James 2

Muki vaya'aitegamo magoke agufa kava'age'mo hiyo, huno hu'niya gemae

Konaga'nimogitapae, lapakaemo Ala kava netimo Yesu Kalaisi'a ha le konali agi vekae'mo lapakesa afita fatago nehutapae'mo ala apaki vaya'aitega'e aise apaki vaya'aitega'e'mo magoke agufa kava'age'mo hiyo. Lapakaemo mono nehisage'anae'mo lole vekala'mo mago kagemi ya'a'e vekamo'a ayate'mo aenimo vaino aliteno kanale kukenamo vaili'niya veka'e kagemi ya'amo o'male'niya vekamo'a hosu kukenamo vaili'niya veka'e'mo e'ana hai e'ana magokepi maisa'agetapae'mo na agufa kava'mo anakaetegamo hugae. Kagemi ya'a'e vekae'mo hao ke nehetapae'mo, alagepa siate'mo haikeka fai maiyo, hutapa ha paitetapae'mo kagemi ya'amo ohane'niya vekae'mo, afa'a maiyo, hutapa ha paisafi, haikeka mopafi'mo laiyafi itopale maiyo, hutapa ha nepaisafi hosu lapakesamo afi'netapa alita fako hutapa ne'anatae. Ne'nahaiya konaga'nimogitapamo afiyo, Goti'a kagemi ya'apimo ohane'niya vaya'mo apakesa afi'a fatago nehaya kava'mo'a kagemi ya'apikana huno hanesige'a ne'yagaiya ko'mo alisayafe'mo lekana paino apate'niye. Goti'a agaefe'mo hapau apayamopafi'mo hapau'nisiya vaya'aife'mo, mafa'nemogi afo'apimo ya'mo ne'aliya kava hutapa ani ne'yagauva ko'mo aligae, huno hapa pai'niya'mofe'mae. Maigaya'monanafa kagemi ya'apimo ohane'niya vaya'aina alita afepi apate'nae. Kagemi ya'api'e vaya'mogi kana ya'mo ali'a lapamige agoti hu'a lapatege nosafiye. Ha'ao, agoti hu'a nelapatae. Apakaemo lapakaefe'mo alagepa agi ne'aya agi'alefe'mo hu'a faipa hu'a ne'atae. Lapakaemo yagaino ne'apateya kini vekatapimo ke'aepa ge'amo Goti mukufi'mo hane'niya ke'aepa ge'amo akame nehisayana alagepa kava'mo nehae. Ani gemo'a huno'ae'mo,lapakaitapie'mo lapau lapayamopafi'mo lapau'niya kava hutapa lapaopale'mo ne'maiya vaya'aife'mo lapau lapayamopafi'mo lapaino, huno hu'niye. Mani gemo akame nehisayana alagepa kava'mo nehaya'monanafa alu vaya alu vaya'aitegamo magoke agufa kava'mo nosisayana hosu kava'mo nehae. Ani agufa hosu kava'mo nehisageno'ae'mo ke'aepa gemo'a huno'ae'mo, ke'aepa ge'amo aetapa atale ne'vaiya vaya'mo mai'nae, huno nehiye. 10 Na kava nehaya'mofe'mae. Muki ke'aepa ge'amo akame nehu'apae'mo magoke ke'aepa gemo amagi'a ne'atalesayana muki ke'aepa ge'amo ago amagi'a ne'atalayanage'a vai'mo aligae. 11 Na kava hige'apaene.Kumai kava'mo osiyo, huno hu'niya vekamo'a mago'e gemo huno'ae'mo,vaya'mo ohapaeyo, huno hu'niye. Kumai kava'mo osutapa vaya'mo hapae'nisayana Goti ke'aepa ge'amo ago amagitapa atale'nae. 12 Goti'a ago hatu maeno lapate'niya ke'aepa ge'aleti'mo alino fako huno lapategaiya'mofe'mo alagepa gemo huge alagepa kava'mo huge hutapa maiyo. 13 Goti'a agoti huno apatesiya afina'mo mago vaya'aife'mo hapau hu'a no'apatesaya vaya'aife'mo hau huno o'apategaiya'monanafa hapau hu'a ne'apataya vaya'aife'mo Goti'a hau huno apatesiya kavateti'mo agoti hu'a ae'a agasegae.

Aigofe apakesa afi'a fatago nehaya kavafe'mo hu'niya gemae

14 Konaga'nimogitapae, Mago vekamo'a, nagesa afi'na fatago nehuve, huno nehiya'monanafa alagepa kava'mo nosisiyana agesa afino fatago hu'niya kava'amo ina agufa kavane. Ani agufa agesa afino fatago hu'niya kava'amo'a afa'a ha maegaifiye. Ha'ao afa'a ha o'maegaiye. 15 Mago konagatapimo'mofi lapasatapimo'mofi huno kukena'a'e ne'ya'a'e'mo ohane'nisigetapae'mo, 16 kukenaka'e ne'yaka'e'mo aligananagi uvo, hutapa ha paitetapae'mo alagepa huno maisiya ya'mo o'ami'netapa ge'age'mo nehisayana ina agufa gemo hane'niyanageno afa'a ha o'maegaiye. 17 Ani kava huno mago vekamo'a agesa afino fatago nehiya'monanafa alagepa kava'mo nosisiyana agesa afino fatago hu'niya kava'amo agai'age'mo hane'neno faligekana huno nehane. 18 Hane'niya'monanafa mago vekamo'a, kagaemo kagesa afika fatago nehananage'na nagaemo alagepa kava'mo nehuve. Alagepa kava'mo nosisanana kagesa afika fatago nehana kavakamo alika nave liyo. Nagaemo alagepa kava'nileti'mo nagesa afi'na fatago nehuva kava'nimo ali'na kave liguve, huno hugiye. 19 Kagaemo Gotife'mo magoke vekamo mai'niye, huka kagesa afika fatago nehanana kanalene. Nehana'monanafa hosu apaune vaya'mogi'e'mo Goti'a mai'niye, hu'a apakesa afi'a fatago nehu'apae'mo atete nehae. 20 Negi vekae, kagesa afika fatago nehana'monanafa alagepa kava'mo nosana'mofe'mo kagesa afika fatago nehana kavakamo faligekana huno hane'niye, hu'na ali'na kave lisufiye.

21 Laginago vekamo Emalehamu'a mafa'ne'amo Aisiki'a Goti'mo ofalinimo amisiyafe'mo yafa hi'yalamute'mo alino havaeno ate'niya alagepa kava'aleti'mo vaya'ai apaulagale'mo fatago vekamo mai'nifiye. 22 Lapakaemo ago afi'nayana agesa afino fatago hu'niya kava'amo'e alagepa kava hu'niya kava'amo'e'mo magokepi lokae'ana ali'ya'mo ali'na'ageno alagepa kava'aleti'mo agesa afino fatago hu'niya kava'amo'a ko sino afu le'niye. 23 Emalehamu'a hu'niya kavafe'mo Goti mukufi'mo avo kae male'niya gemo ago ha le yategamo alagi afole ai'niye. Ani gemo'a huno'ae'mo,Emalehamu'a Gotifeke'mo agesa afino fatago hu'nigeno'ae'mo, naulagale'mo fatago vekamo mai'nane, huno ha pai'niye. Vaya'mogi, Emalehamu'a Goti ao vekamo mai'niye, hu'a hu'nae. 24 Lapakaemo ago age'nayana alagepa kava'mo nehaya vaya'aife'mo fatago vaya'mo mai'nae, hutapa apake'naya'monanafa apakesa afi'a fatago hu kava'ageke'mo nehaya vaya'mo fatago vaya'mo mai'nae, hu'a nosae.

25 Kumai kava'mo nehiya a kanomo Lehepi'a kame vaya'ai apamasa hisa'afe'mo e'na'a vekala'mo no'afi'mo u'ana havaesa'afe'mo havaesa'a ya'mo alino alagepa huno anate'nige'ana havaeta'ageno'ae'mo visa'a ka'mo alino ho huno anateteno anave li'niye. Ani kava'mo huno Goti'a ani a kanomo'a hu'niya alagepa kava'aletife'mo, naulagale'mo fatago a kanomo mai'nane, huno ha pai'niye. 26 Mago vekamo agufafi'mo auneme'amo ohane'nisiyana ago fali'niye. Ani kava huno mago vekamo'a agesa'age'mo afino fatago huteno alagepa kava'mo nosisiyana agesa afino fatago hu'niya kava'amo faligekana huno nehane.

Copyright information for `KYG