne'afuge'apae'mo ma mopafi vaya'mogimo nagaefe'mo, ina agufa vekamo malipu yosale'mo nili aite'a ali'a he ti'a ate'naya agufa vekagana huno mai'niye, hu'a nehae. 15 Mani kavatefe'mo hu'nae'mo, Kalaisi Yesupi'mo mai'nona'mofe'mo lagufamo lagau'nisupi olagau'nisupi ina agufa kava'mo hane'niye. Goti'a saufa vaya'mo alo huno late'niya kavake'mo kanale kava'mo hane'niye. 16 Goti'a mani avo'mo nekaova gemo akame nehisaya vaya'mo agai'a vaya'mo muki lama ge Isaleli vaya'aife'mo hau huno apatenageno apaipamo'mo falu hino. 17 Ge atupa ge'nimo hu'nae'mo, vaya'mogimo Ala kava ne'mo Yesutefe'mo namagi'nageno nagufale'mo nafugu'mo hane'niyanagi mago vekamo'a mago'e huno hanageke ya'mo alino o'namino. 18 Konaga'nimogitapae, hu'na, Ala kava netimo Yesu Kalaisi'a fiku lapa maeno lapamino. He, lama ge.

Copyright information for `KYG