Hebrews 2

Goti'a lusi kava huno laha mae'niya kavafe'mo ava gemo hu'niya gemae

Ani kava huno ne'maiya'mofe'mo ani'mo'a alinino ne'viya kava huno fiku yanageno lavalelino visigeta agaetegati'mo ago afi'nona gemo ataleta ugunanagi mago'e huta afita alagepa huta afigetao. Goti'a enisole vaya'ai apavayafati'mo laginago vaya'aife'mo hapa pai'niye. Ani gemo asagauno o'aino lokiya vaino hane'nige'apae'mo muki vaya'mogi akame osu'a ago amagi'a atale'naya vaya'ai anona'apilefe'mo alino alagepa huno fako huno apateteno kayo'mo apami'niye. Apami'niya'mofe'mo Ala kava ne'mo Goti'a lusi kava huno vaya'ai apakufamo alino katino ne'apateya kavafe'mo ava gemo ago hapa pai'nige'a afi'naya vaya'mogimo, lama gemo hane'niye, hu'a laha pai'naya gemo o'afita afa'a maisunana haiya kava huta aeta kasalo paegaune. Goti'a alagena kava'aletinagi no'agaya himamu kava'aletinagi age'apa hapau ne'aiya kava'aleti'mogi huno ha maeno faigoko gemo huno ani gemo alino lokiya vaino ate'niye. Goti'a agesamo afiteno hau'nigeno'ae'mo Auneme'amo'mo himamu'amo apamete apamete huno alino apami'niye.

Yesu'a laha maesiyafe'mo ma mopafi vekamo hamale'niya kavafe'mo ava gemo hu'niya gemae

Nagaemo henaga'amo afole aisiya saufa kavafe'mo ava gemo hu'na avo'mo nekaova kavate'mo Goti'a enisole vaya'mogimo yagaisayafe'mo lekana paino o'apate'niye. Lekana paino o'apate'niya'monanafa mago vekamo'mo Goti mukufi'mo avo kae male'niya gemo'mo huno'ae'mo,

Gotiyo, ma mopafi vaya'mo ina agufa vayanagi na kava higeka apakaefe'mo kagesamo ne'afine. Vemo Mafa'nemo na agufa vekamo mai'nigeka ha maeka yagaika ne'atane.
Kagaemo aise afina'mo enisole vaya'ai apaiyafi'mo maisiyafe'mo alika ate'nane. Ha le konali ya'a'e ala agi'a'e'mo alika amiteka alo hu'nana yate'mo yagaisiyafe'mo alika ate'nane. Muki ya'e vaya'e'mo alika aiyafi'mo ate'nane,
huno hu'niye. Goti'a muki yate'mo yagaisiyafe'mo alino ate'niya'mofe'mo o'yagai'niya ya'mo magoke'atomo ohane'niya'monanafa muki ya'amo alino aiyafi'mo ate'niye. Ate'niya'monanafa ma mopafi vaya'mogimo hemenimo muki yate'mo ne'yagaigeta o'apake'nona'monanafa
Goti'a Yesu'mo ha le konali ya'a'e ala agi'a'e'mo alino ami'niya vekamo ago age'none. Goti'a, fiku hapa mae'na apamiguve, huno huteno Yesu'mo muki vaya'aitefe'mo falisiyafe'mo aise afina'mo alino enisole vaya'ai apaiyafi'mo ate'niye.

10 Goti'a muki yate'e vaya'aite'e'mo aepa vekamo mai'nigeno agaetefe'mo hanege maige nehaya aepa vekamo'mo asole mafa'ne'amogimo ha le konali ya'amo alisayafe'mo Goti'a agai'a agi'aleti'mo fatago kava'amo huno'ae'mo, Yesu'a afa'a agafu kigiye, huno hu'niye. Goti'a apakufamo alino katino apatesiya vekamo maisiyafe'mo agafu ki'niya kavateti'mo alino alagepa huno ate'niye. 11 Yesu'a apavaleno apaote apate'niya vekamo'e apavaleno alino apaote apate'niya vaya'a'e'mo magoke agufa ya'mo ali'naya'mofe'mo nagana'nimogitapae, huno hapa paisiyafe'mo avagage nosiye. 12 Agaemo huno'ae'mo,

Nagaemo nagana'nimogife'mo ala kagikae'mo kava gemo hu'na ae'na hakalo hu'na hapa paiguve. Ali'a anupa hu'a mai'nisaya siosi vaya'ai folaga'apifati'mo yokemo nehu'na kagikale'mo ali'na asaga hu'na kategauve,
huno huteno
13 mago'e gemo huno'ae'mo,

Naha maegaiye, hu'na agaefeke'mo nagesamo afiguve,
huno huteno halate mago'e gemo huno'ae'mo,

Goti'a mafa'ne'amo apavalelineno nami'nige'na manile'mo apakae'e'mo magokepi lokaeta mai'none,
huno hu'niye.
14 Mafa'nemogi apakufa'e kola'e'mo ne'aliya kava huno falisiyafe'mo agufa'e kola'a'e'mo ali'niye. 15 Ali'neno'ae'mo nefaliya kava'mo aepa vekamo Nevo'mo aeno agaseno himamu'amo alino atalesiyafe'mo fali'niye. Falisaya kavafe'mo koli nehu'a kanamo ne'aliya vaya'aina hatu maeno apatesiyafe'mo fali'niye. 16 Agaemo ani kavateti'mo enisole vaya'mo hapa no'maeya'monanafa Emalehamu aginago vaya'age'mo hapa ne'mae. 17 Hogote mono vekamo Gotitefe'mo mono ali'ya'mo ne'alino mono huno ne'apateya vekamo'a hau huno ne'apateno ali'ya'amo o'ataleno alagepa ali'ya'mo alisiyafe'mo agana'amogigana huno alino hamaleno ate'niye. Hosu kava'apimo alino atalesigeno Goti'a aipamo leno o'apatesiyafe'mo muki kavatefe'mo magoke aiyaya vekamo alino hamale'niye. 18 Amalageka hu'nigeno agafu ki'niya'mofe'mo apamalageka nehiya vaya'mo afa'a hapa maegaiye.

Copyright information for `KYG