James 3

Apavayale'mo alagepa hu'a yagaisaya kavafe'mo hu'niya gemae

Konaga'nimogitapae, fiku yanagetapa muki'amogitapamo, lagaemo yagaita apatesuna tisa vaya'mo maigesune, hutapa hugae. Na kava hinagetapaene. Goti'a tisa vaya'mogitamo lusi kava huno agoti huno lategaiya'mofe'mae. Muki'amogitamo muki kava'alefe'mo haita me netalone. Mago vekamo'a avayaleti'mo alagepa ge'ageke'mo nehisiyana hosu kava'amo alagi ohane'niye. Ani agufa gemo nehisiya vekamo'a haino hapai'niya vekamo mai'neno muki agufa'ale'mo alagepa huno afa'a yagaigiye. Lagaemo hosimo'a getimo afiteno lakame hisiyafe'mo aenileti'mo avayafi'mo nofi aeta ate'neta ka'mo alita ho huta ne'ateta avalelita ne'une. Lapakaemo sipi'efe'mo lapakesamo afiyo. Sipimo alopa yakefamo hane'niya'monanafa sipile'mo ne'aliya vekamo'a lusi yasimo ne'alino alino ago'ya failino ne'viya sipimo'mo aise ago'ya kayo'mo hane'nigeno alagepa huno yagai'neno alino ho huno ne'ategeno ne'viye. Ani kava huno apavayamo apakufafi aise ya'atomo hane'niya'monanafa mago'e hu'na lusi gemo huguve, huno huteno himu'namu gemo nehiye. Ani kava huno aise atamo'a lusi kahaufi'mo lelinuneno huno leno hano huno ne'ataleya kavafe'mo lapakesamo afiyo. Apavayamo atagana huno hane'neno alu hosu ge alu hosu gemo nehiye. Lavayamo lagufafi'mo aise ya'atomo hane'niya'monanafa muki lagufa'amo alagi alino hosu huno nelate. Lavayamo'a ata kotegati'mo atamo aelineno muki vaya'amogita lahaopale'mo kae ne'male. Vaya'mogimo muki auneme'e ya'mo namagi nagalo'yavegi noyamemogi hu'a afa'a ali'a yuna he'a apatete'a yagai'a ne'apatayanage'a afa'a yagai'a apategae. Ali'a yuna nehaya'monanafa ani kava hu'a apavayale'mo afa'a yagai'a o'ategae. Lavayamo'a alagi gemo no'afiya ya'mo hane'neno vaya'mo nete'a nefaliya analisa yakana huno lavayafi'mo havai teno hane'niye. Lavayafati'mo Afotimo Goti agi'ale'mo alita asaga huta ate'neta Goti'a agai'agana huno alo huno apate'niya vaya'aife'mo huta faipa huta ne'apatone. 10 Konaga'nimogitapae, magoke lavayafati'mo alagepa gemo huge hosu gemo huge nehuna gemo'mo kanale gemo nosune. 11 Ne ani'e o'ne ani'e'mo meti ani'mo aeno latino haineno nelamiya ani'mo magoke kapati'mo haineno nolamiye. 12 Konaga'nimogitapae, fiki yosamo'a alifi alagamo afa'a aegaifiye. Nofimo'a fiki alagamo afa'a aegaifiye. Ha'ao. Ani kava huno solovala anipati'mo haga ani'mo afa'a alino ohamalegaiye.

Alagepa hu'a agete'a afi'naya kava'mo Gotitegati'mo ne'e, huno hu'niya gemae

13 Lapakaepati'mo ina la'mo afiteno age'niya ne'mo'a alagepa huno ne'afiye. Agaemo alagepa kava'aleti'mo agi'ale'mo alino afepi ne'ateno yagu yaga kava'mo nehuno alagepa huno afiteno age'niya kava'mo nehuno alino apave lino. 14 Huno hugiya'monanafa hosu lapaipa kafa hapaege hosu lapaipa kalitapa apatege ala lapaki alisayafe'mo lapauge hutapa ne'maisayana alagepa vaya'mo mai'none, huta nehutapa lama ge'amo aetapa ati okaeyo. 15 Ani agufa agete'a afi'naya kava'apimo koku'napati'mo emi no'me'nifa ma mopafi vaya'ai kava'apimo apakufamo'mo hau'niya kava'mo Satanitegati'mo afole ne'aiye. 16 Mono vaya'mogi apaipa kafa hapaege ala apaki alisaya kavafe'mo hapauge hu'a mai'nisayana siosi vaya'mogimo alagepa hu'a o'mai'a muki alu hosu kava alu hosu kava'mo hugae. 17 Hugaya'monanafa siosi vaya'mogi alagepa hu'a agete'a afi'naya kava'mo koku'napati'mo ali'nisayana hogote'a yaveyave apaipamo alite'a alagepa hu'a magokepi lokae'a mai'ne'a yagu yaga kava'mo hu'a mai'ne'a vaya'ai ge'apimo afi'ne'a hapau hu'a ne'apate'a alu alagepa kava alu alagepa kava'mo nehae. Apakaemo muki vaya'aitegamo magoke agufa kava'mo nehu'a ae'a ati okae'a ha le yategamo ne'maiye. 18 Ali'a nanu ae'a ne'apataya vaya'mogimo magoke apaipa ali'a ne'maiya afina'mo vase vase hu'a avina ya'mo nehakalageno'ae'mo fatago kava'mo'a alaga aegekana huno afole ne'aiye.

Copyright information for `KYG