Hebrews 1

Goti'a Mafa'ne'aleti'mo laha pai'niya gee'mo ava gemo hu'niya gemae

Akeya'vilaga Goti'a agai'alegati gemo alini e'a ae'a hakalo hu'a hapa nepaiya vaya'ai apavayaleti'mo laginago vaya'aife'mo hapa pai'niye. Alu afina'ae alu afina'ae'mo aise gemo hapa paite hapa paite huge alu kavateti'e alu kavateti'e'mo hapa paige huno hapa pai'niye. Hemenimo henaga afina'mo Mafa'ne'aleti'mo laha pai'niye. Mafa'ne'apimogimo afo'apimogi muki ya'apimo ne'aliya kava huno Mafa'ne'amo'mo muki ya'amo alisiyafe'mo ago lekana paino ate'niye. Goti'a agaetetike'mo muki ya'mo alo hu'niye. Agaemo Goti'a ha le konali ya'amo aeno ha legekana huno ne'maiye. Agaemo Goti lama ge aune'amo mai'niye. Ayamufa'age ge'aleti'mo muki ya'mo afa'a hanesiyafe'mo yagaino ne'ateno'ae'mo agai'amo hosu kavatimo aeno kalo paeno ataleteno'ae'mo haino koku'napi Goti'a anaga hogote vekamo yagaino ne'apateya vekamo lamaga haopale'mo fai mai'niye.

Goti Mafa'ne'amo'mo enisole vaya'aina ago aeno apakase'niya gemae

Ani kava huno enisole vaya'mo ago aeno apakaseno ala agi'amo Goti'a alino ami'niya agi'amo'mo apaki'apimo ago aeno agase'niya kava huno aeno apakaseno mai'niye. Goti'a agaefe'mo,

Mafa'ne'nimo mai'nane. Hemenimo ago ali'na kate'nove,
huno huteno mago'e gemo huno'ae'mo,

Afo'amo'namo mai'novanage'na agaetegamo ani kava'mo hisugeno Mafa'ne'nimo mai'niyanageno nagaetegamo ani kava'mo hugiye,
huno ha pai'niya'monanafa mago enisole vaya'aife'mo ani agufa gemo huno hapa opai'niye.
Hapa opai'niya'monanafa yege Mafa'ne'amo ma mopafi'mo alino atesigeno eminesiyafe'mo mani gemo huno'ae'mo,

Muki enisole vaya'mogitapamo agi'ale'mo alita asaga nehutapa agaefeke'mo mono hiyo,
huno hapa pai'niye.
Enisole vaya'aife'mo apava gemo huno'ae'mo, Enisole vaya'mo yasigana huno alo huno apate'niye. Ali'ya'amo ne'aliya enisole vaya'mo ata vaikana huno alo huno apate'niye, huno hu'niye. Huno hu'niya'monanafa Mafa'ne'ae'mo,

O Gotiyo, muki afina'mo alagi ofalika afa'a maige maige huka mai'neka yagaika apategane. Alagepa huka alika fako huka apateteka yagaika ne'apatane.
Kagaemo alagepa kavafeke'mo kahau'nigekae'mo gemo amagi'a ne'atalaya kavafe'mo alagi okahau'nigeno Gotikamo'mo uvelimo faleno kate'nigekae'mo lusi kava huka kamogaga aiteka kafalukamogimo ago aeka apakaseka mai'nane,
huno hu'niye.
10 Mago'e gemo huno'ae'mo,

Ala kava neyo, aepa fai'niya afina'mo ma mopamo alo hu'nane. Kayateti'mo koku'na'mo alo hu'nane.
11 Ma mopa'e koku'na'e'mo alagi hano hugiya'monanafa kagaemo afa'a maigane. Ma mopa'e koku'na'e'mo kukenagana huno atafa hegaiye. 12 Vaya'mogimo kukenamo asagi'a lo ae'a male'ne'a saufa kukenamo ali'a ne'vaiya kava huka ma mopa'e koku'na'e'mo alika ataleteka saufa koku'na'e mopa'e'mo malegane. Malegana'monanafa kagaemo mago alu kava huka o'maige ofalige huteka maige maige huka alagi maigane,
huno hu male'niye.
13 Goti'a agaefe'mo,

lamaga nahaopale'mo faika maime maime ne'uge'nao kame vayakamo ali'na kaiya afe'alumelaga apategauve,
huno ha pai'niya'monanafa mago enisole vaya'aife'mo ani agufa gemo hapa opai'niye.
14 Enisole vaya'mo apaune'apame'e vaya'mo mai'ne'a Goti ali'ya'amo ne'aliya vaya'mo mai'nae. Goti'a fiku hapa maeno apakufamo alino katino apatesiya vaya'mo hapa maesayafe'mo alino apatege'a ne'vae.

Copyright information for `KYG