Hebrews 9

Ma mopafi seli mono nopi'mo mono hu'naya kavafe'mo ava gemo hu'niya gemae

Hogote kotalake gemo Goti'a alino apami'nige'a mono nehaya kavatefe'mo ke'aepa gemo hanege ma mopafi mono no'mo hanege huno hane'niye. Mago seli mono nopi'mo lavolavomo ae'a akani male'nageno lole no'mo hane'niye. Afelaga no'mo agi'amo aote mono none. Ani nopi'mo lamu hanege hi'yalamu'mo hanege huno hane'niye. Hi'yalamute'mo peleti mayamo Goti'mo ne'amiya peleti mayamo hane'niye. Lavolavomo ae'a akani male'naya no'mo agi'amo alagi aote mono no'mo hane'niye. Ani nopi'mo hi'yalamu'mo goli yafateti'mo alo hu'naya hi'yalamu'mo hane'niye. Ani hi'yalamute'mo alagepa atumo ne'aiya ya'mo kae'nae. Mago kesimo agi'amo kotalake kesimo yosaleti'mo alo hu male'ne'a goli yafateti'mo yosale'mo ai'a ati kae male'naya kesimo ani nopi'mo hane'niye. Ani kesifi'mo goli yafa yuvapamo hanege Eloni hayopa kayo'afati'mo ausisi ae'niya hayopa kayo'mo hanege lole yafatalate'mo kotalake gemo avo kae male'niya yafatala'mo hanege huno hane'niye. Yuvapafi'mo mago ne'ya'mo koku'napati'mo emine'niya ne'ya'mo agi'amo manamo hane'niye. Lole enisole vekala'mo ha le vekala'mo anaune'ala'mo kesile'mo he ti'ana mai'na'ae. Goti'a aipamo'mo falu huno apatesiyafe'mo afumo kolateti'mo ai'a fuli fuli nehiya yate'mo hanakumo ali'ana atale'ana yagai'ana mai'na'ae. Hemenimo ani kavafe'mo mago'e huta alagi ava gemo afa'a osugune.

Inagi muki ani yako'mo alo hu'a male'nage'apae'mo mono hu'a ne'apataya vaya'mogi muki afina'mo afelaga nopike'mo hai'a ali'ya'apimo alige alige hu'a mai'nae. Mai'naya'monanafa hogote vekamo mono huno ne'apateya vekamoke'mo ani anaga nopi'mo muki kafuga'ae kafuga'ae'mo magoke afina'mo haitale haitale huno mai'niye. Afa'a ohai'nifa afumo heno kola'amo yuvapafi'mo lakino alinino haino agai'a hosu kavate'e muki vaya'ai hosu kava'apile'efe'mo Goti'mo ami'niye. Goti Auneme'amo'mo ani kava'mo aepa'ae'mo, hogote seli mono no'mo afa'a hane'niya afina'mo anaga nopi'mo alagi aote mono nopi'mo vaya'mo haisaya ka'mo afole yategamo afole o'ai'niye, huno hu'niye. Ani agufa aune kava'mo hemeni afina kavafe'mo hu'niye. Alino apave lino'ae'mo, fiku ne'amiya kava'mo'e afumo he'a ne'amiya ya'mo'e'mo mono nehaya vaya'ai apakupi mafa'nemo alagi afa'a alino alagepa huno o'apategaiye. 10 Ani agufa kava'mo amega apakufale kava'mo hane'niyana ne'yanagi aninagi sese nehaya kava'mogi huno hane'niye. Ani kava'mo haneme haneme ne'esigeno'ae'mo saufa afina'mo Goti'a alino alagepa huno apatesiya afina'mo afole aisigeno'ae'mo hano hugiye.

11 Ani kava'mo hane'niya'monanafa Kalaisi'a alagepa kava'mo afole aisiya kavatefe'mo hogote vekamo mono huno ne'apateya vekamo'mo ago aeno agase'niya alagepa seli mono nopi'mo afole ai'niye. Vaya'mogimo ani seli mono no'mo okige Goti'a ma mopamo alo hu'niya afina'mo okige hu'niye. 12 Agaemo mememo kola'aleti'e aikeli pulumakamo kola'aleti'e'mo aote mono nopi'mo faleno ohai'nifa agai'a kola'aleti'mo muki afinatefe'mo magoke afina'mo alagi faleno haiteno'ae'mo maige maige huta maisunafe'mo alagi hatu maeno lateteno hai'niye. 13 Mono hu'a ne'apataya vaya'mogimo pulumakamo kola'mo alige mememo kola'mo alige aikeli pulumakamo he'a atafi'mo kae'naya la'nefamo alige hu'a ali'ne'a vaya'ai apakufale'mo ai'a fuli fuli hu'a fale'a ne'apate'apae'mo mono hisayafe'mo apakufamo ae'a kalo pae'a apate'nae. 14 Afumo kola'mo'a vaya'ai amega apakufale'mo aeno kalo paeno ne'apateya'monanafa afa'a ne'maiya ya'mo alino ne'apamiya Goti ali'ya'amo alisayafe'mo Kalaisi kola'amo'a mago'e huno lapakupi mafa'nemo fali kava'mo ali'ya'alefe'mo aeno kalo paeno lapategaiye. Agaemo hosu kava'amo alagi ohane'niya vekamo maige maige huno ne'maiya Auneme'aleti'mo agai'a agufa'amo Goti'mo ami'niye. 15 Ani kava hu'niya'mofe'mo saufa kotalake gemo folagapi vekamo mai'niye. Agaemo Goti'a keya aeno ge hu'niya vaya'aife'mo polomasi gemo huno'ae'mo, ali'na lapamiguve, huno hu'niya alagepa ya'mo hanege hanege huno hanesiya ya'mo mafa'ne'apimogi muki afo'apimogi ya'mo ne'aliya kava hu'a alisayafe'mo atafa kotalake gemo amagi'a atale'naya vaya'ai hosu kava'apilefe'mo falino miya faino hatu maeno apate'niye.

16 Mago vaya'mogi manu gemo hu'apae'mo, kagemi ya'nimo aliyo, hu'a hapa paite'a nefalisage'apae'mo afa'a aligaya'monanafa ofali'a afa'a mai'nisage'apae'mo o'aligae. 17 Afa'a ne'maiya afina'mo manu gemo hu male'naya gemo afa'a nehaneya'monanafa falisageno'aeke'mo ani manu gemo hu male'naya gemo afole aigiye. 18 Ani kava huno Goti'a atafa kotalake gemo afa'a osu'nifa kotalake gemo afole aisiyafeke'mo pulumakamo kolateti'mo hu male'niye. 19 Ani kavatefe'mo Mosese'a muki ke'aepa ge'amo muki vaya'aife'mo hapa paiteno aikeli pulumaka'e meme'e'mo heteno kola'amo alino anipi'mo laki male'neno sipisipimo haesa ayoka'mo alino yosa akopamo agi'amo hisopu akopale'mo maleno ki male'neno kolapi'mo aeteno ke'aepa gemo hane'niya mukule'e muki vaya'ai apakufale'e'mo aino fuli fuli huno faleno apate'niye. 20 Agaemo,mani kola'mo'a Goti'mo akame hiyo, huno hu male'niya kotalake gemo alino afole aino ate'niye, huno hapa pai'niye. 21 Ani kava huno mono nehaya yate'e seli mono note'e'mo aino fuli fuli huno faleno ate'niye. 22 Vaya'mogi ke'aepa gemo akame hisayafe'mo alagi aise hogo'amo muki hosu kava'apimo afumo kola'aleti'mo ae'a kalo pae'a atalesaya agufa kava'mo nehae. Kola'mo'a aino olaki'nisimo'mo Goti'a vaya'ai hosu kava'apimo alino o'atalegaiye.

Kalaisi'a faliteno hosu kava'apimo alino atale'niya gemae

23 Ani kava'mo hane'niya'mofe'mo apakaemo afumo kolateti'mo ma mopafi mono kava'mo nehu'a koku'nate aune yatefe'mo ae'a kalo pae'a atale'naya'monanafa koku'napi ya'mo'a aeno kalo paeno atalesiyafe'mo afumo ami'naya ofalinimo ago aeno agase'niya ofalinileti'mo aeno kalo paeno atale'niye. 24 Ani kavatefe'mo Kalaisi'a aote seli mono no'mo vaya'mogi ki male'naya mono nopi'mo lama ge aune mono nopi'mo faleno ohai'nifa laha maesiyafe'mo koku'napi'mo Goti haopale'mo faleno hai'niye. 25 Yu vaya'aite'mo hogote vekamo mono huno ne'apateya vekamo'a muki kafuga'ae kafuga'ae'mo agai'a kola'amo alinino ohai'nifa afu kola'mo alininuno alagi aote mono nopi'mo haitale haitale huno mai'niye. 26 Huno mai'niya'monanafa Kalaisi'a ani kava'mo osu'nifa muki afina'ae afina'ae'mo ofalinimo amisiyafe'mo kola'amo aliteno faleno ohai'niye. Muki afina'ae afina'ae'mo agai'amo ofalini amiyesinana ma mopamo alo hu'niya afinateti'mo falite falite hume hume ne'esine. Hiyesina'monanafa hemeni afina'e hano hisiya afina'efe'mo kola'aleti'mo hosu kava'apimo alagi alino atalesiyafe'mo magoke afina'mo vaya'ai apaulagale'mo afole ai'niye. 27 Goti'a, muki vaya'mogi apakai'api hosu kava'apilefe'mo magoke afina'mo falitesage'na agoti hu'na apategauve, huno hu male'niye. 28 Ani gelefe'mo Kalaisi'a asole vaya'ai hosu kava'apimo alino atalesiyafe'mo magoke afina'mo agai'a agufa'amo Goti'mo ami'niye. Agaemo henaga'amo vaya'ai hosu kava'apimo alino atalesiyafe'mo ma mopafi'mo afole o'aigifa agaefe'mo agava ne'maiya vaya'ai apakufamo alagi alino katino apatesiyafe'mo afole aigiye.

Copyright information for `KYG